Fizarana Faha-8
Mihamanatona ny Fahatanterahany ny Fikasan’Andriamanitra
1, 2. Ahoana no nanaovan’Andriamanitra fandaharana mba hamaranana ny fijaliana?
NITARIKA ny fianakavian’olombelona hikororosy nandritra ny taonjato maro ny fanapahan’ireo olona sy demonia mpikomy. Kanefa, Andriamanitra akory tsy mody tsy mahita ny fijaliantsika. Nandritra izany taonjato rehetra izany kosa izy dia nanao fandaharana mba hanafahana ny olombelona amin’ny fangejan’ny faharatsiana sy ny fijaliana.
2 Tamin’ny fotoan’ny fikomiana tany Edena, dia efa nanomboka nampiharihary ny fikasany hamorona fitondram-panjakana iray izay hanao ity tany ity ho fonenana ho an’ny olona, Andriamanitra. (Genesisy 3:15). Tatỳ aoriana, amin’ny maha-mpitondra tenin’Andriamanitra lehibe indrindra azy, i Jesosy dia nanao io fitondram-panjakan’Andriamanitra ho avy io ho ny loha hevitry ny fampianarany. Nilaza izy fa izy io no ho hany fanantenana ho an’ny taranak’olombelona. — Daniela 2:44; Matio 6:9, 10; 12:21.
3. Ahoana no niantsoan’i Jesosy ilay fitondram-panjakana ho an’ny tany ho avy, ary nahoana?
3 Niantso io fitondram-panjakan’Andriamanitra ho avy io hoe “ny fanjakan’ny lanitra” i Jesosy, satria hanapaka avy any an-danitra izy io. (Matio 4:17). Niantso azy io koa hoe “ny fanjakan’Andriamanitra” izy, satria Andriamanitra no Mpamorona azy. (Lioka 17:20). Nandritra ny taonjato maro, Andriamanitra dia nanome tsindrimandry ireo mpitantsorany mba handray an-tsoratra faminaniana momba ireo izay hahaforona izany fitondram-panjakana izany sy izay hotanterahin’izy io.
Ilay Mpanjaka vaovaon’ny tany
4, 5. Ahoana no nampisehoan’Andriamanitra fa i Jesosy no ilay Mpanjaka ankasitrahany?
4 I Jesosy, efa ho roa arivo taona lasa izay, no nanatanteraka ireo faminaniana maro be momba ilay ho Mpanjaka ao amin’ny Fanjakan’Andriamanitra. Niseho ho ilay nofidin’Andriamanitra mba ho Mpanapaka ao amin’izany fitondram-panjakana any an-danitra eo amin’ny olombelona izany, izy. Ary taorian’ny fahafatesan’i Jesosy, Andriamanitra dia nanangana azy ho amin’ny fiainana any an-danitra ho zavaboary ara-panahy mahery sy tsy mety maty. Nisy vavolombelona maro nahita maso ny nitsanganany tamin’ny maty. — Asan’ny Apostoly 4:10; 9:1-9; Romana 1:1-4; 1 Korintiana 15:3-8.
5 Avy eo i Jesosy dia ‘nipetraka teo an-tanana ankavanan’Andriamanitra’. (Hebreo 10:12). Teo izy dia niandry ny fotoana hanomezan’Andriamanitra azy ny fahefana hanao zavatra amin’ny maha-Mpanjaka ao amin’ny Fanjakan’Andriamanitra any an-danitra. Izany dia nanatanteraka ny faminaniana ao amin’ny Salamo 110:1, izay ilazan’Andriamanitra aminy hoe: “Mipetraha eo an-tànako ankavanana ambara-panaoko ny fahavalonao ho fitoeran-tongotrao.”
6. Ahoana no nampisehoan’i Jesosy fa nahafeno ny fepetra mba ho Mpanjaka ao amin’ny Fanjakan’Andriamanitra izy?
6 Fony teto an-tany i Jesosy dia nampiseho fa nahafeno ny fepetra mba hahazo izany toerana izany ny tenany. Na dia teo aza ny fanenjehana, dia nifidy ny hihazona ny tsy fivadihany teo anatrehan’Andriamanitra izy. Tamin’ny fanaovana izany, dia nampiseho izy fa nandainga i Satana rehefa nilaza fa tsy hisy olombelona na dia iray aza hahatoky eo anatrehan’Andriamanitra ao anatin’ny fitsapana. I Jesosy, lehilahy tanteraka, ilay ‘Adama faharoa’, dia nampiseho fa tsy diso Andriamanitra tamin’ny famoronana olombelona tanteraka. — 1 Korintiana 15:22, 45; Matio 4:1-11.
7, 8. Soa inona avy no nataon’i Jesosy fony teto an-tany, ary inona no nasehony tamin’izany?
7 Mpanapaka iza no nahavita soa betsaka toy ny vitan’i Jesosy tao anatin’ireo taona vitsy naharetan’ny fanompoany? Nahazo hery avy tamin’ny fanahy masin’Andriamanitra i Jesosy ka nanasitrana ireo marary, ireo kilemaina, ireo jamba, ireo marenina, ireo tsy afa-niteny. Nanangana ireo maty mihitsy aza izy! Nasehony tamin’ny ambaratonga kely izay hataony ho an’ny taranak’olombelona amin’ny ambaratonga maneran-tany, rehefa hahazo ny fahefana ao amin’ilay Fanjakana izy. — Matio 15:30, 31; Lioka 7:11-16.
