Fanovaovam-peo

MANAMPY ny mpihaino hahazo izay lazainao ianao, raha mampiasa fanamafisan-kevitra tsotra. Hahafinaritra kokoa anefa ny hihaino ny anjaranao na ny lahateninao, rehefa hainao ny manovaova ny hamafin’ny feonao sy ny hafainganam-piteninao ary ny haavon’ny feonao. Tsy izay ihany anefa, fa ho fantatry ny mpihaino koa ny fihetseham-ponao momba izay lazainao. Hisy fiantraikany eo amin’izy ireo ny zavatra tsapanao momba ilay fanazavana. Marina izany, na miteny avy eny amin’ny lampihazo ianao, na amin’ny olona iray eny am-pitoriana.

Tena fitaovana mahatalanjona afaka miovaova be ny feon’olombelona. Raha ampiasaina tsara izy io, dia hamelombelona lahateny iray, hanohina ny fo, hanaitra fihetseham-po ary hanosika hanao zavatra. Tsy hahazo izany vokatra izany anefa ianao, raha manisy marika fotsiny eo amin’ny taratasinao hoe aiza ianao no tokony hiteny mafy na mora kokoa, haingana na miadana kokoa, amin’ny feo maranitra na midoboka kokoa. Ho toy ny amboamboarina ny fanovaovam-peo manaraka baiko toy izany. Tsy ho velombelona, fa hitovy tantana foana, ny anjara na lahateny ataonao toy izany, ka tsy ho azoazon’ny mpihaino anao. Mivoaka avy amin’ny fo ny fanovaovam-peo mety tsara.

Tsy hisarika ny saina ho amin’ny tenany ny mpandahateny iray, rehefa hainy tsara ny manovaova ny hamafin’ny feony sy ny hafainganam-piteniny ary ny haavon’ny feony. Hanampy ny mpihaino hahatakatra ny tena votoatin’ilay zavatra resahiny kosa izy.

Ampifanitsio amin’ny toe-javatra ny hamafin’ny feonao. Ny fanovana ny hamafiny no fomba iray hanovaovana ny feonao. Tsy fitenenana mafy sy mora ampifandimbiasina fotsiny anefa no dikan’izany. Hanolana ny hevitry ny zavatra lazainao izany. Ary raha manamafy ny feonao matetika loatra ianao, dia tsy hahafinaritra ny ho fandrenesana azy.

Tokony hifanentana amin’izay lazainao ny hamafin’ny feonao. Na mamaky baiko maika, toy ilay ao amin’ny Apokalypsy 14:6, 7 na Apokalypsy 18:4, ianao, na mamaky teny maneho fatokisan-tena mafy, toy ilay ao amin’ny Eksodosy 14:13, 14, dia ilaina ny miteny mafy kokoa. Toy izany koa, raha manovaova ny hamafin’ny feonao ianao, rehefa mamaky fanamelohana mahery vaika ao amin’ny Baiboly, toy ilay ao amin’ny Jeremia 25:27-38, dia hahatonga ny teny sasany hisongadina kokoa.

Hevero koa ny zava-kendrenao. Ny hanosika ny mpihaino hanao zavatra ve no tadiavinao, sa ny hampisongadina kokoa ireo hevi-dehibe ao amin’ny famelabelaranao? Hahavita izany ianao, raha miteny mafy kokoa, nefa tsy tafahoatra ary amin’ny fotoana mety tsara. Mety tsy ho tratranao anefa ilay zava-kendrenao, raha miteny mafy kokoa fotsiny ianao. Fa nahoana? Mety ho fanehoana hatsaram-panahy sy fihetseham-po no takin’ilay zavatra lazainao, fa tsy fitenenana mafy kokoa. Hiresaka momba izany isika ao amin’ny Lesona Faha-11.

Raha miteny mora kokoa, fa tsy tafahoatra ary amin’ny fotoana mety tsara ianao, dia hahatonga ny olona hiandry zavatra izany. Mazàna anefa, no mila miteny amin-kery kokoa ianao, aorian’izany avy hatrany. Afaka mampita tebiteby na tahotra koa ianao, rehefa sady mampidina ny feonao no miteny amin-kery kokoa. Mety hiteny mora kokoa koa ianao, mba hampisehoana fa tsy dia zava-dehibe loatra ilay lazainao, raha oharina amin’ny teny hafa manodidina azy. Raha miteny moramora foana anefa ianao, dia mety hoheverina ho tsy mahazo antoka ny amin’izay lazainao, na tsy ampy fatokisan-tena, na koa hoe tsy tena liana amin’ilay foto-kevitrao. Ilaina hotandremana tsara ny fomba sy ny fotoana ampiasana ny feo malefaka kely.

Ovaovay ny hafainganam-piteninao. Rehefa miresaka andavanandro isika, dia misosa ho azy ny tenintsika eo am-pilazantsika ny hevitsika. Miteny haingana isika, rehefa mientam-po. Rehefa tiantsika hitadidy tsara izay lazaintsika ny hafa, dia ataontsika miadana kokoa ny fitenintsika.

Vitsy anefa ny mpandahateny vaovao manovaova ny hafainganam-piteniny. Nahoana? Mifantoka loatra amin’ireo teny hilazany zavatra izy ireo. Mety ho nosoratany daholo izany teny izany. Na dia tsy lahateny vakina aza ilay lahateny, dia mety hianarany tsianjery ireo teny rehetra ao. Noho izany, dia tsy miovaova ny hafainganam-piteniny. Ho afaka hanitsy izany lesoka izany izy, rehefa mianatra mampiasa drafitra.

