Tsy Andriko ny Hitenenana Amin-dry Zareo hoe: “Ireto Daholo Isika!”
Notantarain’i Abigail Austin
Volana Aprily 1995 tamin’izay ary tsara erỳ ny andro. Nikasa hitsangantsangana tany ambanivohitr’i Angletera izahay sy ny Vavolombelon’i Jehovah vitsivitsy iray fiangonana taminay. Nandeha fiara maromaro izahay. Izaho sy Dada sy Neny, Sarah zokiko vavy, ary i Deborah namanay no niray fiara. Nodonin’ny fiara nirimorimo nifanena taminay izahay, ka izaho sisa no velona. Sivy taona aho tamin’izay.
TANY amin’ny hopitaly aho, ary tapa-bolana tatỳ aoriana vao nahatsiaro tena. Vaky ny karandohako ka nasian’ny dokotera fitaovana hanakambanana azy. Vetivety anefa aho dia sitrana. Notantarain’ny havako izay nitranga, saingy tsy nino aho. Nieritreritra foana aho hoe namangy ahy teo i Dada sy Neny sy ilay rahavaviko tamin’izaho natory. Rehefa tafody tany an-trano aho vao tena niaiky hoe tsy teo intsony ry zareo. Nalahelo be aho!
Inona no nanampy ahy hahazaka an’io loza mahatsiravina io?
Lova ara-panahy
Dimy mianadahy izahay ary izaho no farany. Tamin’ny fotoana nitrangan’ilay loza dia 22 taona i Sarah, 20 taona i Shane, 17 taona i Jessica, ary 15 taona i Luke. Nahafinaritra sy be fitiavana i Steve sy Carol, ray aman-dreninay. Anti-panahin’ny fiangonan’ny Vavolombelon’i Jehovah tao Yorkshire Andrefana, ao Shipley, i Dada, ary tian’ny olona satria mahay mihaino sy vonon-kanampy foana. Mamy hoditra koa i Neny, satria toy ny zanakavavy mikarakara an’ireo be taona teo anivon’ny fiangonana. Nandamina fikoranana ho an’ny tanora izy ary nanampy anay hanana namana tsara. Noraisinay tsara daholo izay tonga tao an-trano. Nampianarin’i Dada sy Neny ho tsara fanahy sy hiahy ny mpiray tanàna aminay koa izahay.
Niara-nianatra Baiboly izahay mianakavy isaky ny alarobia hariva. Nataonay tantara an-tsehatra ireo tantaran’ny Baiboly, indraindray, ary nanao akanjon’olona fahiny izahay. Mbola kely izahay dia efa nampianarin’i Dada sy Neny hanomana fivorian’ny fiangonana sy hiresaka Baiboly amin’ny olona any an-tranony. Be atao izy ireo nitaiza anay dimy, nefa nahita fotoana niarahana taminay foana sady nanampy anay hifandray tsara amin’i Jehovah.
Nanao mpisava lalana, na mpitory manontolo andro, toa an’i Deborah, i Sarah sy Shane ary Jessica rehefa vita ny fianarany. Nifandray am-po kokoa izahay sy Sarah. Toy ny hoe reniko mihitsy izy ary niara-nampianatra Baiboly izahay rehefa vakansy aho. Tiako erỳ ireny fotoana ireny. Hitako hoe tena sambatra daholo ny mpisava lalana, ary tiako ny niaraka tamin’izy ireo. Ny ho mpisava lalana miaraka amin’i Sarah no tanjoko rehefa vita ny fianarako.
Matetika izahay sy ny mpiara-mivory taminay no niara-nanao zavatra, tamin’ny andro tsy fiasana, ka lasa mpinamana sy nifankatia na antitra na tanora. Tsy noeritreretiko mihitsy hoe tena hanampy sy hanohana ahy izy ireny atỳ aoriana.
Taorian’ilay loza
Niverina tany an-trano aho rehefa nivoaka ny hopitaly. Nitory manontolo andro i Shane sy Jessica sady niasa tapa-potoana. Niasa mafy izy dahy mba hikarakarana anay.
