Fizarana Faha-10
Ilay Tontolo Vaovao Mahatalanjona Hataon’Andriamanitra
1, 2. Inona no hitranga aorian’ny ady fanadiovan’Andriamanitra amin’ny Haramagedona?
AORIAN’NY ady fanadiovan’Andriamanitra amin’ny Haramagedona, dia ahoana? Amin’izay dia hanomboka ny fe-potoana vaovao be voninahitra iray. Ireo ho tafita velona amin’ny Haramagedona, izay efa nanaporofo ny fahatokiana teo anatrehan’ny fanapahan’Andriamanitra, dia hampidirina ho ao amin’ny tontolo vaovao. Fe-potoana mampientana ny fo eo amin’ny tantara toy inona moa izany, rehefa hirotsaka ireo soa mahatalanjona avy amin’Andriamanitra ho an’ny fianakavian’olombelona!
2 Eo ambany fitarihan’ny Fanjakan’Andriamanitra, dia hanomboka hanamboatra paradisa iray ireo ho tafita velona. Ireo tanjaka rehetra hananany dia hatokany hikatsahana zava-kendrena tsy misy fitiavan-tena izay hitondra soa ho an’ireo ho velona rehetra amin’izay. Hanomboka hiova ho fonenana kanto, miadana ary mahafapo ho an’ny taranak’olombelona, ny tany.
Hisolo toerana ny faharatsiana ny fahamarinana
3. Fanamaivanana avy hatrany inona no ho tsapa raha vao vita ny Haramagedona?
3 Izany rehetra izany dia hety noho ny fandringanana ny tontolon’i Satana. Tsy hisy fivavahan-diso, rafitra ara-tsôsialy na fitondram-panjakana hampisaraka intsony. Tsy hisy fampielezan-kevitra avy amin’i Satana hamitaka ny olona intsony; ho efa rava niaraka tamin’ny fandehan-javatr’i Satana avokoa ireo fandaharana rehetra namokatra izany. Eritrereto fotsiny: hesorina tanteraka ny rivo-piainana manapoizina manontolon’ny tontolon’i Satana! Ho fanamaivanana toy inona re izany!
4. Lazalazao ny fiovana hisy eo amin’ny fampianarana.
4 Amin’izay, dia hisolo toerana ireo hevitra manimban’ny fanapahan’olombelona ny fampianarana mampahery avy amin’Andriamanitra. “Ny zanakao rehetra dia ho samy efa nampianarin’i Jehovah.” (Isaia 54:13). Noho io fampianarana mahasoa ho azo mandritra ireo taona hifandimby io, “ny tany [dia] ho henika ny fahalalana an’i Jehovah, tahaka ny anaronan’ny rano ny fanambanin’ny ranomasina.” (Isaia 11:9). Tsy hianatra ny ratsy intsony ny olona, fa ‘hianatra fahamarinana ny mponina amin’izao tontolo izao’. (Isaia 26:9). Hevitra sy fanaovan-javatra mampahery no hampiavaka ny fomba fanaovan’ny olona zavatra. — Asan’ny Apostoly 17:31; Filipiana 4:8.
5. Inona no hiafaran’ny faharatsiana sy ny olona ratsy rehetra?
5 Araka izany, dia tsy hisy vonoana olona, herisetra, fisavihana, halatra na heloka bevava hafa intsony. Tsy hisy na dia iray aza ho voatery hijaly noho ny asa ratsy ataon’ny hafa. Milaza toy izao ny Ohabolana 10:30: “Ny marina tsy hangozohozo mandrakizay; fa ny ratsy fanahy tsy honina amin’ny tany.”
Haverina amin’ny laoniny ny fahasalamana tanteraka
6, 7. a) Zava-misy sarotra ekena inona no hofaranan’ny fanapahan’ilay Fanjakana? b) Ahoana no nampisehoan’i Jesosy izany fony izy teto an-tany?
6 Ao amin’ny tontolo vaovao, dia hisy fandravana ireo voka-dratsy rehetra naterak’ilay fikomiana voalohany. Ohatra, ny fanapahan’ilay Fanjakana dia hanafoana ny aretina sy ny fahanterana. Amin’izao andro izao, na dia manana fahasalamana tsara aza ianao, ny zava-misy sarotra ekena dia ny hoe mihantitra ianao, manjavona ireo masonao, mihasimba ireo nifinao, mihalalodalovana ianao, miketrona ny hoditrao, simba ireo taova ao anatinao, mandra-pahafatinao amin’ny farany.
