Toko faha-17
Paradisam-pifaliana ho an’ny olombelona rehetra
1. a) Ahoana moa no nanombohan’ny jiolahy iray maty teo anilan’i Jesosy naneho finoana? b) Fanantenana inona moa no nomen’i Jesosy an’ilay jiolahy, ary tamin’ny fampiharihariana toetr’Andriamanitra inona? (II Korintiana 1:3, 4)
ARAKA ny fitantaran’i Lioka, ny resaka farany nataon’i Jesosy talohan’ny hahafatesany dia tamin’ny jiolahy iray nifantsika tamin’ny hazo teo anilany. Nananatra mihitsy ny namany mpangalatra izay niteny ratsy an’i Jesosy io jiolahy io. Hita tokoa fa nanomboka naneho finoana an’i Jesosy izy.
“Ary hoy izy: ‘Jesosy ô, tsarovy aho rehefa miditra amin’ny fanjakanao ianao.’ Dia hoy Jesosy taminy: ‘Lazaiko aminao marina tokoa anio: Hihaona amiko ao amin’ny Paradisa ianao.’ ” (Lioka 23:39-43, MN )
Fampanantenana mahatalanjona tokoa izany ho an’ilay lehilahy efa ho faty! Nahakasika na dia io mpanao heloka bevava faran’izay ratsy io aza ny famindrampon’Andriamanitra, ka nampionona azy noho ny fanantenana ny fiainana ao amin’ny paradisa be voninahitra ho avy.
2. Asehoy amin’ny ohatra fa tena azo antoka ny fanantenan’ny olona iray ny paradisa. (Hebreo 6:18)
2 Azon’Andriamanitra itarina tokoa ny fangorahany sy ny famindrampony, mba hahatratra olona izay lavitra dia lavitra ny fanaovana ny sitrapony fahiny. Ohatra iray amin’ny andro ankehitriny izao manaraka izao:
“Tany Japon andrefana, dia nomelohina ho faty ny zatovo iray noho ny famonoana olona indroa. Nandritra ireo taona niandrasany ny famonoana azy, dia nandre firesahana ny amin’ny Baiboly sy ny “vaovao tsara” ao anatiny izy, nianatra sy nanaiky ny hafatry ny Fanjakana, ary natao batisa tao an-tranomaizina. Gaga ireo mpiambina nahita ny toetoetrany toy ny biby niova ka nahitana fitiavana, fifaliana ary filaminana. Nianatra ny fomba famakian-teny ho an’ny jamba izy, ary nanoratra boky fianarana ny Baiboly maromaro, mba hanampiana ny jamba any ivelan’ny tranomaizina eo amin’ny fianaran’izy ireo. Nanoratra taratasy maro be ho an’ny olona any ivelany izy ary namporisika azy tao amin’ny finoana kristiana. Ny marainan’ny andro hamonoana azy, dia niaraka taminy hatreo amin’ny toeram-pamonoana ny misionera iray. Tsapan’io tovolahy io fa tokony hanome fahafaham-po ny rariny izy izao, ka hanome ‘aina ho solon’ny aina’, nefa afaka niteny toy izao izy: ‘Androany dia matoky mafy an’i Jehovah aho, sy ny sorom-panavotany ary ny fanantenana hitsangana amin’ny maty.’ Taorian’ny famakiana ny Soratra masina sy ny fanaovana hira iray ary ny vavaka, dia nanatona tamim-pahatoniana ny toerana hamonoana azy izy, tamin’ny endrika nahitana mazava tsara, taratry ny fanantenana mafy orina ao am-pony. Ny teny fanaovam-beloma nataony dia hoe: ‘Hatory vetivety aho, ary hihaona aminareo rehetra ao amin’ny paradisa raha sitrapon’i Jehovah.’
3. Inona moa no fanantenana mahatalanjona ho an’ny maty? (I Korintiana 15:22)
3 Afaka naneho finoana ny famindrampo sy ny hatsaram-pon’Andriamanitra io tovolahy io, sahala amin’ilay jiolahy niara-maty tamin’i Jesosy. Marim-pototra ve ny finoana toy izany? Eny, satria ny Baiboly no mamporisika ny olona rehetra mba ‘hanantena amin’Andriamanitra (...) fa hisy fitsanganan’ny marina sy ny meloka.’ (Asan’ny apostoly 24:15) Fahatsinjovan-javatra mahatalanjona re izany! Ny ankamaroan’ny olona maty, ny tsara sy ny ratsy, dia hatsangana avy ao am-pasana ary hanana fahafahana ho tonga mendrika ny fiainana mandrakizay ao amin’ny paradisa tafaorina indray eto an-tany. Nefa io paradisa an-tany io dia ho taratry ny paradisa iray mbola lehibe kokoa fotsiny.
