Lesona Faha-12

Fanajana ny Aina sy ny Ra

Ahoana no tokony hiheverantsika ny aina? (1) ny fanalana zaza? (1)

Ahoana no ampisehoan’ny Kristianina fa mitandrina foana izy mba tsy hisian’ny loza? (2)

Ratsy ve ny mamono biby? (3)

Milazà fanao tsy manaja ny aina. (4)

Inona no lalàn’Andriamanitra momba ny ra? (5)

Tafiditra amin’izany ve ny fampidiran-dra? (6)

1. I Jehovah no Loharanon’ny aina. Avy tamin’Andriamanitra no nahazoan’ny zava-miaina rehetra ny ainy. (Salamo 36:9) Masina amin’Andriamanitra ny aina. Na dia ny ain’ny zaza mbola any an-kibon-dreniny aza dia sarobidy amin’i Jehovah. Ratsy eo imason’Andriamanitra ny minia mamono izany zazakely vao miforona izany.—Eksodosy 21:22, 23; Salamo 127:3.

2. Mitandrina foana ny tena Kristianina mba tsy hisian’ny loza. Ataony azo antoka fa tsy mampidi-doza ny fiarany sy ny tranony. (Deoteronomia 22:8) Tsy misetra loza tsy amin’antony, mba hitadiavana fahafinaretana na fahataitairana fotsiny, ny mpanompon’Andriamanitra. Koa tsy manao fanatanjahan-tena mahery setra natao handratrana ny hafa, àry izy ireo. Tsy manao fialam-boly misy herisetra izy ireo.—Salamo 11:5; Jaona 13:35.

3. Masina amin’ny Mpamorona koa ny ain’ny biby. Mahazo mamono biby ny Kristianina mba hatao sakafo sy fitafiana, na mba hiarovan-tena amin’ny aretina sy ny loza. (Genesisy 3:21; 9:3; Eksodosy 21:28) Ratsy anefa ny mampijaly biby na mamono azy noho ny fanatanjahan-tena na noho ny fahafinaretana fotsiny.—Ohabolana 12:10.

4. Tsy natao ho an’ny Kristianina ny sigara sy ny paraky ary koa ny ravina katy sy ny zava-mahadomelina ho fahafinaretana. Ratsy ireo satria 1) manandevo antsika, sy 2) manimba ny vatantsika, ary 3) maloto. (Romana 6:19; 12:1; 2 Korintiana 7:1) Mety ho tena sarotra ialana ireo fahazarana ireo. Tsy maintsy manao izany anefa isika mba hampifaliana an’i Jehovah.

5. Masina eo imason’Andriamanitra koa ny ra. Milaza Andriamanitra fa ao amin’ny ra no misy ny aina. Koa ratsy àry ny mihinana ra. Ratsy koa ny mihinana henam-biby tsy nalatsa-dra tsara. Tsy azo hanina ny biby raha nokendaina, na maty tao anaty fandrika. Raha voalefona na voatifitra izy, dia tsy maintsy alatsa-dra haingana, raha tiana hohanina.—Genesisy 9:3, 4; Levitikosy 17:13, 14; Asan’ny Apostoly 15:28, 29.

6. Ratsy ve ny manaiky hampidiran-dra? Tadidio fa takin’i Jehovah ny hifadiantsika ny ra. Midika izany fa tsy azontsika ampidirina ao anatin’ny vatantsika mihitsy na amin’ny fomba ahoana na amin’ny fomba ahoana ny ran’olon-kafa, ary na dia ny rantsika efa notahirizina aza. (Asan’ny Apostoly 21:25) Koa tsy hanaiky fampidiran-dra àry ny tena Kristianina. Hekeny kosa ny fitsaboana hafa, toy ny fampidirana ranom-panafody tsy misy ra. Te ho velona izy, nefa tsy hitady hamonjy ny ainy amin’ny fandikana ny lalàn’Andriamanitra.—Matio 16:25.

[Sary, pejy 25]

Tsy maintsy lavintsika ny fampidiran-dra sy ny fahazarana maloto ary ny fisetrana loza tsy amin’antony, mba hampifaliana an’Andriamanitra