8 Nanao soa be dia be aoka izany i Jesosy fony teto an-tany, hany ka nilaza toy izao i Jaona mpianany: “Ary misy zavatra maro hafa koa izay nataon’i Jesosy, ka raha voasoratra tsirairay avokoa izany rehetra izany, ataoko fa izao tontolo izao aza dia tsy omby ny boky voasoratra.” — Jaona 21:25.a
9. Nahoana ireo olona tso-po no nirohotra nankany amin’i Jesosy?
9 Tsara fanahy sy namindra fo i Jesosy, ary nanana fitiavana lehibe ny olona. Nanampy ny mahantra sy ny nampahorina izy, kanefa tsy nanilika ireo nanan-karena na ambony toerana. Ireo olona tso-po dia nanaiky ny fanasan’i Jesosy tamim-pitiavana hoe: “Manatòna ahy, ianareo rehetra izay miasa fatratra sy mavesatra entana, fa izaho no hamelombelona anareo. Ento ny ziogako ary mianara amiko, fa malemy fanahy sy tsy miavona am-po aho, dia hahita famelombelomana ho an’ny fanahinareo ianareo. Fa feno hatsaram-panahy ny ziogako ary maivana ny entako.” (Matio 11:28-30, NW). Nirohotra nankany aminy ireo olona natahotra an’Andriamanitra ary niandry tamim-panantenana ny fanapahany. — Jaona 12:19.
Ireo hiara-manapaka aminy
10, 11. Iza no hiara-manapaka ny tany amin’i Jesosy?
10 Tsy misy hafa amin’ireo fitondram-panjakan’olombelona manana mpitantana maromaro miara-miasa, dia toy izany koa ny Fanjakan’Andriamanitra any an-danitra. Misy olon-kafa koa natao hiara-manapaka ny tany amin’i Jesosy, satria nampanantena an’ireo niara-niasa akaiky taminy i Jesosy fa ho mpanjaka hiara-manapaka aminy eo amin’ny taranak’olombelona, izy ireo. — Jaona 14:2, 3; Apokalypsy 5:10; 20:6.
11 Noho izany, miaraka amin’i Jesosy, dia hisy olombelona voafetra ny isany, izay hatsangana amin’ny maty koa ho amin’ny fiainana any an-danitra. Mahaforona ny Fanjakan’Andriamanitra izay hitondra fitahiana mandrakizay ho an’ny taranak’olombelona, izy ireo. (2 Korintiana 4:14; Apokalypsy 14:1-3). Nandritra izay fotoana rehetra izay àry i Jehovah dia nametraka ny fototra ho an’ny fanapahana iray izay hitondra fitahiana mandrakizay ho an’ny fianakavian’olombelona.
Hifarana ny fanapahana tsy miankina amin’Andriamanitra
12, 13. Vonona ny hanao inona izao ny Fanjakan’Andriamanitra?
12 Tamin’izao taonjato izao, Andriamanitra dia nandray anjara mivantana tamin’ireo raharahan’ny tany. Araka ny hovelabelarin’ny fizarana faha-9 amin’ity bokikely ity, ny faminaniana ao amin’ny Baiboly dia mampiseho fa naorina tamin’ny 1914 ny Fanjakan’Andriamanitra eo ambany fitarihan’i Kristy, ary vonona ankehitriny mba hanorotoro ny fandehan-javatra manontolon’i Satana. Vonona ny ‘hanapaka eo amin’ny fahavalon’i Kristy’ izany Fanjakana izany. — Salamo 110:2.
13 Momba izany, dia milaza toy izao ny faminaniana ao amin’ny Daniela 2:44: “Amin’ny andron’ireo mpanjaka ireo [misy ankehitriny] Andriamanitry ny lanitra dia hanorina fanjakana [any an-danitra] izay tsy ho rava mandrakizay; ary izany fanjakana izany tsy havela ho an’olon-kafa [ka tsy havela hisy intsony mihitsy ny fanapahan’olombelona], fa ireo fanjakana rehetra ireo dia hotorotoroiny [ny Fanjakan’Andriamanitra] sy holevoniny, fa izy kosa hitoetra mandrakizay.”
14. Inona avy ireo soa sasantsasany ho azo ho vokatry ny fahataperan’ny fanapahan’olombelona?
14 Rehefa ho voaesotra avokoa ny fanapahana rehetra tsy miankina amin’Andriamanitra, dia hanapaka ny tany amin’ny fomba feno ny Fanjakan’Andriamanitra. Ary satria manapaka avy any an-danitra ilay Fanjakana, dia tsy ho azon’ny olombelona simbana na oviana na oviana. Ny hery manapaka dia ho eo amin’izay nisy azy tany am-boalohany, izany hoe any an-danitra, eo amin’Andriamanitra. Ary satria hifehy ny tany rehetra ny fanapahan’Andriamanitra, dia tsy hisy intsony ho voafitaky ny fivavahan-diso na ny filôzôfian’olombelona sy tsangan-kevitra ara-politika tsy mahafapo. Tsy hisy na dia iray amin’ireo zavatra ireo aza havela hisy. — Matio 7:15-23; Apokalypsy, toko faha-17 ka hatramin’ny faha-19.
[Fanamarihana ambany pejy]
a Mba hahazoana fanazavana ny amin’ny fiainana manontolon’i Jesosy, dia jereo ny boky hoe Ilay lehilahy niavaka indrindra teto an-tany, natontan’ny Fikambanana Watchtower, tamin’ny 1991.
[Sary, pejy 18]
Fony teto an-tany i Jesosy, dia nanasitrana ireo marary ary nanangana ireo maty mba hampisehoana izay hataony ao amin’ny tontolo vaovao
[Sary, pejy 19]
Ny Fanjakan’Andriamanitra any an-danitra dia hanorotoro tsy hisy intsony ireo karazam-panapahana tsy miankina aminy rehetra