PARADISA ARA-PANAHY BE VONINAHITRA
4. Tamin’ny taonjato voalohany, inona moa ny paradisa mbola ho avy hitan’ny apostoly Paoly tao amin’ny fahitana?
4 Mitantara ny apostoly Paoly fa tao amin’ny fahitana iray “izy dia nakarina ho any Paradisa ka nandre teny tsy azo tenenina”. Inona moa io “Paradisa” io? Tsy karazan’ambaratonga amin’ny lanitra hita maso akory, fa paradisa ara-panahy izay hitondra fifaliana ho an’ny vahoakan’Andriamanitra eto an-tany eto ihany, amin’ny fotoana iray any aoriana any. — II Korintiana 12:1-4.
5. a) Fisehoan-javatra inona avy moa no nitarika ny fidiran’ny mpanompon’i Jehovah ao amin’ny paradisa ara-panahy? b) Inona no toe-piainana manjaka ao? (Isaia 11:6-9)
5 Tamin’ny fotoana noferan’ny tenany manokana no nanorenan’i Jehovah an’io paradisa ara-panahy io. Teo amin’ny tapany farany amin’ny taonjato fahasivy ambin’ny folo, dia nahatsapa ny mpianatra ny Baiboly tso-po fa maro amin’ny fanao sy ny fampianaran’ireo fiangonana ao amin’ny fivavahana lazaina fa kristiana no niandoha avy amin’ny fivavahan’i Babylona fahiny, fa tsy avy amin’ny Baiboly. Nanomboka nampiharihary ny fampianaran-diso toy ny tsy fahafatesan’ny fanahy, ny fijaliana ao amin’ny afobe ary ny andriamanitra telo izay iray (trinite) izy ireo, ary namerina amin’ny laoniny ireo fampianaran’ny Baiboly mikasika ny fanavotan’i Jesosy, ny fitsanganana amin’ny maty ary ny fanjakan’Andriamanitra. Hatramin’ny taona 1879 no namoahan’izy ireo tsy tapaka ny gazety Ny Tilikambo Fiambenana ho toy ny mpanohana amin-jotom-po ny fahamarinan’ny Baiboly. Nandritra ny telopolo taona mahery, ary tamin’ny fiorenana amin’ny fandaharan-taonan’ny Baiboly, dia nanondro mialoha izy ireo fa hiavaka ny taona 1914 araka ny faminanian’ny Baiboly. Ary nipoaka ny Ady Lehibe Voalohany rehefa tonga ny taona 1914, ka narahin’ny fikorontanana hafa izay nanamarika ny “fiandohan’ny fahoriana”, araka ny nanambaran’i Jesosy azy mialoha. Nandritra izany fe-potoana izany ireo filoha ara-pivavahana eo amin’izao tontolo izao dia niteny ratsy ireo vavolombelon’i Jehovah mahatoky sy nampitombo ‘fankahalana’ azy mafy, nefa tamin’ny taona 1919 ireo vavolombelona dia nanapaka tanteraka izay rehetra mety ho fifamatorana tamin’ny empira maneran-tanin’ny fivavahan-diso, dia “Babylona Lehibe”. (Matio 24:3-9; Apokalypsy 17:5) Nandroso haingana ho amin’ny “Làlan’ny fahamasinana” izy ireny, ao amin’ny paradisa ara-panahy izay ny aminy no nanoratan’ny mpaminany iray fahizay manao hoe:
“Eny, ny navotan’i Jehovah hiverina (...) ary ny fifaliana mandrakizay no ho eo an-dohany; hahazo fifaliana sy faharavoravoana izy, ka dia handositra ny alahelo sy ny fisentoana.” — Isaia 35:8-10.
