Manontany ny Tanora Hoe . . .

Inona no Hataoko mba Hahafinaritra Kokoa ny Famakiako Baiboly?

“Sarotra ny hevitry ny Baiboly indraindray, ka mahakivy.”—Annalieza, 17 taona.

“Tsy nahaliana ahy ny namaky Baiboly.”—Kimberly, 22 taona.

OLONA maro no tsy tia mamaky teny. Ary na ireo tia boky aza dia toa kivy ambony ihany, rehefa mahita ny haben’ny Baiboly. “Ny Baiboly, tamiko, dia boky matevim-be sady feno teny sarotra”, hoy i Tammy, 17 taona. “Mila mifantoka tsara sy maharitra ianao, rehefa mamaky ny Baiboly.”

Fanampin’izany, dia mety handany ny fotoananao sy ny herinao ny entimody sy ny raharaha ao an-trano ary ny fialam-boly. Manasarotra ny fifantohanao izany, ka misakana anao tsy hankafy ny famakiana Baiboly. I Alicia, izay Vavolombelon’i Jehovah, dia nanokana fotoana koa, mba hanomanana sy hanatrehana ireo fivoriana kristianina, ary hitoriana amin’ny hafa. Miaiky anefa izy hoe: “Sarotra tokoa ny famakiana Baiboly, satria ohatra ny tsy mety tapitra ireo zavatra tsy maintsy atao.”

Naharesy ireo zava-tsarotra ireo i Alicia, sy i Tammy, ary ny tanora maro hafa. Mamaky Baiboly tsy tapaka izy ireo izao, sady tena tiany ilay izy. Afaka ny ho tonga amin’izany koa ianao! Misy fomba telo ahafahanao mankafy kokoa ny famakiana Baiboly.

Manokàna fotoana hamakiana Baiboly

“Araka ny hevitro, dia tsy mahaliana ny tanora sasany ny mamaky Baiboly, satria mbola tsy tena nanao izany izy”, hoy i Kelly, 18 taona. Manjary tianao, ohatra, ny spaoro, na ny lalao, iray, satria ataonao matetika; toy izany koa, raha mamaky Baiboly tsy tapaka ianao, dia hanjary hahafinaritra anao ilay izy.

Ahoana anefa raha tsy manam-potoana firy ianao? Hoy ny apostoly Paoly: “Koa tandremo tsara izay fandehanareo, mba tsy hitondranareo tena tahaka ny adala, fa tahaka ny hendry, ka hararaoty ny andro azo anaovan-tsoa, fa ratsy izao fiainana izao.” (Efesiana 5:15, 16) ‘Manararaotra ny andro’ ianao, raha mampihena ny fotoana anaovanao zavatra tsy dia ilaina, toy ny fijerena tele. Ny teny hoe ‘andro’, ampiasain’i Paoly eto, dia midika koa hoe fotoana atokana hanaovana zavatra iray voafaritra tsara. Inona no fotoana mety, azonao atokana hamakiana Baiboly?

Maro no mamaky Baiboly isa-maraina, rehefa avy mijery ny andinin-teny sy ny fanazavana, ao amin’ny Fandinihana ny Soratra Masina Isan’andro.a Aleon’ny hafa kosa mamaky amin’ny alina, alohan’ny hatoriana. Fidio izay fotoana mety tsara aminao, ary ampifanaraho amin’izany ny fandaharam-potoananao. Hoy i Alicia: “Nahay nampifanaraka ny fandaharam-potoanako tamin’ny toe-javatra aho, ka izany no tena nahafahako namaky ny Baiboly tsy tapaka.”

Misy tanora kristianina manokana 10 na 15 minitra eo ho eo isan’andro hamakiana Baiboly, ka nahavaky azy manontolo tao anatin’ny iray na roa taona! Na dia tsy afaka hanao izany aza ianao, dia ataovy ho tanjonao ny hamaky Baiboly isan’andro, na dia kely aza. Hitombo ny fitiavanao ny Tenin’Andriamanitra, raha hajainao tsara ny fotoana natokanao hamakiana Baiboly.—Salamo 119:97; 1 Petera 2:2.

