Nisy Namorona Ve?

Tranon-kala

◼ Maivana noho ny landihazo izy io, nefa mafy kokoa noho ny vy mitovy lanja aminy. Efa an-taonany maro ny mpahay siansa no nanao fikarohana momba ny tranon-kala na landin-kala. Misy karazany fito ny landy amboarin’ny hala, fa ilay iray faran’izay mafy amin’izy ireo no tena nodinihina. Io no ampiasain’ny hala mba hiakarana sy hidinana. Mafy sy mahatanty rano kokoa noho ny kofehy vitan’ny bibindandy izy io.

Diniho izao: Ilana mari-pana ambony be sy zavatra simika mahery ny fanamboarana akanjo tsy laitram-bala atao hoe Kevlar. Rano sy mari-pana antonony kosa no ilain’ny hala mba hanamboarana landy. Mafy kokoa noho ny Kevlar anefa ilay karazana landy mafy be vitan’ny hala. Raha atao mitovy habe amin’ny kianja fanaovam-baolina izy io, dia mahavita manajanona fiaramanidina goavana eny am-panidinana!

Mafy be tokoa io landin-kala io, ka tsy mahagaga raha mahaliana ny mpikaroka. Hoy i Aimee Cunningham tao amin’ny gazetiboky Vaovao Siantifika (anglisy): “Te hanamboatra zavatra mafy toa azy io ny mpahay siansa mba hanamboarana zavatra maro, anisan’izany ny akanjo tsy laitram-bala sy kabla fihantonan’ny tetezana.”

Tsy mora anefa ny manamboatra zavatra mitovy amin’io karazana landin-kala io. Ao anatin’ny hala mantsy izy io no amboarina, ary mbola tsy tena fantatry ny mpahay siansa ny fomba anamboarany azy. Hoy ilay mpikaroka atao hoe Cheryl Hayashi, tao amin’ny gazetiboky iray: “Mahamenatra ny hoe manam-pahaizana maro be no miezaka haka tahaka ny zavatra amboarin’ny hala ao ambany lakaly.”

Ahoana no hevitrao? Tongatonga ho azy ve ny hala sy ilay landiny mafy be toy ny vy, sa namboarin’ny Mpamorona mahira-tsaina?

[Sary, pejy 24]

Landin-kala jerena amin’ny mikraoskaopy

[Sary nahazoan-dalana]

Copyright Dennis Kunkel Microscopy, Inc.