6. a) Iza moa no nampidirina voalohany tao amin’io paradisa ara-panahy io? b) Kilasy inona no niseho taorian’izay? (Isaia 2:2-4)
6 Manan-kambara betsaka mikasika ny zava-mahatalanjon’io paradisa ara-panahy io ireo faminaniana. Ny sisa amin’ny “ondry vitsy” voahosotra sy mpanara-dia an’i Jesosy no voalohany nampidirina ao amin’io toe-piainana paradisa io. (Lioka 12:32) Nefa aorian’ny filazana mikasika ny fifidianana an’ireo Isiraelita ara-panahy 144 000 ireo, ny Fanambarana nomena an’i Jaona dia mitantara olona hafa izay manana tombontsoa hiditra ao amin’io paradisa tsara tarehy io. Izao tokoa no voasoratra:
“Indreo, nisy olona betsaka tsy tambo isaina avy tamin’ny firenena rehetra sy ny fokom-pirenena sy ny olona ary ny samy hafa fiteny nitsangana teo anoloan’ny seza fiandrianana [an’i Jehovah] sy teo anatrehan’ny Zanak’ondry [ilay natao sorona fahiny nefa i Jesosy nomem-boninahitra ankehitriny], niakanjo akanjo fotsy lava”. (Apokalypsy 7:1-4, 9)
Eto an-tany, ny “olona betsaka” dia miaraka amin’ny sisa amin’ny “ondry vitsy”, manana ny fankasitrahan’Andriamanitra ao amin’io paradisa ara-panahy io.
7. Nanao ahoana moa ny fitaran’ny paradisa ara-panahy? (Isaia 60:22)
7 Tena miavaka be tokoa ny “olona betsaka” amin’izao fotoana izao. Rehefa nivoaka avy amin’ny fanenjehana tamin’ny Ady Lehibe Voalohany ny sisa amin’ny “ondry vitsy”, dia an’arivony vitsivitsy monja izy ireo, tao amin’ny sasany amin’ireo tany lehibe ao amin’ny fivavahana lazaina fa kristiana. Nefa tamin’ny 11 aprily 1979, rehefa nivory tao amin’ireo kongregasiona maherin’ny 42 000 ao amin’ny tany sy faritany 205 manerana ny tany ny Vavolombelon’i Jehovah mba hankalaza ny Sakafo harivan’ny Tompo ho fahatsiarovana ny nahafatesan’i Jesosy, ny fitambaran’ny mpanatrika dia olona 5 323 766. Marina tokoa fa nitratra manerana ny tany rehetra ny paradisa ara-panahy amin’izao fotoana izao.
BANJINO NY PARADISA AN-TANY!
8. Ho taratry ny inona moa ny paradisa ara-panahy? (Apokalypsy 21:2, 3)
8 Sahala amin’ny namakivakian’ny sambo fiara sy izay tao anatiny ny safodrano tamin’ny andron’i Noa, dia tahaka izany no hamakivakian’ny paradisa ara-panahy sy ireo mitoetra ao anatiny ny “fahoriana lehibe” ary hivoahany ho eo amin’ny tany tsy misy fandotoana. Endrey ireo zava-mahatalanjona hiseho eto an-tany amin’izay fotoana izay! Hanana asa hatao ny “olona betsaka” tafita velona, eo amin’ny ‘fampanompoana ny tany’ sy ny fanovana azy ho tonga toerana mahafinaritra izay hahitana taratry ny famirapiratana manontolon’ny paradisa ara-panahy izay ny aminy no nanoratan’Isaia hoe:
“Ravoravo ny efitra sy ny tany karankaina, ary ny tani-hay mifaly sy mamony tahaka ny lilia. Mamony be dia be izy, eny, mifaly sy mihoby izy (...) Dia hahita ny voninahitr’i Jehovah izy sy ny famirapiratan’Andriamanitsika.” (Isaia 35:1, 2)
Ny hatsaran-tarehy mampitolagagan’izany paradisa maneran-tany izany dia hampisandratra marina tokoa ny Mpamorona mahatalanjona ny lanitra sy ny tany!
9. Karazam-panjakana inona moa no hampiharina eo amin’ny paradisa, ary amin’ny alalan’iza? (Salamo 72:12)
9 Ao amin’izany paradisa an-tany izany, dia hiray feo koa ny olona mba hidera an’i Jehovah sy hankalaza ny fanjakany:
“Milaza ny voninahitry ny fanjakanao izy sady miresaka ny herinao, mba hampahafantarina ny zanak’olombelona ny herinao sy ny haben’ny voninahitry ny fanjakanao.” (Salamo 145:10-13)
Tsarovy, fa hisy ny fanjakana arivo taona hanjakan’i Jehovah amin’ny alalan’i Jesosy Kristy Zanany, ho fitahiana ny foko sy ny fokom-pirenen’olombelona rehetra. Ho fanjakam-piadanana izany. Ny fandaharana rehetra hatomboka mba hanarenana ny olombelona dia hotanterahina hatramin’ny farany amim-pahombiazana lehibe. Ny fitiavan-karena fatratra sy ny fandraisana kolikoly dia hosoloana falalahan-tanana sy fitiavana. Tsy hanome vahana ny manan-karena intsony ireo mpanapaka ka hampahory ny mahantra sy ny tsy manana, satria nihiaka toy izao ny mpaminanin’Andriamanitra: “Indro, fa araka ny fahamarinana no hanjakan’ny mpanjaka, ary [eto an-tany eto] ny lehibe hanapaka araka ny rariny.” (Isaia 32:1) Eo ambanin’ny fanapahana tokana an’izao tontolo izao, dia ho paradisa tokoa ny tany!