7 Kanefa, ireo vokatra mahaketraka nolovantsika avy amin’ireo ray aman-drenintsika voalohany ireo, tsy ho ela dia ho anisan’ny lasa. Tadidinao ve izay nasehon’i Jesosy momba ny fahasalamana fony izy teto an-tany? Mitantara toy izao ny Baiboly: “Nisy vahoaka betsaka nankeo aminy nitondra ny mandringa, ny jamba, ny moana, ny kilemaina, ary ny maro hafa koa, ka nametraka azy teo akaikin’ny tongotr’i Jesosy; dia nahasitrana azy Izy; ka dia talanjona ny vahoaka, raha nahita ny moana miteny, ny kilemaina sitrana, ny mandringa afaka, ary ny jamba mahiratra.” — Matio 15:30, 31.
8, 9. Lazalazao ny fahasambarana ho tonga ao amin’ny tontolo vaovao rehefa haverina amin’ny laoniny ny fahasalamana tanteraka.
8 Fahasambarana lehibe toy inona moa no ho tonga ao amin’ny tontolo vaovao rehefa ho foana avokoa ireo rofintsika rehetra! Tsy hampahory antsika intsony mihitsy ny fijaliana ateraky ny tsy fahasalamana. “Tsy hisy amin’ny mponina ao hilaza hoe: Marary aho; ny olona izay mitoetra ao dia voavela heloka.” “Dia hampahiratina ny mason’ny jamba, ary hampahaladina ny sofin’ny marenina. Dia hitsambikina tahaka ny diera ny mandringa, ary hihoby ny lelan’ny moana; fa hiboiboika any an-efitra ny rano, ary hisy renirano any amin’ny tany karankaina.” — Isaia 33:24; 35:5, 6.
9 Tsy hampientana ny fo ve ny hoe hifoha isa-maraina ka hahatsapa fa tonga lafatra ny fahasalamanao? Tsy hahafaly ireo olona be taona ve ny hahafantatra fa naverina taminy ny tanjany fony tanora ary koa fa hahatratra ny fahatanterahana izy? Ny fampanantenan’ny Baiboly dia izao: “Dia ho tsara noho ny an’ny tanora ny nofony, hody ho toy ny tamin’ny andro nahatanorany izy.” (Joba 33:25). Ho haravoana toy inona moa ny hoe hanary ireo solomaso, ireo fitaovana fanampiana ho an’ny sofina, ireo hazo fitehenana, ireo seza mikorisa ary ireo fanafody! Tsy hilaina intsony mihitsy ireo trano fitsaboana, mpitsabo ary mpitsabo nify.
10. Inona no hiafaran’ny fahafatesana?
10 Tsy haniry ho faty ny olona manana fahasalamana feno tanjaka toy izany. Ary tsy ho voatery ho faty koa izy ireo, satria tsy hogejain’ny tsy fahatanterahana sy ny fahafatesana intsony ny taranak’olombelona. I Kristy dia “tsy maintsy manjaka (...), mandra-panaony ny fahavalony rehetra ho eo ambanin’ny tongony. Ny fahafatesana no fahavalo farany horesena.” “Ny fanomezana omen’Andriamanitra dia ny fiainana mandrakizay.” — 1 Korintiana 15:25, 26; Romana 6:23, NW; jereo koa Isaia 25:8.
11. Ahoana no amintinan’ny Apokalypsy ireo soa hoentin’ny tontolo vaovao?
11 Mamintina ireo soa hirotsaka noho ny fiahian’Andriamanitra ny fianakavian’olombelona ao amin’ny Paradisa, ny boky farany ao amin’ny Baiboly ka manao hoe: “Ary hofafany [Andriamanitra] ny ranomaso rehetra amin’ny masony, ary tsy hisy fahafatesana intsony, sady tsy hisy alahelo, na fitarainana, na fanaintainana; fa efa lasa ny zavatra taloha.” — Apokalypsy 21:3, 4.
