Toko Faha-25

Ny Masturbation — Tena Ratsy Ve?

“Manontany tena aho raha ratsy eo imason’Andriamanitra ny masturbation. Hisy fiantraikany ve izy io eo amin’ny fahasalamako ara-batana sy/na ara-tsaina amin’ny hoavy sy eo amin’ny fanambadiako, raha manambady aho?” — Melissa, 15 taona.

NAMELY tanora maro ireo eritreritra ireo. Ny antony? Miely patrana ny masturbation. Misy milaza fa eo amin’ny 97 isan-jaton’ny lehilahy sy maherin’ny 90 isan-jaton’ny vehivavy eo ho eo no efa nanao masturbation talohan’ny faha-21 taonany. Ambonin’izany, io fanao io dia nampangaina ho tompon’andraikitra ny amin’izao karazana aretina rehetra izao — manomboka amin’ny votsy sy ny hodi-maso mena ka hatramin’ny androbe sy ny aretin-tsaina.

Ireo mpanao fikarohana ara-pitsaboana amin’izao taonjato faha-20 izao dia tsy milaza zavatra mampahatahotra toy izany intsony. Raha ny marina aza, ireo dokotera amin’izao andro izao dia mino fa tsy misy aretina ara-batana ateraky ny masturbation. Manampy teny ireo mpanao fikarohana antsoina hoe William Masters sy Virginia Johnson fa “tsy misy porofo ara-pitsaboana voamarina fa ny masturbation, na manao ahoana na manao ahoana habetsahan’ny fanaovana azy, dia mitarika ho amin’ny aretin-tsaina”. Na dia izany aza, dia tena misy vokany ratsy hafa izy io! Ary ara-drariny raha velom-panahiana momba io fanao io ny tanora kristiana maro. “Rehefa nanaiky ho resin’ny [masturbation] aho, dia nihevitra fa nandiso fanantenana an’i Jehovah Andriamanitra”, hoy ny nosoratan’ny tanora iray. “Nanjary ketraka mafy aho indraindray.”

Inona marina no atao hoe masturbation? Tena ratsy ve izy io, ary nahoana no tanora maro be aoka izany no mahita fa fahazarana sarotra ialana izy io?

Ny antony maha-mora voan’izy io ireo tanora

Ny hoe masturbation dia fikasihana ny filahiana na ny fivaviana inian’ny tena atao mba hiteraka fahafinaretana toy ny amin’ny firaisana. Mandritra ny fivelaran’ny fahatanorana, dia manjary mahery ny faniriana momba ny lahy sy ny vavy. Misy hormonina mahery mivoaka ka misy fiantraikany eo amin’ireo taovam-pananahana. Amin’izay àry ny tanora iray dia manjary mahafantatra fa afaka miteraka fahatsapana mahafinaritra ireo taova ireo. Ary indraindray dia mety ho taitaitra eo amin’ny maha-lahy na ny maha-vavy azy ny tanora iray kanefa tsy mieritreritra momba izany akory.

Ohatra, ireo fihenjanana aterak’ireo fanahiana, tahotra na fahakiviana samihafa dia mety hisy fiantraikany eo amin’ny rafi-pitatitry ny ankizilahy iray ka hiteraka fahafinaretana eo amin’ny maha-lahy azy. Rehefa misy tsirinaina mihamiangona ao aminy, izany dia mety hamoha azy amin’ny alina noho ny fahatsapana fahataitairana eo amin’ny maha-lahy azy. Na mety hiteraka firarahan’ny tsirinaina mandritra ny alina izany, mazàna arahina nofy mifandray amin’ny maha-lahy sy ny maha-vavy. Tahaka izany koa, ny ankizivavy sasany dia mety hahatsiaro tena ho iharan’ny fahataitairana tsy nahy. Maro aminy no mahatsapa fitomboan’ny faniriana momba ny lahy sy ny vavy, aloha na aorian’ny fadimbolany.

Koa, raha nahatsapa izany fahataitairana izany ianao, dia tsy misy maninona akory ao aminao. Fihetsika ara-dalàna eo amin’ny vatana tanora iray izany. Izany fahatsapana izany, na dia mahery aoka izany aza, dia tsy mitovy amin’ny masturbation, satria tena tsy nahy amin’ny ankapobeny. Ary rehefa mihalehibe ianao, dia hihena tsikelikely ny hamafin’ireny fahatsapana vaovao ireny.

