“Hazavana Tonga Lafatra”

RAHA efa sendra nitsapa ampola efa nirehitra elaela ianao, dia fantatrao fa mahamay be ilay izy. Vokatry ny angovo very izany hafanana izany. Ny 10 isan-jato monja amin’ny angovo vokarin’ny ampola tsotra no lasa hazavana, fa lasa hafanana daholo ny 90 isan-jato. Tsy toy izany kosa ny an’ilay bibikely mpamokatra hazavana antsoina hoe angamenavava (jereo eo ambony, nohalehibeazina), satria saika lasa hazavana daholo ny angovo ananany.

Tena faran’izay kely ny angovo lasa hafanana, ao amin’ny angamenavava, ka izany no iantsoana ny hazavana vokariny hoe “hazavana tonga lafatra.” Ahoana no hamokarany hazavana? Misy zavatra antsoina hoe luciférine, ao anaty kibony. Miditra amin’ny lalan-drivotra ny oksizenina ka mifangaro amin’ny luciférine. Miteraka fiovana simika izany, ka mahatonga ny angamenavava hamoaka hazavana toa mavo somary matroka nefa mety ho mena manopy maitso koa.

Ahitana kristaly misy asidra koa ny sela mamokatra an’ilay hazavana. Mahatonga io hazavana io ho tazana avy eo amin’ny kibony izany. Milaza ny mpahay siansa fa ampiasain’ny angamenavava hisarihana ny vadiny ilay hazavana. Samy manana ny fomba fanidiny ny angamenavava tsirairay rehefa mandefa hazavana. Samy hafa koa ny hafainganam-pandehan’ireny hazavana ireny.

Tsy ekenao ve fa midera an’i Jehovah Andriamanitra Mpamorona ny fomba nanaovana ireny zavaboary bitika ireny? Izany mihitsy. Hoy mantsy ny mpanao salamo: “Aoka izay rehetra manam-pofonaina samy hidera an’i Jehovah.”—Salamo 150:6.

[Sary nahazoan-dalana, pejy 25]

© Darwin Dale/Photo Researchers, Inc.