10. a) Iza moa no “ho velona indray” ao amin’ny paradisa? (Apokalypsy 20:12, 13) b) Amin’ny fomba ahoana no ilazalazana ny fitambaran’ny fandaharana nataon’i Jehovah ho amin’ny fiainana? (Ezekiela 47:1, 9)
10 Endrey koa ny fifaliana mahafantatra fa “ho velona indray” ny maty mba handray anjara ao amin’izany paradisa izany! (Jaona 11:25) Ny toko farany amin’ny Apokalypsy dia mitantara ho antsika ny fitambaran’ny fandaharana nataon’Andriamanitra tamin’ny alalan’i Jesosy Kristy mba hanomezana ny fiainana ho azy ireo sy ho an’ny olona hafa rehetra amin’izany fotoana izany. Toy ny “onin’ny ranon’aina, manganohano tahaka ny vato krystaly, nivoaka avy teo amin’ny seza fiandrianan’Andriamanitra sy ny Zanak’ondry” izany. Io ony ara-panoharana io dia mikoriana eo afovoan’ny lalamben’ilay tanàna any an-danitra, dia “Jerosalema vaovao”, izay fonenan’i Jesosy nomem-boninahitra sy ny ‘mpiara-manjaka’ aminy 144 000.
“Ary teny an-daniny roa amin’ny ony nisy hazon’aina mamoa voa roa ambin’ny folo samy hafa sady mamoa isam-bolana; ary ny ravin’ny hazo dia ho fanasitranana ny firenena maro.” (Apokalypsy 22:1, 2)
Noho izany, ny mponina eto an-tany dia hifaly noho ny fanasitranana vokatry ny fampiharana ny soron’i Kristy izay manaisotra ny fahotan’izy ireo sy manasitrana azy amin’ny aretiny sy ny tsy fahatanterahany. Mikasika ny fanapahan’ny Fanjakan’i Kristy, dia izao no voasoratra:
“Fa tsy maintsy manjaka Izy, mandra-panaony ny fahavalony rehetra ho eo ambanin’ny tongony. Ny fahafatesana no fahavalo farany horesena.” (I Korintiana 15:25, 26)
Ao amin’ny paradisa an-tany, dia ‘tsy hisy intsony’ ny fahafatesana vokatry ny fahotana nolovana avy amin’i Adama! — Apokalypsy 21:4.
NY FIAINANA AO AMIN’NY PARADISA IRAY TSY MISY FAHAFATESANA
11. Nahoana moa ny fahafatesana avy amin’ny aretina sy ny loza tampoka no hanjavona? (Isaia 25:8; Joba 33:25)
11 Hanjavona ireo loza mitondra fahafatesana toy ny homamiadana, ny aretim-po sy ny fahanterana, noho ny fampiharana ny sorom-panavotan’i Kristy. ‘Nefa ahoana ny amin’ny fahafatesana vokatry ny loza tampoka, hoy angamba ny fanontanian’ny olona iray?’ Na izany aza dia hanjavona, satria ny paradisa an-tany dia haka tahaka ny ara-panahy, izay tsy hahitana ny ‘ratsy’ na ny ‘fanimbana’. (Isaia 11:9) Ny toetra ara-panahin’ny olona dia hiaro azy tsy hanao zavatra hahatandindomin-doza azy tsy amin’ny antony. Ny olombelona lavorary dia tsy hanao fahadisoan-kevitra mihoatra noho ny osy dia izay mitsambikimbikina amim-pahakingana eny amin’ny harambato eo anoloan’ny hantsana iray. Amin’ny loza tsy ampoizina, ny anjelin’Andriamanitra koa dia tsy isalasalana fa hanolotra fiarovana ara-batana, sahala amin’ny fahazoany ‘didy’ amin’izao fotoana izao mba hiaro ny vahoakan’Andriamanitra ao amin’ny toeran’izy ireo misy filaminana ara-panahy. — Salamo 91:11.