Ny fahalianana hahafanta-javatra sy ny maha-vaovao ireo fahatsapan-javatra ireo anefa, dia mitarika ny tanora sasany hinia hikasikasika, na hilalao an’ireo faritra maha-lahy na maha-vavy azy.

‘Tosika ara-tsaina’

Ny Baiboly dia milazalaza momba ny zatovolahy iray mahita vehivavy maloto fitondran-tena iray, izay manoroka azy ka manao hoe: “Andeha, (...) aoka ho feno fahafinaretana amin’ny fitiavana isika.” Inona no mitranga avy eo? “Ka dia nandeha nanaraka azy niaraka tamin’izay ilay zatovo, tahaka ny omby entina hovonoina”. (Ohabolana 7:7-22). Miharihary fa, matoa taitra ny fahamaimaizan’io ankizilahy io, dia tsy noho ny fiasan’ireo hormonina tao aminy fotsiny, fa noho izay hitany sy reny.

Mitovy amin’izany koa fa miaiky toy izao ny zatovolahy iray: ‘Ny tena fototry ny zava-nanahirana ahy rehetra momba ny masturbation dia izay nampidiriko tao an-tsaiko. Nijery fandaharana tamin’ny televiziona nisy fijangajangana aho ary indraindray dia nijery fandaharana tamin’ny televiziona câble izay nampiseho olona nitanjaka. Mahatsiravina aoka izany ireny sary ireny ka tsy mety afaka ao an-tsainao. Nitamberina tao an-tsaiko foana izy ireny ary dia nanampy ilay tosika ara-tsaina ilaina ho amin’ny fanaovana masturbation.’

Eny tokoa, matetika dia izay vakin’ny tena, jeren’ny tena na henoin’ny tena, ary koa izay resahin’ny tena na saintsainin’ny tena, no mitarika ho amin’ny masturbation. Nitsotra momba izany toy izao ny vehivavy 25 taona iray: “Toa toy ny tsy nahavita nanajanona ilay fahazarana aho. Kanefa zatra ny namaky tantaram-pitiavana aho, ka izany dia anisan’ny niteraka ilay zava-nanahirana.”

“Fampitonena”

Ny zavatra hitan’io zatovovavy io dia mampiharihary izay tsy isalasalana fa ny antony lehibe indrindra maha-mety ho sarotra aoka izany ny fialana amin’io fahazarana io. Manohy ny teniny toy izao izy: “Mazàna aho dia nanao masturbation mba hanesorana ny fanerena, ny fihenjanana na ny tebiteby. Ilay fahafinaretana vetivety tsapa amin’izay dia toy ilay zava-pisotro sotroin’ny alkaolika iray mba hampitonena ny hozany.”

Hoy ny nosoratan’ireo mpanao fikarohana antsoina hoe Suzanne sy Irving Sarnoff: “Ho an’ny olona sasany, ny masturbation dia mety ho tonga fahazarana itodihany mba hahazoana fampiononana isaky ny voateny mafy na matahotra momba ny zavatra iray izy ireo. Ny hafa kosa mety tsy hitodika ho amin’io fomba io afa-tsy indraindray ihany, rehefa ao anatin’ny fanerena ara-pihetseham-po mafy indrindra izy ireo.” Mazava ho azy fa ny hafa koa dia mety hampiasa io fahazarana io rehefa sosotra, ketraka, manirery na ao anatin’ny fihenjanana mafy; manjary “fampitonena” mba hanafoanana ireo zava-manahirana azy ireo izy io.

Inona no lazain’ny Baiboly?

Nanontany toy izao ny tanora iray: “Moa ve ny masturbation fahotana tsy ahazoana famelan-keloka?” Tsy voatonona ao amin’ny Baiboly mihitsy ny hoe masturbation.a Fanao teo amin’ny tontolo niteny grika tamin’ny andron’ny Baiboly io fahazarana io, ary teny grika maromaro no nampiasaina mba hilazana azy io. Kanefa tsy ampiasaina ao amin’ny Baiboly na dia ny iray amin’izany teny izany aza.

Koa satria tsy mandrara mivantana ny masturbation ny Baiboly, moa ve izany midika fa tsy manimba izy io? Tsy izany velively! Na dia tsy kilasina ho anisan’ny fahotana lehibe toy ny fijangajangana aza ny masturbation, dia tena fahazarana maloto mihitsy. (Efesiana 4:19). Ireo fotopoto-pitsipika ao amin’ny Tenin’Andriamanitra àry dia mampiseho fa “hahita soa” ianao raha manohitra mafy io fahazarana maloto io. — Isaia 48:17.

