Vahaolana Mandaitra ve ny “Fomba Fitaizan’ny Reny Kangoroa”?
Tao amin’ny hopitaly iray any Bogotá, any Kolombia, no niseho izao zavatra izao, tamin’ny 1979. Nampahatahotra fa vitsy loatra ny isan’ny zazakely teraka tsy tonga volana velona soa aman-tsara. Noho izany, dia nanolotra vahaolana hafakely ny dokotera iray any Kolombia. Tsy inona izy io fa ny “fomba fitaizan’ny reny kangoroa.”
Sarotra amin’ny dokotera ny mikarakara an’ireo zazakely teraka tsy tonga volana mba hahavelona azy ireo soa aman-tsara. Matetika ny zazakely tsy ampy lanja no apetraka ao anaty fitaovana manokana iray antsoina hoe fameloman-jaza, ary mijanona ao mandra-pitombony tsara. Any amin’ny tany an-dalam-pandrosoana anefa, dia feno loatra sady tsy madio ny hopitaly, tsy ampy koa ny mpiasa sy ny fitaovana, ka miteraka areti-mifindra mandoza.
Nahita hevitra ny dokotera iray any Kolombia, ary toa manamaivana ilay zava-manahirana ny fomba hitany. Inona io fomba io? Rehefa misy zazakely teraka tsy tonga volana, dia karakaraina araka ny fomba mahazatra izy, mandra-pahatsaran’ny fahasalamany. Ampianarina hikarakara ilay zaza ny reniny mandritra izany fotoana izany. Ilay reny mihitsy no manao ny asan’ny fitaovana fameloman-jaza rehefa antonony ny fahasalaman’ilay zazakely. Amin’ny fomba ahoana? Ajanony foana eo an-tratrany ilay zanany, atsangany eo anelanelan’ny nonony ary hodidininy lamba. Toy ny ao anatin’ny kitapon’ilay biby antsoina hoe kangoroa izy amin’izay, sady miadana no mafana tsara ary afaka minono mora foana amin-dreniny. Izany matetika no antony iantsoana io fomba io hoe fomba fitaizan’ny reny kangoroa.
Tsy ilana fitaovana lafo vidy izy io. Lobaka mety tsara, na akanjo tsotra misy fehikibo no anaovan’ilay reny. Mody izy mianaka rehefa mitombo tsara ilay zaza. Entina miverina tsy tapaka any amin’ny hopitaly ihany anefa izy mba hanaraha-maso ny fahasalamany.
Hita fa sady mahomby no azo antoka io fomba fitaizan’ny reny kangoroa io, rehefa natao ny fandinihana voalohany. Toa mampiraiki-po an’ilay zaza sy ny reniny koa izy io. Tsy mahagaga àry raha mampiasa azy io ny olona any amin’ny tany maro. Ampianarina mba ho “dada kangoroa”, “bebe kangoroa” ary “zoky kangoroa” koa ny havan’ny renin’ilay zaza any Meksika, mba handimby ilay reny rehefa mila fialan-tsasatra izy. Nilaza toy izao tamin’ny Mifohaza! ny Dr. Guadalupe Santos, lehiben’ny fandaharana iray mampiasa io fomba io any Meksika: “Efa hatramin’ny 1992 izahay no nampiasa io fomba io ary hitanay fa mahomby ilay izy. Sady vitsy kokoa ny fitaovana fameloman-jaza ilaina no kely kokoa ny fotoana hijanonana atỳ amin’ny hopitaly.”