Avy Amin’ny Mpamaky
Mampiaraka Raha Mbola Kely Misaotra tamin’ilay lahatsoratra hoe “Manontany ny Tanora Hoe . . . Ratsy ve ny Mampiaraka Raha Mbola Kely?” (8 Janoary 2002) Vao haingana mihitsy aho no nametraka fanontaniana mitovy amin’io tamin’i Neny, dia ny hoe: ‘Inona anefa no tena maharatsy ny mampiaraka e!’ Efa fantatro ny valiny, saingy te ho resy lahatra bebe kokoa aho. Toy ny hoe nahafantatra izay tao an-tsaiko i Jehovah. Izany no tsapako rehefa namaky ilay lahatsoratra aho. Noho io lahatsoratra io, dia vao mainka aho tapa-kevitra ny tsy hampiaraka raha tsy vonona ny hanambady. Tonga amin’ny fotoana ilana azy foana ny lahatsoratrareo, ka izany no tena itiavako azy ireny! Misaotra betsaka.
L. F., Etazonia
Tonga dia novakiko ilay lahatsoratra, ary tena nampahery ilay izy. Dimy ambin’ny folo taona aho, ary tena mafy ny fanerena hampiaraka amin’io taona io. Saika mampiaraka avokoa ny mpiara-mianatra amiko. Miresaka momba ahy izy ireo matetika, satria tsy mba manao an’izany aho. Tena nilaiko mihitsy àry io lahatsoratra io! Manampy antsika hitadidy tsara ny torohevitra hentitra avy ao amin’ny Baiboly ny lahatsoratra toy io.
J. R., Failandy
Enina ambin’ny folo taona aho, ary te hampiaraka mafy. Amin’izay aho mba mitovy amin’ny ankizy rehetra. Nandinika tsara anefa aho, ary takatro fa tokony ho matotra ny olona vao mampiaraka. Hanampy antsika hisoroka loza sy ireo andraikitra tsy haintsika akory izany.
A. G., Italia
Enina ambin’ny folo taona aho. Tonga ara-potoana ho anay sy ireo namako io lahatsoratra io. Niara-nipetraka izahay rehetra, dia namaky. Tsapanay fa hahita loza ireo mbola kely dia efa mampiaraka. Nanampy anay hamantatra ny tena hevitry ny hoe mampiaraka sy ny fiheveran’ny Baiboly an’izany, io lahatsoratra io. Tsapako, araka ilay famaranan-teny, fa ho azoko ampiasaina hanatanjahana ny ara-panahiko ireo taona maha zatovo ahy, raha miandry kely aho vao mampiaraka.—1 Korintiana 7:36.
R. L. W., Etazonia
Tantaram-piainana Tsy maintsy manoratra atỳ aminareo aho, hilaza fa tena nahafa-po ahy ilay lahatsoratra hoe “Nanampy Ahy ny Fatokisana An’Andriamanitra.” (1 Janoary 2002) Nasehon’ny tantaran’i Rachel Sacksioni-Levee, ny fomba anohanan’i Jehovah Andriamanitra an’ireo mpanompony iharam-pahoriana mafy. Manampy ny olona hanao ny sitrapon’Andriamanitra hatrany ny tantara toy ireny, na dia eo aza ny fisedrana. Miharatsy mantsy ny toe-draharaha maneran-tany.
J. F., Grande-Bretagne