Miverina ireo maty
12. Ahoana no nampisehoan’i Jesosy ny fahefana hanangana amin’ny maty nomen’Andriamanitra azy?
12 Nanao mihoatra noho ny nanasitrana ny marary sy ny mandringa i Jesosy. Namerina ireo olona avy tany am-pasana koa izy. Nampiseho tamin’izany ny fahefana mahatalanjona hanangana amin’ny maty nomen’Andriamanitra azy, izy. Tsaroanao ve ilay fotoana nankanesan’i Jesosy tany amin’ny tranon’ny lehilahy iray izay vao maty ny zanany vavy? Hoy i Jesosy tamin’ilay ankizivavy kely maty: “Ry zazavavy, hoy Izaho aminao: Mitsangàna.” Inona no nitranga? “Dia nitsangana niaraka tamin’izay razazavavy ka afa-nandeha.” Raha nahita izany ny olona teo dia “noentanin’ny haravoana aoka izany”. Saika tsy nahafehy ny fampisehoana ny hasambarany izy ireo! — Marka 5:41, 42, NW; jereo koa Lioka 7:11-16; Jaona 11:1-45.
13. Karazan’olona iza avy no hatsangana amin’ny maty?
13 Ao amin’ny tontolo vaovao, dia “hisy fitsanganan’ny marina sy ny tsy marina”. (Asan’ny Apostoly 24:15, NW). Amin’izany fotoana izany, i Jesosy dia hampiasa ny fahefana hanangana ny maty nomen’Andriamanitra azy, satria, araka ny nolazainy, “Izaho no fananganana ny maty sy fiainana; izay mino Ahy, na dia maty aza, dia ho velona indray.” (Jaona 11:25). Nilaza toy izao koa izy: “Handre ny feony [ny an’i Jesosy] ny olona rehetra any am-pasam-pahatsiarovana [ao amin’ny fitadidian’Andriamanitra] ; dia hivoaka.” — Jaona 5:28, 29, NW.
14. Satria tsy hisy intsony ny fahafatesana, zavatra inona avy moa no hofaranana?
14 Ho lehibe ny fifaliana haneran-tany rehefa hisy antokon’olona maty hifanarakaraka hiverina amin’ny fiainana mba hiaraka amin’ireo olon-tiany indray! Tsy hisy filazana manjo intsony ao amin’ireo gazety ka hitondra alahelo ho an’ireo ho tafita velona. Ny mifanohitra amin’izany mihitsy kosa aza no hitranga: fampandrenesana ny amin’ireo vao ho tafatsangana amin’ny maty ka hitondra fifaliana ho an’ireo tia azy. Tsy hisy fandevenana, na toerana sy fitaovana fandoroana faty, na fasana intsony!
Tontolo tena hiadana iray
15. Ahoana no hanatanterahana amin’ny heviny feno ny faminanian’i Mika?
15 Hisy ny tena fiadanana amin’ny faritra rehetra amin’ny fiainana. Ho anisan’ny lasa ny ady sy ireo mpampirisika ny ady ary ny fanamboarana fiadiana. Nahoana? Satria hanjavona ireo fikatsahana tombontsoa ara-pirenena, ara-poko sy ara-pirazanana mampisaraka. Amin’izay, amin’ny heviny feno, izy ireo dia “tsy hanainga sabatra hifamely; na hianatra ady intsony”. — Mika 4:3.
16. Ahoana no hanaovan’Andriamanitra izay tsy hisian’ny ady intsony?
16 Toa mety hahagaga izany raha heverina ny tantaran’ny olombelona voamariky ny fandatsahan-dra tamin’ny ady tsy an-kijanona. Nisy anefa ny zavatra toy izany satria teo ambany fanapahan’ny olombelona sy ireo demonia ny taranak’olombelona. Ao amin’ny tontolo vaovao, eo ambany fanapahan’ilay Fanjakana, dia izao no hitranga: “Avia, jereo ny asan’i Jehovah (...) mampitsahatra ady hatramin’ny faran’ny tany izy; manapaka ny tsipìka sy manito [“manapotika”, NW] ny lefona Izy ary mandoro ny sariety [fampiasa amin’ny ady] amin’ny afo.” — Salamo 46:8, 9.
17, 18. Ao amin’ny tontolo vaovao, hanao ahoana ny fifandraisana hisy eo amin’ny olona sy ny biby?
