“Sarivongan’ny Devoly”
AVY AMIN’NY MPANORATRA NY MIFOHAZA! ANY ESPAINA
MISY sarivongana hafakely eto amin’ny tanànan’i Madrid, eto Espaina. Mety tsy hanaitra an’izay tsy tena mandinika azy ny endriny sy ny anarany hoe “Ilay Anjely Nazera.” Rehefa jerena akaiky anefa izy io, dia tsy inona akory fa sarivongan’i Satana Devoly!
Tany katolika i Espaina, ka sarivongan’ireo anjely na “olo-masina” no antenain’izay mitsidika eto ho hita fa tsy sarivongan’ny filohan’ny demonia. Te hiala tamin’ny mahazatra anefa i Ricardo Bellver, Espaniola mpanao sokitra tamin’ny taonjato faha-19. Fantany tsara ilay tantara lava be miendrika tononkalo nosoratan’i John Milton hoe Paradisa Very, izay miresaka ny nandroahana an’i Satana avy tany an-danitra noho izy niavonavona sy nikomy. Nahavita sarivongana nampiseho an’io fianjerana nanaitra io i Bellver tamin’ny 1874.
Hafa ny sarin’i Satana nataon’i Bellver fa tsy zavaboary toy ny biby misy tandroka, araka ny nieritreretan’ny olona azy hatramin’izay. Anjely tsara tarehy no fahitany an’io filohan’ny demonia io, saingy lasa ratsy toetra tamin’izy nazera avy tany an-danitra. (Apokalypsy 12:9) Mifanaraka kokoa amin’izay resahin’ny Baiboly izany.a
Ahoana no niheveran’ny mponin’i Madrid an’izany sarivongana izany? Nilaza ny mpahay tantara iray momba ny zavakanto fa sosotra ny sasany satria hoe sarin’i Satana no hatao. Nanome vola mba hanaovana ilay sarivongana anefa ny governemanta espaniola, ka nahazo loka ilay izy. Teto Madrid ny iray ary tany amin’ny Fampirantiana Iraisam-pirenena tany Paris ny faharoa, tamin’ny 1878. Nandresy ny zavakanto. Napetraka tao amin’ny zaridainam-panjakanan’i Retiro io sarivongana alimo manaitra io tamin’ny 1879 tany ho any.
Tsy dia mahasosotra ny olona intsony io sarivongana io amin’izao fotoana izao. Nilaza i María Gea ao amin’ilay bokiny hoe Zavatra Miavaka sy Tantara Mahaliana eto Madrid (espaniola), fa “tokony hirehareha ny tanànan’i Madrid satria izy irery maneran-tany no nanao sarivongan’ny Devoly.” Mety hisy hirehareha tokoa, nefa vitsy amin’ireo vahoaka maro be mankao amin’ny zaridainam-panjakanan’i Retiro isaky ny alahady no mandinika an’io sarivongana io.
Toy izany koa fa olona vitsy ankehitriny no mahafantatra hoe i Satana no hery tsy hita maso mahatonga ny olana maneran-tany. (Apokalypsy 12:12) Miresaka mazava tsara momba azy anefa ny Soratra Masina, ka tena mino ny mpianatra ny Baiboly fa misy izy sady manan-kery. Notoherin’i Jesosy i Satana rehefa sahy naka fanahy azy. Nantsoiny hoe ‘mpandainga sady rain’ny lainga’ sy ‘mpamono olona tsy nitoetra tamin’ny marina’ koa io anjely ratsy io.—Jaona 8:44; Matio 4:1-11.
Betsaka lavitra noho ny hatramin’izay ny loza mitranga eto an-tany, ka tena iankinan’ny aina ny hanoherana ny herin’io anjely tezitra, nazera io.b (Jakoba 4:7) Afaka mifaly anefa ireo tia ny marina sy ny rariny satria ny nandroahana an’i Satana avy tany an-danitra dia midika fa efa akaiky ny fandringanana azy. “Handrava ny asan’ny devoly” i Kristy, tsy ho ela.—1 Jaona 3:8.
[Fanamarihana ambany pejy]
a Tsy avy ao amin’ny Baiboly ilay bibilava manodidina ilay sarivongan’i Satana. Angamba hitan’i Bellver ilay sary sokitra any Roma, mampiseho an’i Laocoon, andriana malazan’i Troie sy ny zanany, izay nolazaina fa samy matin’ny bibilava roa, ka avy tamin’io no nangalany ilay sarim-bibilava.
b Raha mila fanazavana fanampiny momba ny fomba hanoherana ny herin’i Satana ianao, dia jereo ny boky Fahalalana Izay Mitarika ho Amin’ny Fiainana Mandrakizay, navoakan’ny Vavolombelon’i Jehovah.