Mivavaha mba hahazoana fahendrena

Marina aloha fa na dia ireo mpamaky ny Baiboly tsy tapaka aza dia mahita fa saro-takarina ny tapany sasany ao. Tian’i Jehovah Andriamanitra, ilay Loharanon’ny Baiboly, anefa ny hahazoanao ny hevitry ny Teniny. Ny bokin’ny Asan’ny Apostoly dia mitantara momba ny Etiopianina iray, izay tsy nahazo tsara ny hevitry ny faminaniana iray tao amin’ny Isaia toko faha-53. Vonona ny hangataka fanampiana ilay lehilahy, ka naniraka an’i Filipo misionera ny anjelin’Andriamanitra, mba hanazava ilay faminaniana taminy.—Asan’ny Apostoly 8:26-39.

Ny famakiana Baiboly misy vokany àry dia tsy manomboka amin’ny famakiana, fa amin’ny vavaka. Isaky ny hanokatra ny Baiboly ny tanora sasany, dia mivavaka amin’i Jehovah, mba hahatakarana ireo lesona ao amin’ilay vakiteny, sy mba handraisana azy ireo am-po. (2 Timoty 2:7; Jakoba 1:5) Ny fanahin’Andriamanitra dia afaka mampahatsiaro anao andinin-teny, izay hanampy anao hamaly fanontaniana na hizaka fisedrana.

Nahatsiaro toy izao ny tovolahy kristianina iray: “Nandao anay i Dada, fony aho 12 taona. Indray alina, dia nivavaka tamin’i Jehovah aho tao am-pandriana, ka niangavy azy mba hiverenan’i Dada. Nalaiko ny Baiboliko avy eo, ary novakiko ny Salamo 10:14 manao hoe: ‘Hianao [Jehovah] no iononan’ny mahantra; hianao no Mpamonjy ny kamboty.’ Niato kely iray minitra aho. Tsapako fa niteny tamiko i Jehovah, ary nampahafantatra ahy fa izy no mpamonjy ahy, fa izy no Raiko. Aiza indray aho no hahita ray tsara noho izy?”

Azonao atao ho fahazarana ve ny mivavaka, isaky ny maka toerana mba hamaky Baiboly ianao? Izao no torohevitr’i Adrian: “Mivavaha—aloha sy aorian’ny famakianao—mba ho tena resaka mifamaly no ataonao amin’i Jehovah.” Hanamafy ny fahatapahan-kevitrao haharaka ny famakianao Baiboly ny vavaka amim-pahatsorana, no sady hanamafy ny fifandraisanao amin’i Jehovah.—Jakoba 4:8.

Ataovy velombelona ny vakiteninao

Nihevitra ny Baiboly ho tsy nahaliana i Kimberly, voalaza tetsy am-piandohana. Marina aloha fa boky tranainy be ny Baiboly, satria nosoratana talohan’ny nisian’ny ordinatera, na ny televiziona, na ny fiaramanidina. Efa an’arivony taona maro koa izay no nahafatesan’ireo olona voatantara ao aminy. Hoy anefa ny apostoly Paoly: “Velona sy mahery ny tenin’Andriamanitra.” (Hebreo 4:12) Boky tranainy toy izany ve dia afaka ny hanan-kery?

Tamin’ny andron’i Ezra mpanao kopia, dia lehilahy sy vehivavy an’arivony maro, “mbamin’izay efa mahahaino”, no niara-nivory tao Jerosalema mba hihaino ny famakiana ny Lalàn’i Mosesy. Efa 1 000 taona mahery ny Lalàna tamin’izay! Kanefa, “[novakin’i Ezra sy ireo niaraka taminy] mazava ny teny tao amin’ny bokin’ny lalàn’Andriamanitra, sady nohazavainy tsara ny heviny, ka dia azon’ny olona tsara ny teny novakina.” Rehefa nohazavain’izy ireo toy izany ny Soratra Masina, ka nataony velombelona ny famakiana azy, inona no vokany? “Nandeha ny olona rehetra hihinana sy hisotro sy hanatitra anjara ho an’ny sasany ary hifaly indrindra, satria azony tsara ny teny izay notorina taminy.”—Nehemia 8:1-12.

