Ny Asa Maro Sahanin’ny Reny

4.50 maraina: Mitomany hankeo amin’i Helen, reniny, i Alex kely mbola rendremana. Mbola matory ireo ankizy roa hafa, dia i Penny (5 taona) sy Joanna (12 taona), sy Nick vadin’i Helen. Ampakarin’i Helen eo am-pandriana i Alex ary ampinonoiny. Tsy afaka matory intsony izy.

5.45 maraina: Mitsaitsaika mankany an-dakozia i Helen ka manao kafe ary mamaky teny.

6.15–7.20 maraina: Mifoha i Nick. Mamoha an’i Penny sy Joanna i Helen, manomana sakafo maraina ary mampirimpirin-trano. Mandeha miasa i Nick amin’ny 7.15 sady manatitra an’i Joanna any am-pianarana. Tonga hitaiza an’i Alex ny renin’i Helen.

7.30 maraina: Manatitra an’i Penny any amin’ny akanin-jaza i Helen. Manam-potoana hieritreretana momba ny asan’ny reny izy eny an-dalana handeha hiasa. “Ity no mazana indrindra amin’ny asa rehetra”, hoy izy.

8.10 maraina: Latabatra feno asa no manoloana an’i Helen. Matahotra ny ho bevohoka indray izy ka hamoy ny asany. Mila vola fanampiny anefa ny fianakaviany.

10.43 maraina: Misy antso an-telefaonina momba ireo zanany. Mampahery azy toy izao i Nancy mpiara-miasa aminy, rehefa nametraka ilay telefaonina i Helen: “Tena voakarakaran’indrỳ tsara kosa aloha ny zanak’indrỳ e!” Latsa-dranomaso i Helen.

12.05 antoandro: Maka mofo voasesika i Helen, ary mieritreritra ny tenany tamin’ny mbola tsy nanan-janaka. Nisy zavatra nokasainy hatao nandritra ny fotoana ‘nampahalalaka’ azy tamin’izany. ‘Nofinofy fotsiny ireny!’, hoy ny famaranan-keviny.

3.10 tolakandro: Mahazo antso an-telefaonina maromaro avy any an-trano i Helen, ka reny ny zavatra mahatsikaiky ataon’i Alex. Toy izao avy eo no ilazany ny fitiavany manokana ny zanany: “Mbola tsy nitia olona toy ny itiavako azy ireo aho.” Tena lehibe io fitiavana io ka nanampy azy handresy ny zava-tsarotra tsy nampoizina.

5.10 hariva: Misy dia kely alehan’i Helen rehefa avy maka an’i Joanna izy. Mitelefaonina an’i Nick izy mba hampahatsiahivana azy fa anjarany ny maka an’i Penny.

6.00–7.30 hariva: Tafaverina ao an-trano i Helen, mamela an’i Nenibe hody amin’izay, mampirin-trano sady mahandro sakafo hariva. Misento i Helen rehefa anontaniana ny amin’izay tadiavin’ny zazakely maika. “Tadiavin’ny zazakely ny reniny, dia ny sandriny, ny vatany, ny nonony. Mbola tsy ampatoriny koa ny reniny.”

8.30–10.00 alina: Manampy an’i Joanna hanao ny entimodiny i Helen ary mampinono an’i Alex. Manao raharaha hafa i Helen mandritra ny antsasak’adiny amakian’i Nick teny amin’i Penny.

11.15 alina: Efa lasa natory i Penny sy Joanna. Mbola tsy matory i Alex trotroin-dreniny, nefa resin-tory ihany amin’ny farany. “Efa azo ampandrina amin’izay angamba izy ity”, hoy i Helen amin’i Nick izay efa rendremana.