Aza manafaingana tampoka loatra ny fitenenanao, mba tsy hieritreretana vorona variana mitsindroka ka manidina tampoka rehefa misy manaitra. Ary aza miteny haingana loatra mihitsy, ka handiso ny fomba fanononao.

Aza manafaingana sy mampiadana ny fitenenanao amim-pahazarana fotsiny mba hanovaovana ny hafainganam-piteninao. Tsy hanatsara ny anjaranao na ny lahateninao izany, fa vao mainka aza hanimba azy. Tokony hifanaraka amin’izay lazainao sy amin’ny fihetseham-po tianao hampitaina ary amin’ny zava-kendrenao, ny fiovan’ny hafainganam-piteny. Aza miteny haingana loatra na miadana loatra. Mitenena haingana kokoa toy ny amin’ny resaka andavanandro, raha tianao ny hampita fientanam-po. Izany koa no ataovy, rehefa milaza zavatra tsy dia lehibe loatra, na rehefa mitantara zavatra tsy ilana tsipiriany. Hanjary hisy fomba filazan-kevitra isan-karazany ny anjaranao na ny lahateninao, ka hahafinaritra ny hihaino azy. Etsy an-danin’izany kosa, dia mazàna no mitaky ny hitenenana miadana kokoa ny hevitra mafonja kokoa sy ny hevi-dehibe ary ny famaranan-kevitra mahery.

Ovaovay ny haavon’ny feonao. Alao sary an-tsaina ny olona iray mitendry zavamaneno mandritra ny adiny iray eo ho eo. Mandritra izany fotoana rehetra izany izy dia tsy mitendry afa-tsy naoty iray: mafy aloha, moramora avy eo, indraindray haingana, ary miadana avy eo. Miovaova àry ny hamafin’ny fitendriny sy ny hafainganany, saingy tsy miovaova ny haavon’ilay feo, hany ka tsy dia manintona ilay “mozika.” Toy izany koa, fa tsy hahafinaritra ny fandrenesana antsika raha tsy misy fiovaovana ny haavon’ny feontsika.

Tsara homarihina fa tsy voatery hitovy ny vokatra ateraky ny fanovana ny feo haranitra kokoa na hidoboka kokoa, amin’ny fiteny rehetra. Amin’ny fiteny sasany, dia mety hanova ny hevitry ny teny iray ny fanovana ny haavon’ny feo ilazana azy. Kanefa, na dia amin’ny fiteny toy izany aza, dia afaka mampiasa fomba filazan-kevitra isan-karazany koa ny olona iray. Afaka manatsara ny ambaratongam-peo ananany izy. Mbola azony atao maranitra kokoa, ohatra, ny feony efa maranitra ary azony atao midoboka kokoa ny feony efa midoboka.

Amin’ny fiteny hafa, ny fiovan’ny haavon’ny feo dia mety hanampy fanazavana amin’izay lazaina. Ohatra, azo ampiasaina mba hanamafisana hevitra ny feo atao somary maranitra kokoa sady mafy kokoa. Na azo atao koa ny milaza haben-javatra na halaviran-dalana, amin’ny fanovana ny haavon’ny feo. Ny feo atao miakatra ambony amin’ny faran’ny fehezanteny iray dia mety hilaza fa fanontaniana ilay izy. Amin’ny fiteny sasany anefa, dia ny feo atao midina ambany no mety hilaza izany.

Mety hampita fientanam-po sy hafanam-po ny feo maranitra kokoa. Mety hampita alahelo sy tebiteby kosa ny feo midoboka kokoa. Manampy ny mpandahateny iray hanohina ny fon’ny mpihaino ireo fihetseham-po ireo. Aza milaza ilay teny fotsiny ianao, rehefa te haneho azy ireo. Ampiasao ny feonao mba hampisehoana fa tsapanao koa ilay izy.

Fametrahana fototra ho amin’ny fanovaovam-peo. Aiza àry no anombohana ny fanovaovam-peo? Eo am-pifidiananao ireo fanazavana ho an’ny anjaranao na ny lahateninao. Raha tsy mifidy afa-tsy fanaporofoan-kevitra ianao, na tsy mifidy afa-tsy fampirisihana, dia tsy hiova firy ny fomba itenenanao. Koa fakafakao àry ilay drafitra, ary asio ny zavatra rehetra ilainao mba hanaovana famelabelarana velombelona nefa hahazoana fahalalana.

Aoka hatao hoe tsapanao, eo am-panaovana lahateny, fa mitarazoka ka manjary manorisory ny famelabelaranao, ary mila manova ny fomba filazanao hevitra ianao. Inona no hataonao? Ovay ny fomba fisehon’ny famelabelaranao. Amin’ny fomba ahoana? Aza manohy miteny fotsiny, fa sokafy ny Baibolinao, ohatra, ka asao ny mpihaino hanokatra ny azy, ary mamakia andinin-teny iray. Na, avadiho ho fanontaniana ny fanambarana iray, ka mampiasà fiatoana ho fanamafisana. Milazà fanoharana tsotra iray. Fomba ampiasain’ny mpandahateny za-draharaha ireo voalaza ireo. Na efa za-draharaha ianao na tsia, dia afaka mampihatra ireo hevitra ireo koa, rehefa manomana ny anjaranao na ny lahateninao.

Azo oharina amin’ny zavamanitra mampahatsiro ny sakafo ny fanovaovam-peo mamelombelona ny anjara na ny lahateny iray. Raha ilay karazany tsara no ampiasainao, ka antonony ny habetsahany, dia hivoaka tsara ny fanazavanao, ary hahafinaritra ny hihaino azy.