“Hafakely Ilay Fomba Fampianatra!”

MPANABE ao amin’ny lise any Korea Atsimo i Soo-jeong. Mampiasa an’ireo video ao amin’ny tranonkala jw.org izy rehefa mampianatra. Hoy izy: “Gaga be mihitsy ireo mpianatra rehefa avy nijery an’ilay video hoe Inona no Atao hoe Tena Namana? Izao no nolazain’izy ireo: ‘Hay ve hoatr’izany ny tena namana e! Tsy nieritreritra an’izany mihitsy aho taloha. Hafakely ilay fomba fampianatra!’ Nisy aza nilaza fa hijery an’ilay tranonkala isaky ny hitady torohevitra.” Hoy koa i Soo-jeong: “Nampirisihiko hampiasa an’io video io ny mpanabe hafa. Faly be ry zareo fa nahazo fitaovana tsara azo ampiasaina rehefa mampianatra.”

Tena nanampy mpianatra maro tany Korea Atsimo koa ilay video misy kisarisary hoe Tsy Mila Miady Nefa Mandresy! Nampiseho azy io tamin’ny mpianatra iray kilasy ny mpampianatra iray eny amin’ny oniversite, izay miara-miasa amin’ny Fikambanana Miady Amin’ny Herisetra Ataon’ny Tanora. Hoy izy: “Tonga dia nahaliana an’ireo tanora ilay video. Manintona mantsy ilay kisarisary!” Hoy koa izy: “Azo ampiharina tsara ilay video, satria aseho ao izay tokony hatao rehefa misy mampijaly sy ny fomba hisorohana an’ilay olana.” Nangataka alalana hampiasa azy io tany amin’ny sekoly ambaratonga voalohany sy faharoa ilay fikambanana, ary nekena ny fangatahany. Na ny polisy aza mampiasa an’ireo video ao amin’ny jw.org.

Efa nijery an’io tranonkala io ve ianao? Nahoana raha mba miditra ao koa? Tsy sarotra ny mitady fanazavana ao amin’izy io, ary maimaim-poana daholo ny raki-peo, video, boky, ary Baiboly ao.