Fanairana ny “firehetana momba ny lahy sy ny vavy”

“Noho izany, dia vonoy ny rantsam-batanareo”, hoy ny fampirisihan’ny Baiboly, “raha ny amin’ny (...) firehetana momba ny lahy sy ny vavy”. (Kolosiana 3:5, NW ). Ny hoe “firehetana momba ny lahy sy ny vavy” dia tsy manondro ireo fahatsapana momba ny lahy sy ny vavy ara-dalàna, fa ny fahamaimaizana tsy azo fehezina. Izany “firehetana momba ny lahy sy ny vavy” izany àry dia afaka mitarika ny tena ho amin’ny fanaovan-javatra ratsy kokoa, toy ireo voalazan’i Paoly ao amin’ny Romana 1:26, 27.

Tsy ‘mamono’ ireo faniriana ireo ve anefa ny masturbation? Tsia, fa mifanohitra amin’izany kosa aza, araka ny fieken’ny tanora iray toy izao: “Rehefa manao masturbation ianao, dia mifantoka amin’ny faniriana ratsy ny sainao, ary izany dia tsy manao afa-tsy ny mampitombo ny firehetanao momba azy ireo.” Matetika dia ampiasaina mba hampitomboana ny fahafinaretana eo amin’ny maha-lahy sy ny maha-vavy ny nofinofy maloto iray. (Matio 5:27-28). Noho izany, rehefa omena ny toe-javatra mety ho amin’izany ny tena, dia mety ho latsaka mora foana ao anatin’ny fahalotoam-pitondran-tena. Izany no nitranga tamin’ny tanora iray, izay niaiky toy izao: “Nisy fotoana niheverako fa afaka nanamaivana ny fahakiviako ny masturbation, tsy nila ny niarahako tamim-behivavy. Kanefa nanjary namboly faniriana tsy azo notoherina ho amin’izany fiarahana izany aho.” Nijangajanga izy. Tsy mahagaga raha nampiharihary ny fandinihana iray natao nanerana an’i Etazonia fa ny ankamaroan’ireo zatovo izay nanao masturbation dia nijangajanga koa. Avo roa heny noho ny isan’ireo virjiny ny isan’izy ireo!

Mandoto ara-tsaina sy ara-pihetseham-po

Ny masturbation koa dia miteraka fomba fihevitra sasany izay manimba ara-tsaina. (Ampitahao amin’ny 2 Korintiana 11:3.) Rehefa manao masturbation ny olona iray dia revo amin’ireo zavatra tsapan’ny vatan’ny tenany ihany — tsy mifantoka afa-tsy amin’ny tenany. Ny maha-lahy sy ny maha-vavy dia manjary tafasaraka amin’ny fitiavana ka manjary mietry ho réflexe mampitony ny fihenjanana fotsiny. Ny fikasan’Andriamanitra anefa dia ny hanomezana fahafaham-po ireo faniriana momba ny lahy sy ny vavy amin’ny alalan’ny firaisana — ireo fanehoana fitiavana eo amin’ny lehilahy iray sy ny vadiny. — Ohabolana 5:15-19.

Ny olona iray manao masturbation koa dia mety hirona hihevitra ireo tsy lahy na tsy vavy tahaka azy ho toy ny zavatra momba ny maha-lahy sy ny maha-vavy ranofotsiny — fitaovana ho amin’ny fahazoany fahafaham-po eo amin’ny maha-lahy sy ny maha-vavy. Ireo fomba fihevitra ratsy ampianarin’ny masturbation àry dia mandoto ny ‘toe-tsain’ny’ tena, izany hoe ny fironana manapaka ny sain’ny tena. Amin’ny toe-javatra sasany, ireo zava-manahirana ateraky ny masturbation dia maharitra hatrany aorian’ny fampakaram-bady mihitsy aza! Noho ny antony tsara no ampirisihan’ny Tenin’Andriamanitra toy izao: “Ry malala, (...) aoka isika hanadio ny tenantsika ho afaka amin’ny fahalotoana rehetra, na amin’ny nofo na amin’ny [toe-tsaina, NW ]”. — 2 Korintiana 7:1.