12. Hatraiza moa no hahafeno olona ny tany? (Matio 22:30)
12 Mety hanontany ny olona iray hafa hoe, ‘Raha tsy maty ny olona, moa ve ny tany tsy ho feno tafahoatra?’ Eny, tamin’ny taona 1970, ny Fandaminan’ny Firenena Mikambana momba ny Sakafo sy ny Fambolena dia naminavina fa afaka namokatra sakafo ampy ho an’ny olona avy efapolo heny noho ny mponina eo aminy ny tany! Noho ny tsy fahatanterahan’ny fanapahan’olombelona ihany no mahamosarena ny vahoaka amin’izao fotoana izao. Afaka mamelona fianakavian’olombelona maro kokoa noho izay azony atao amin’izao fotoana izao ny tany, ary ao anatin’izany ny maty hatsangana rehetra. Ambonin’izany, ny baiko nomen’Andriamanitra ny olona tany am-boalohany dia ny ‘hameno ny tany sy hampanompo azy’, tsy ho tafahoatra anefa ka hiteraka fahasahiranana ny fiainana eo. Rehefa mangataka olona iray ianao hameno siny iray, dia tsy manantena ianao ny hamelany ny “robinet” handeha foana ambara-pamenon’ny rano ny trano manontolo. Toy izany koa, dia afaka manampo isika fa hofaranan’i Jehovah ny fitomboan’ny olombelona eto amin’ity tany ity amin’ny fotoana voatendriny sy amin’ny fombany manokana, ary tsy hitondra fahavoazana ho an’ny olombelona tonga tanteraka izany. — Genesisy 1:28.
13. Nahoana moa ny fiainana tsy hanam-pahataperana no tsy hahamonamonaina na oviana na oviana? (Salamo 145:16)
13 ‘Nefa moa ve tsy hahamonamonaina ny fiainana tsy hanam-pahataperana?’ hoy angamba ny hafa iray koa. Tsy mety ho izany na oviana na oviana! Rehefa miverina amin’ny fahatanterahana ny atidoha, sy matanjaka ao anatin’ny fahatanorana lalandava ny vatana, ny olombelona dia hanana hafanam-po handalina ny amin’ny zava-mahatalanjona noforonina tsy misy fetra. Hisy foana zava-baovao hofantarina, lalana vaovao ho an’ny talenta mamoron-javatra, fahafahan’ny tena manambara hevitra sy mizara amin’ny naman’ny tena ny fifaliana rehetra eto amin’ny tanintsika hahatalanjona. Ary aorian’ny fahataperan’ny ‘andro fitsaharan’i Jehovah’, moa ve tsy mety hamorona zava-baovao izy mba hampiravoravo ny zavaboariny?
14. Noho ny antony miavaka inona moa no hahatonga ny fiainana mandrakizay ho firavoravoana lalandava? (Salamo 37:3, 4)
14 Ambonin’ny zavatra rehetra, ho toy inona moa ny fahasambaran’ny olona noho ny fisotroany amin’ny loharanon’ny ‘fahendren’Andriamanitra maro samy hafa’ sy ny fandraisany tsy tapaka ireo harena be dia be avy amin’ny fitiavany sy ny fahendreny! (Efesiana 3:10) Jesosy, izay niaraka ela be tamin’i Jehovah talohan’ny naha-olombelona azy, dia nanambara hoe: “Izaho koa velona amin’ny Ray”. Amin’ny maha-fianakaviana sambatra sy nohavaozina azy eo ambanin’ny fiandrianan’Andriamanitra, ny olombelona an’arivo tapitrisany maro, anisan’izany ny mpanao ratsy fahiny, dia ho “velona” koa noho ny fandaharana mahatalanjon’i Jehovah. Ny ‘fandraisany fahalalana’ tsy tapaka mikasika Azy dia hilaza ho azy ireo firavoravoana feno amin’ny fiainana mandrakizay ho avy! — Jaona 6:57; 17:3.
[Sary, pejy 151]
Nomen’i Jesosy fanantenana ny ho velona ao amin’ny paradisa, na dia ny mpamono olona iray nomelohina ho faty aza
[Sary, pejy 157]
Ireo fandaharan’i Jehovah ho amin’ny fiainana mandrakizay dia sahala amin’ny ony mamelombelona eo afovoan’ny hazo feno voa