Tena Ilaina ny Raim-pianakaviana

“MIHAMARO hatrany ireo lehilahy tanora ta handray anjara amin’ny fitaizana ny zanany. Ny 82 isan-jaton’ireo lehilahy 21 ka hatramin’ny 39 taona dia nifidy asa nahafahany niaraka bebe kokoa tamin’ny fianakaviany.” Izany no nolazain’ilay gazety kanadianina atao hoe Toronto Star, momba ny fanadihadiana iray nataon’ny Oniversiten’i Harvard. Nanontaniana ny lehilahy sy ny vehivavy amerikanina 1 008, teo amin’ny 21 ka hatramin’ny 65 taona. Ny 71 isan-jaton’ireo lehilahy tanora dia nilaza ho “vonona hanaiky karama kely kokoa, raha mahatonga azy hanana fotoana bebe kokoa hiarahana amin’ny fianakaviany izany.”

Nahoana no raim-pianakaviana maro no maniry handany fotoana bebe kokoa miaraka amin’ny zanany? Nisarika ny saina ho amin’ny fanadihadiana iray natao tamin’ny 1994 i David Blankenhorn, anisan’ireo nanangana ny fikambanana iray mpanohana ny ray manaiky andraikitra. Nasehon’izy io fa ny 50 isan-jaton’ireo lehilahy amerikanina 1 600 nanontaniana dia nilaza fa tsy mba niahy ny fihetseham-pony mihitsy ny rainy, nandritra ny fahazazany. Maro amin’izy ireo àry no tsy tia ny hiverenan’izany.

Misy vokany tsara eo amin’ny ankizy ny fiarahana manao zavatra amin’ny rainy. Niresaka momba ny fikarohana nataon’ny Minisiteran’ny Fahasalamana sy ny Fanasoavam-bahoaka ny Toronto Star. Hoy izy: “Tsy dia manahirana loatra ny ankizy sy ny zatovo, mivelatra kokoa amin’ny hafa izy ireo, ary mahay kokoa any an-tsekoly”, rehefa miara-misakafo sy mitsangantsangana aminy, ary manampy azy amin’ny entimodiny ny rainy.

Izany dia manasongadina fomba fitaizana izay nahomby tamin’ny nanoratana azy tamin’ny voalohany, telo arivo taona lasa izay, ary mbola mahomby ihany ankehitriny. Ny ray indrindra no tena nasain’ilay Mpamorona ny fianakaviana nitaiza ny zanany. (Efesiana 3:14, 15; 6:4) Tokony hanampy ny zanany hamboly fitiavana an’Andriamanitra ao am-pony, sy hampianatra azy ny lalàny sy ny didiny, izy. Nasain’Andriamanitra nanao izany izy ireo ‘rehefa mipetraka ao an-trano, rehefa mandeha eny an-dalana, rehefa mandry, ary rehefa mifoha.’—Deoteronomia 6:7.

Andraikitra iombonan’ny ray sy ny reny ny fitaizana ny zanany. Mandidy ny zanaka toy izao ny Baiboly: “Mihainoa ny ana-drainao, ary aza mahafoy ny lalan-dreninao.” (Ohabolana 1:8) Tena lehibe ny anjara asan’ny raim-pianakaviana. Tsy maintsy manohana sy manaja ny vadiny izy amin’izany, ary miara-miantsoroka aminy ireo raharaha voafaoka amin’ny fitaizana ny zanany. Tsy maintsy mandany fotoana hamakian-teny sy hiresahana amin’ny ankizy koa izy. Mahatsiaro ho tiana sy ankasitrahana ny ankizy amin’izay.

Mazava àry fa ny Baiboly no ahitana ny torohevitra sy ny toro lalana azo itokisana indrindra mba hampirindra tsara ny fianakaviana. Ny raim-pianakaviana, izay mikarakara ny ilain’ny fianakaviany eo amin’ny ara-panahy sy ara-pihetseham-po ary ara-nofo, dia miantsoroka tsara ny andraikitra napetrak’Andriamanitra taminy.