Ny Ramanavy Kely Indrindra

● Nisy ramanavy mbola tsy fantatra mihitsy tao amin’ireo lava-bato teny akaikin’ny riandranon’i Sai Yok, any Tailandy. Hitan’ilay mpikaroka atao hoe Kitti Thonglongya sy ny ekipany izy ireo tamin’ny 1973, ary nanangona 50 mahery ry zareo. Nandefasany santionany ny Profesora J. Hill, miasa ao amin’ny Tranombakoka Britanika Momba ny Fandinihana Zavaboary, any Londres. Nampalahelo fa maty i Kitti nefa tsy fantany fa nahita karazana ramanavy vaovao izy. Nantsoin’i Hill hoe Craseonycteris thonglongyai izy io, ho fahatsiarovana an’i Kitti. Ramanavin’i Kitti no ahalalana azy io.

Mirefy 3 santimetatra izy io ary 13 santimetatra eo ho eo ny halavan’ny elany roa rehefa mivelatra. Izy io no kely indrindra amin’ny ramanavy fantatra, sy amin’ny biby mampinono. Tena bitika izy io ka misy miantso azy hoe ramanavy tantely. Miavaka koa izy io satria toy ny an’ny kisoa ny orony, tsy manan-drambo izy, ary mivelatra be ny ravintsofiny sady mivohitra ny eo akaikin’ny lavatsofiny.

Fonenana kely

Any amin’ny Valan-javaboarin’i Sai Yok, any Tailandy, sy any amin’ny faritr’i Myanmar manakaiky an’i Sai Yok ihany no ahitana an’io ramanavy io. Toy ny ramanavy hafa, dia ako no ampiasainy rehefa mihaza bibikely. Lava be ny elany raha oharina amin’ny vatany, ka afaka mihevaheva sy misambotra ny rembiny eny amin’ny ravinkazo izy. Tiany ny matory any amin’ireo toerana avo sy mafana any anaty lava-bato sokay miefitrefitra. Miaro azy kokoa mantsy ny toerana toa an’io ary mihazona ny hafanany. Tena ilain’io biby mampinono io izany. Mahagaga tokoa ny fahaizana voajanahary nomen’ny Mpamorona an’ireny biby kely mahavariana ireny!—Apokalypsy 4:11.

Tena vitsy ny ramanavin’i Kitti ary kely ny faritra onenany, ka atahorana ho lany tamingana izy ireo raha tsy misy fepetra raisina. Efa nisy ny ezaka natao mba hiarovana azy, saingy mbola mampanahy ny fandripahana sy fitrandrahana ala, ny fanamboaran-dalana, ary ny fizahan-tany. Manimba an’ilay fonenana saro-padin’io biby kely mampinono io ny olombelona, ka ho hita eo raha ho tantiny izany na tsia.

[Efajoro/Sary, pejy 21]

NY LEHIBE INDRINDRA SY NY KELY INDRINDRA

Efa ho 1 000 ny karazana ramanavy ary izy ireo ihany no biby mampinono afaka manidina. Ilay karazana fanihy (1) milanja iray kilao mahery no lehibe indrindra. Maherin’ny 1,5 metatra ny halavan’ny elany roa rehefa mivelatra. Mirefy 13 santimetatra eo ho eo kosa ny ramanavin’i Kitti (2) ary 2 grama monja ny lanjany.

[Sary nahazoan-dalana, pejy 21]

Sary: © Merlin D. Tuttle, Bat Conservation International, www.batcon.org