Ahoana no ‘ahazoanao tsara ny hevitry’ ny zavatra vakinao ao amin’ny Baiboly? Sarotra amin’i Cathy ny mamaky teny, ka mamaky amin’ny feo avo izy mba hampifantoka ny sainy. I Nicki kosa maka sary an-tsaina ny tenany ao anatin’ilay tantara. “Mieritreritra aho hoe inona no ho tsapako raha izaho no teo amin’ny toeran’ilay olona”, hoy izy. “Ny tantaran’i Rota sy i Naomy no tiako indrindra, sady averiko vakina foana. Tamin’izahay nifindra nankany amin’ny tanàna hafa, dia nampahery ahy io tantara io. Azoko an-tsaina izay tsapan’i Rota, nankany amin’ny tany tsy fantany, sady tsy nahalala na iza na iza. Hitako fa nitoky tamin’i Jehovah izy, ka izany dia tena nanampy ahy mba hanao toy izany koa.”—Rota, toko 1-4.

Ilaina ny fisaintsainana, raha tiana ‘hanan-kery’ ny Baiboly. Isaky ny mamaky ianao, dia makà fotoana handinihana ireo andinin-teny, sy hieritreretana izay azonao ampiharana azy. Mety ho tianao ny hijery ireo boky fianarana Baiboly navoakan’ny Vavolombelon’i Jehovah, mba hisy heviny kokoa ny vakiteninao.b

Mahareta!

Tsy mora ny maharaka ny famakiana Baiboly. Na dia ny fandaharam-potoana efa tsara aza dia mety hila ny hamboarina tsindraindray. Inona no hanampy anao hifikitra amin’ny tanjonao hamaky ny Baiboly isan’andro?

Afaka manampy ny fianakavianao sy ireo namanao. Hoy i Amber, 15 taona: “Miray efitra amin’ny zandriko vavy aho. Indraindray, rehefa tena vizana iny aho amin’ny alina, ka tonga dia ta hatory, dia ampahatsiahiviny foana aho. Tsy hadinoko mihitsy ny mamaky Baiboly!” Resaho amin’ny hafa izay andinin-teny nahaliana anao. Hampitombo ny fankasitrahanao ny Tenin’Andriamanitra izany, ary mety handrisika azy hamaky Baiboly koa. (Romana 1:11, 12) Raha hadinonao ny namaky Baiboly indray andro na mihoatra, dia aza kivy! Tohizo indray, teo amin’ilay nijanonanao, ka aoka ianao ho tena tapa-kevitra ny hanohy hatrany.

Tadidio foana ireo voka-tsoa azo avy amin’ny famakiana ny Baiboly isan’andro. Afaka manana fifandraisana akaiky amin’i Jehovah ianao, raha mihaino azy amin’ny alalan’ny Teniny. Ho azonao koa ny heviny sy ny fihetseham-pony. (Ohabolana 2:1-5) Ho fiarovana ho antsika ireo fahamarinana sarobidy avy amin’ilay Raintsika any an-danitra. “Inona no hiarovan’ny zatovo ny làlan-kalehany tsy ho voaloto?”, hoy ny mpanao salamo. “Ny fitandremana araka ny teninao.” (Salamo 119:9) Atombohy àry ny famakianao Baiboly—ka aza ajanona. Ho hitanao fa tena hahafinaritra lavitra noho ny niheveranao azy ilay izy!

[Fanamarihana ambany pejy]

[Sary, pejy 16]

Hanatsara ny famakianao Baiboly ny vavaka sy ny fikarohana, ary hanampy anao hahazo ny hevitry ny Soratra Masina

[Sary, pejy 17]

Hevero hoe ao amin’ilay toe-javatra tantarain’ny Baiboly ny tenanao, dia ho velombelona ilay izy