17 Hihavana koa ny olona sy ny biby, toy ny tany Edena. (Genesisy 1:28; 2:19). Hoy Andriamanitra hoe: “Izaho dia hanao fanekena ho azy amin’ny bibi-dia sy amin’ny voro-manidina ary amin’ny biby mandady sy mikisaka amin’ny tany; (...) dia hataoko mandry fahizay izy.” — Hosea 2:20.
18 Hiitatra hatraiza izany fihavanana izany? “Ny amboadia hiara-mitoetra amin’ny zanak’ondry; ny leoparda hiara-mandry amin’ny zanak’osy; ary ny zanak’omby sy ny liona tanora sy ny ombikely mifahy hiray toerana, ary ny zazakely no hiroaka azy.” Tsy ho fandrahonana ho an’ny olona na ho an’ny biby hafa intsony mihitsy ireo biby. Na dia ny liona aza dia “hihina-mololo tahaka ny omby”. — Isaia 11:6-9; 65:25.
Hovana ho paradisa ny tany
19. Hovana ho inona ny tany?
19 Hiova ho fonenana paradisa ho an’ny taranak’olombelona ny tany manontolo. Izany no antony nahafahan’i Jesosy nampanantena toy izao tamin’ny lehilahy iray nino azy: “Hiaraka amiko ao amin’ny Paradisa ianao.” Milaza ny Baiboly hoe: “Ravoravo ny efitra sy ny tany karankaina, ary ny tani-hay mifaly sy mamony tahaka ny lilia. (...) fa hiboiboika any an-efitra ny rano, ary hisy renirano any amin’ny tany karankaina.” — Lioka 23:43, NW; Isaia 35:1, 6.
20. Nahoana ny hanoanana no tsy hampahory ny taranak’olombelona intsony mihitsy?
20 Eo ambany Fanjakan’Andriamanitra, dia tsy hampahory ny olona an-tapitrisany maro intsony mihitsy ny hanoanana. “Hahavoka-bary betsaka ny tany, na dia any an-tampon’ny tendrombohitra aza.” “Hamoa ny hazo any an-tsaha, sady hahavokatra ny tany, ary handry fahizay amin’ny tany izy.” — Salamo 72:16; Ezekiela 34:27.
21. Inona no hiafaran’ny tsy fananana fialofana, ireo faritanàna feno mponina mahantra ary ireo faritra onenana ratsy?
21 Tsy hisy fahantrana, na olona tsy manam-pialofana, na faritanàna feno mponina mahantra, na faritra onenana hanjakan’ny heloka bevava, intsony. “Hanao trano ny olona ka hitoetra ao; ary hanao tanimboaloboka ny olona ka hihinana ny vokatra aminy. Tsy hanao trano hitoeran’olon-kafa izy, na hamboly zavatra hohanin’olon-kafa.” “Samy hipetraka eny ambanin’ny voalobony sy ny aviaviny izy, ary tsy hisy hanaitaitra azy; fa ny vavan’i Jehovah, Tompon’ny maro, no efa niteny.” — Isaia 65:21, 22; Mika 4:4.
22. Ahoana no ilazalazan’ny Baiboly ireo fitahiana hoentin’ny fanapahan’Andriamanitra?
22 Homena ireo fitahiana rehetra ireo sy ny hafa koa ny olombelona ao amin’ny Paradisa. Milaza toy izao ny Salamo 145:16: “Manokatra ny tànanao Hianao [Andriamanitra] ka mahavoky soa ny zava-miaina rehetra.” Tsy mahagaga raha manambara toy izao ny faminaniana ao amin’ny Baiboly: “Ny mpandefitra (...) no handova ny tany ka hiravoravo amin’ny haben’ny fiadanana. (...) Ny marina handova ny tany ka honina eo aminy mandrakizay.” — Salamo 37:11, 29.
Ny fandravana ny lasa
23. Ahoana no hanafoanan’ny Fanjakan’Andriamanitra ny fijaliana rehetra nihatra tamintsika?
23 Handrava ny fanimbana rehetra natao tamin’ny fianakavian’olombelona nandritra ireo enina arivo taona lasa ny fanapahan’ny Fanjakan’Andriamanitra. Ireo fifaliana ho azo amin’izany fotoana izany dia hihoatra lavitra noho izay fijaliana rehetra hitan’ny olona. Tsy ho voakorontan’ny fahatsiarovana ratsy ny amin’ny fijaliana teo aloha ny fiainana. Ireo hevitra sy fanaovan-javatra mampahery, izay ho fiainan’ny olona isan’andro, dia hamafa tsikelikely ireo fahatsiarovana mampanaintaina.
