Tantely—Fanafody Mamy

MISY dokotera mpikaroka mafana fo erỳ momba ny tantely, izay mahatohitra otrikaretina sy manala fanaintainana. Hoy Ny Gilaoby sy Taratasy (anglisy), gazety iray any Kanada: “Mahatohitra otrikaretina sasany efa tsy andairam-panafody intsony ny tantely, ka mahasitrana fery mamoro-nana, fa tsy toy ny fanafody maoderina be tsy mandaitra intsony.”

Nahoana no afaka manasitrana ny tantely? Manome ny valiny ny asan’ny tantely mpiasa, izay manangona ny mamimbony amin’ny voninkazo. Anisan’ny mahaforona ny roran’ny tantely ny anzima iray tena ilaina mba hanasaratsarahana ny gliokaozy (karazana siramamy) ao anaty mamimbony. Izany dia manome gaza iray (karazana hidrozenina), izay nampiasaina hatramin’izay mba hanadiovana sy hamonoana otrikaretina amin’ny fery. Vetivety ihany anefa ny asan’io hidrozenina io amin’ny fery amin’ny ankapobeny, fa tsy mba toy izany kosa ny tantely. Hoy ny gazety Gilaoby: “Raha vao eo amin’ny fery ny tantely, dia raisin’ny ranoka ao amin’ny vatana, ka mihena ny asidra voajanahary ao aminy.” Manomboka miasa ao amin’io faritra tsy be asidra io amin’izay ilay anzima. Miadana sy tsy miovaova ny fisaratsarahan’ny siramamy ao amin’ny tantely, ka izany no miteraka tsikelikely fatrana hidrozenina ampy tsara mba hamonoana ny otrikaretina eo amin’ilay fery, kanefa tsy manimba ireo sela salama.

Lazain’ny gazety Gilaoby fa manana toetra maro, izay mahatonga azy ho afaka manasitrana, ny tantely. “Lasa mandomando ny fery rehefa hosorana tantely kely, ka voaro ny hoditra ary tsy misy takopery mafy. Mahatonga lalan-dra manify kely vaovao hiforona sy hitombo ny tantely, ary mamokatra sela manome hoditra vaovao. Ankoatra izany, dia afaka mampitony fanaintainana ny tantely, ka mampihena ny mivonto sy manatsara ny fikorianan’ny ra ary misakana ny fery ‘tsy hamoro-nana.’ ”

“Tsy ny olona rehetra anefa no mahazaka ny tantely”, hoy ny fampitandreman’ilay gazety. Lazaina fa misy poizina ao amin’ny dimy isan-jaton’ny tantely. Misy fikambanana sy dokoteran’ankizy milaza fa tsy tokony homena tantely ny ankizy latsaka ny herintaona. Ny antony dia satria “mbola tsy ampy ny mpanohitra otrikaretina ao amin’ny tsinainy.”