Neny sy ny Zanany Folo Vavy

NOTANTARAIN’I ESTHER LOZANO

SAMY teraka tany Bitlis, Torkia, i Dada sy i Neny, ary Armenianina ny ray aman-drenin’izy ireo. Niala tao Torkia i Dada ka nifindra tany Etazonia, teo am-piandohan’ny taonjato faha-20, rehefa niely ny fandripahana Armenianina. Tokony ho 25 taona izy tamin’izay. Nifindra koa i Sophia reninay, fotoana fohy taorian’izay, fony izy 12 taona.

Toa nifanaraka ny ray aman-drenin’izy ireo hoe halefa any Etazonia i Neny mba hanambady an’i Aram Vartanian rainay. Mbola kely loatra i Sophia ka tsy afaka nanambady fony izy tonga tany Fresno (Kalifornia). Niara-nipetraka tamin’ilay ho rafozambaviny àry izy mandra-pahatongany ho ampy taona.

I Antranig no zanak’i Dada sy i Neny voalohany. Novan’io zokinay lahy io ho Barney anefa ny anarany tatỳ aoriana. Teraka tamin’ny 6 Aogositra 1914 izy. Vavy daholo ny zandriny folo. Lasa Mpianatra ny Baiboly (Vavolombelon’i Jehovah) i Dada tamin’ny 1924, fony nandalo tany Fresno i Shield Toutjian ka nanao lahateny ho an’ny teratany armenianina. Niara-nanatrika fivoriana kristianina ny fianakaviana rehetra tatỳ aoriana.

Nifindra tany Oakland (Kalifornia) izahay tamin’ny 1931 ary niaraka tamin’ny fiangonana tany an-toerana. Nanompo an’i Jehovah tamim-pahatokiana, tany Napa (Kalifornia) i Barney mandra-pahafatiny tamin’ny 1941. Vavy fahatelo aho ary nanolo-tena ho an’i Jehovah ka natao batisa tamin’ny 1935. Vita batisa vao haingana i Agnes, nefa nanatrika fivoriana nandritra ny 75 taona! Teo daholo izahay sivy vavy, ary faly be satria vita batisa izahay rehetra nony farany.

Nampalahelo fa tsy mba teo i Neny. Maty herintaona talohan’io izy rehefa feno 100 taona sy 2 andro. Nanambara ny nahafatesany ny gazety iray tany Kalifornia tamin’ny 14 May 1996, ka nilaza hoe: “Nanao asa soa io Vavolombelon’i Jehovah io, satria nampianatra ... Baiboly an’ireo olona liana nandritra ny 54 taona.” Naverina tao koa ny tenin’i Elizabeth rahavavinay hoe: “Noraisiny an-tanan-droa foana izay namangy azy ary norosoany sakafo ... Hoy foana izy: ‘Mandrosoa re hisotro kafe mahery e’, ary tena mahavoa ianao raha sendra tonga amin’ilay izy vao nahavita mofomamy baklava iny.”

Efa 85 taona i Gladys vavimatoanay ary 66 taona ny faravavinay. Vavolombelon’i Jehovah marisika izahay rehetra. Nanao asa misionera ny telo taminay rehefa nahazo diplaoma tao amin’ny Sekoly Ara-baibolin’i Gileada An’ny Tilikambo Fiambenana. Tao amin’ny kilasy faha-13 i Elizabeth, ary nanompo tany Callao, Peroa, nandritra ny dimy taona. Any Newport Beach (Kalifornia) izy izao. Nanatrika ny sekoly faha-35 i Ruth. Misionera tany Aostralia nandritra ny dimy taona izy sy i Alvin Stauffer vadiny. Izaho kosa nanatrika ny kilasy fahefatra ary voatendry hankatỳ Meksika tamin’ny 1947. Tatỳ izahay sy i Rodolfo Lozano no nivady tamin’ny 1955.a Nanompo teto izahay hatramin’izay.

Velom-pankasitrahana tokoa izahay folo mirahavavy satria salama tsara. Afaka manompo an’i Jehovah amin’ny fo sy ny saina ary ny herinay manontolo àry izahay raha mbola sitrapony, ankehitriny sy ho mandrakizay, ao amin’ny tontolo vaovao.

[Fanamarihana ambany pejy]

[Sary, pejy 20]

Batisan’i Agnes, 1997

[Sary, pejy 20, 21]

Tamin’i Elizabeth nahazo ny diplaoman’i Gileada, 1949

[Sary, pejy 21]

Esther (ankavanana) tany amin’ny sampan’i Meksika, 1950

[Sary, pejy 21]

Ruth sy Alvin Stauffer, mpanompo iraisam-pirenena tany amin’ny sampan’i Meksika, 1987