Nanampy be anay koa ny mpiara-mivory taminay. Nanome sakafo izy ireo, nanadio, niantsena, ary nanasa ny lambanay, tamin’izahay mbola tsy nahavita nikarakara tena. Mankasitraka azy ireo tokoa izahay. Maro be ny fanomezana sy karta fampaherezana avy amin’ireo Vavolombelona lavitra anay. Tena mifankatia tokoa ny vahoakan’i Jehovah!
Hitan’ireo zokiko, rehefa afaka herintaona teo ho eo, fa nila fianakaviana hikarakara ahy aho. Vonona handray ahy ny fianakaviana tsara fanahy maromaro teo anivon’ny fiangonana. Nandinika lalina àry izahay hoe inona no ho noeritreretin’i Dada sy Neny fa tena hahasoa ahy sy hahatsara ny fifandraisako amin’i Jehovah. Niavaka ny fianakaviana iray. Namanay akaiky i Billy, izay anti-panahy, sy Dawn, vadiny, ary i Lois, zanak’izy ireo vavikely dimy taona. Nandray ahy izy mivady ary notiaviny sy nokarakarainy aho, nanomboka teo. Nataony toy ny zanany aho, nefa tsy saro-piaro mihitsy i Lois, ary mifankatia toy ny mpirahavavy izahay roa izao.
Inona no nanampy ahy?
Tsy azoko mihitsy tamin’ny voalohany hoe nahoana iny loza iny no nitranga taminay, indrindra moa fa hoe tena tia an’i Jehovah sy ny olona i Dada sy Neny ary Sarah sy Deborah. Tadidiko anefa ny tantaran’ny Baiboly momba an’i Joba, izay tsy nivadika tamin’Andriamanitra na namoy ny zanany aza. (Joba 1:19, 22) Nieritreritra aho hoe: ‘I Satana tokoa tamin’ny voalohany no nahatonga ny fijaliana sy ny fahafatesana. Ho faly erỳ izy raha iny loza iny no hahatonga anay tsy hanompo an’Andriamanitra intsony.’ (Genesisy 3:1-6; Apokalypsy 12:9) Tsaroako koa fa tia antsika i Jehovah ka mampanantena fa hanangana ny maty. (Jaona 5:28, 29) Mbola hahita an’i Deborah sy ny fianakavianay indray izahay ao amin’ny paradisa an-tany. Nitombo ny fitiavako an’i Jehovah.
Malahelo aho rehefa mahita olona niharan-doza nefa tsy mahalala ny fampanantenan’ny Baiboly momba ny fitsanganana amin’ny maty. Te hiresaka amin’izy ireo momba an’io fampanantenana sarobidy io àry aho. Tsy ho zakanay mantsy iny fotoan-tsarotra iny, raha tsy teo i Jehovah sy ny fandaminany ary ny fampanantenana nomeny.
Mety hanampy ny ray aman-dreny koa iny zava-nitranga taminay iny, ka hampisaintsaina azy ireo hoe: ‘Nampianarinay tsara momba an’i Jehovah ve ny zanakay, ka raha maninomaninona izahay dia mbola hanompo an’i Jehovah foana izy ireo?’
Ataoko toy ny hoe mbola eo foana i Dada sy Neny. Fantatro fa tian-dry zareo hiezaka mafy hanampy ny hafa aho, toy ny nataon-dry zareo. Nanao mpisava lalana aho rehefa tsy nianatra intsony, ary miara-manao mpisava lalana izao izahay sy Lois. Efa manambady daholo ny zokiko, ary faly manompo an’i Jehovah any amin’ny fiangonana misy azy avy.
Tena tsy andriko ny hahatongavan’ny tontolo vaovaon’Andriamanitra sy ny fitsanganana amin’ny maty. Tsy hisy fanaintainana na fahafatesana intsony amin’izay. (Apokalypsy 21:3, 4) Vitako ny miatrika ny fiainana satria fantatro fa mbola hihaona daholo izahay. Tsy andriko ny hamihinana an’i Dada sy Neny sy Sarah ary Deborah, sy hitenenana amin’izy ireo hoe: “Ireto daholo isika!”
[Sary, pejy 23]
Abigail (faharoa avy any ankavia) sy ilay fianakaviana nanangana azy