Fomba fijery voalanjalanja momba ny fahatsiarovan-tena ho meloka

Tanora maro no manaiky ho resin’io fahazaran-dratsy io indraindray, na dia efa nahavita nandresy azy aza amin’ny ankapobeny. Soa ihany fa be famindram-po aoka izany Andriamanitra. “Fa Hianao, [Jehovah, NW ] ô, no tsara sady mamela heloka”, hoy ny mpanao salamo. (Salamo 86:5). Rehefa resin’ny masturbation ny Kristiana iray, matetika dia manamelo-tena ny fony. Ny Baiboly anefa dia manambara fa “Andriamanitra [dia] lehibe noho ny fontsika ka mahalala ny zavatra rehetra”. (1 Jaona 3:20). Mahita mihoatra noho ny fahotantsika Andriamanitra. Ny halehiben’ny fahalalany dia mahatonga azy hihaino amim-pangoraham-po ireo fitalahoantsika feno fahatsorana hahazo famelan-keloka. Nanoratra momba izany toy izao ny zatovovavy iray: “Nahatsiaro tena ho meloka ihany aho, kanefa fantatro fa Andriamanitra be fitiavana i Jehovah sady afaka mamaky ny ato am-poko ary mahalala ny ezaka rehetra ataoko sy ny fikasako rehetra, ka izany dia manampy ahy tsy hahatsiaro ho ketraka loatra rehefa resy aho indraindray.” Raha miady amin’ny faniriana hanao masturbation ianao, dia tsy azo inoana fa hijangajanga, izay ho fanaovana fahotana lehibe.

Manambara toy izao Ny Tilikambo Fiambenana (frantsay) tamin’ny 15 Aprily 1960: “[Mety] ho solafaka imbetsaka isika noho ny fahazaran-dratsy iray izay nanjary tafalentika lalina kokoa ao amin’ny fomba fiainantsika tsy araka ny nahafantarantsika azy. (...) Aza manary toky. Aza manatsoaka hevitra fa nanao ilay fahotana tsy ahazoana famelan-keloka ianao. Izany indrindra no tadiavin’i Satana hinoanao. Ny fahatsapanao alahelo sy fahasosorana amin’ny tenanao dia efa porofo fa tsy lasa lavitra loatra ianao. Aza sasatra mihitsy ny mitodika amim-panetren-tena sy amim-pahatsorana any amin’Andriamanitra, mba hangataka famelan-keloka sy fanadiovana ary fanampiana avy aminy. Manatòna azy toy ny ankizy iray manatona an-drainy rehefa mahita zava-manahirana, na impiry izany na impiry momba ny fahalemena iray ihany. I Jehovah dia ho faly hanome anao ilay fanampiana noho ny hatsaram-panahiny amin’izay tsy mendrika akory, ary raha tso-po ianao, dia hanome anao feon’ny fieritreretana voadio izy.”

Amin’ny fomba ahoana no mety hahazoana “feon’ny fieritreretana voadio”?

[Fanamarihana ambany pejy]

Fanontaniana Hiaraha-midinika

◻ Inona no atao hoe masturbation, ary inona avy no fomba fihevitra diso sasany fahita momba azy io?

◻ Nahoana ny tanora matetika no mahatsiaro faniriana momba ny lahy sy ny vavy mahery aoka izany? Heverinao ve fa ratsy izany?

◻ Zavatra inona avy no afaka manome tosika haniry hanao masturbation?

◻ Manimba ny tanora iray ve ny masturbation?

◻ Heverinao ve fa fahotana lehibe ny masturbation? Ahoana no fiheveran’i Jehovah ny tanora iray izay vonona ny hiady amin’izy io, na dia mety hahita zava-manahirana mba handresena azy io aza izy?

[Teny notsongaina, pejy 200]

Ny sasany dia mahatsapa ny faniriana hanao masturbation rehefa ao anatin’ny fanerena na ny fihenjanana, na rehefa manirery na ketraka

[Teny notsongaina, pejy 202]

‘Ny tena fototry ny zava-nanahirana ahy rehetra momba ny masturbation dia izay nampidiriko tao an-tsaiko’

[Teny notsongaina, pejy 204]

“Rehefa nanaiky ho resin’ny [masturbation] aho, dia nihevitra fa nandiso fanantenana an’i Jehovah Andriamanitra”

[Sary, pejy 198]

Na dia mety hiteraka fahatsiarovana ho meloka mafy aza ny masturbation, ny vavaka atao amim-pahatsorana mba hahazoana ny famelan’Andriamanitra sy ny ezaka mafy mba hanoherana azy io dia afaka manome feon’ny fieritreretana madio ho an’ny olona iray

[Sary, pejy 203]

Ireo sarimihetsika sy boky ary fampisehoana ao amin’ny televiziona momba ny firaisan’ny lahy sy ny vavy matetika no ‘tosika ara-tsaina’ ho amin’ny masturbation