24, 25. a) Inona no nolazain’i Isaia mialoha fa hitranga? b) Nahoana isika no afaka matoky fa hanjavona ireo fahatsiarovana ny amin’ny fijaliana tamin’ny lasa?
24 Manambara toy izao ilay Andriamanitra feno fiahiana: “Indro, Izaho mahary lanitra vaovao [fitondram-panjakana any an-danitra hanapaka ny taranak’olombelona] sy tany vaovao [fitambaran’olona marina]; ka dia tsy hotsarovana intsony ny taloha, na ho mby ao an-tsaina akory aza. Fa mifalia kosa sy miravoravoa mandrakizay, satria mahary izany Aho.” “Miadana ka mandry fahizay ny tany rehetra; velominy ao ny hoby.” — Isaia 14:7; 65:17, 18.
25 Amin’ny alalan’ny Fanjakany àry, Andriamanitra dia hamadika tanteraka ny tarehin-javatra ratsy izay efa naharitra ela be aoka izany. Mandritra ny mandrakizay, izy dia hampiseho ny fiahiany lehibe antsika amin’ny fandrotsahana fitahiana tondraka izay hanonitra lavitra ny ratra rehetra nanjo antsika tamin’ny lasa. Ireo zava-tsarotra hitantsika teo aloha dia hanjavona ho toy ny fahatsiarovana manjavozavo amin’izay, raha hieritreritra ny hitadidy azy ireny akory aza isika.
26. Nahoana Andriamanitra no hanonitra ny fijaliantsika rehetra tamin’ny lasa?
26 Izany no ho fomba hanoneran’Andriamanitra ny fijaliana nety ho niaretantsika teo amin’izao tontolo izao. Fantany fa tsy fahadisoantsika raha teraka tsy tanteraka isika, satria nandova tsy fahatanterahana avy tamin’ireo ray aman-drenintsika voalohany isika. Tsy fahadisoantsika raha teraka tao amin’ny tontolon’i Satana isika, satria raha nahatoky i Adama sy i Eva, dia ho teraka tao amin’ny paradisa kosa isika. Amim-pamindrampo lehibe àry, Andriamanitra dia hanonitra lavitra ny lasa ratsy izay nampiharina tamintsika.
27. Faminaniana inona avy no hahita fahatanterahana mahatalanjona ao amin’ny tontolo vaovao?
27 Ao amin’ny tontolo vaovao, ny taranak’olombelona dia hahita ny tena fahafahana nolazaina mialoha ao amin’ny Romana 8:21, 22 manao hoe: “Izao zavatra ary rehetra izao aza dia hovotsorana amin’ny fahandevozana, dia ny fahalòvana, ho amin’ny fahafahana izay momba ny voninahitr’ireo zanak’Andriamanitra. Fa fantatsika fa izao zavatra ary rehetra izao dia miara-misento sy miara-marary toy izay efa hiteraka mandraka ankehitriny.” Amin’izay, ny olona dia hahita ny fahatanterahana fenon’ilay vavaka manao hoe: “Ho tonga anie ny fanjakanao. Hatao anie ny sitraponao etỳ an-tany tahaka ny any an-danitra.” (Matio 6:10). Hanome taratry ny toe-piainana any an-danitra ny toe-piainana mahatalanjona eto amin’ny tany Paradisa.
[Sary, pejy 23]
Ao amin’ny tontolo vaovao, dia hiverina hahazo ny tanjaky ny fahatanorana indray ireo olona be taona
[Sary, pejy 24]
Hofoanana ny aretina sy kilema rehetra ao amin’ny tontolo vaovao
[Sary, pejy 25]
Ao amin’ny tontolo vaovao, ireo maty dia hatsangana ho amin’ny fiainana indray
[Sary, pejy 26]
‘Tsy hianatra ady intsony izy ireo’
[Sary, pejy 27]
Hihavana tanteraka ny olombelona sy ny biby ao amin’ny Paradisa
[Sary, pejy 27]
‘Hanokatra ny tanany Andriamanitra ka hahavoky soa ny zava-miaina rehetra’
[Sary, pejy 28]
Ny Fanjakan’Andriamanitra dia hanao mihoatra noho ny fanonerana ny fijaliana rehetra niaretantsika