Famerimberenana ho Fanamafisana

MISY famerimberenana ny fampianarana mandaitra. Ho tadidin’ny mpihaino kokoa ny hevi-dehibe iray raha tsy indray mandeha ihany no ilazana azy, fa mihoatra an’izay. Angamba hazava amin’izy ireo kokoa aza ilay hevitra, raha averina lazaina amin’ny fomba hafa.

Tsy hisy vokany eo amin’izay inoan’ny mpihaino, na eo amin’ny fomba fiainany ny teninao raha tsy tadidiny izay lazainao. Hoeritreretiny foana kosa ireo hevitra asongadinao manokana.

Jehovah, ilay Mpampianatra Lehibe Indrindra, no ohatra tokony harahina amin’io lafiny io. Nomeny ny Didy Folo ny firenen’ny Isiraely. Nasainy nolazain’ny anjely iray tamin’ilay firenena teo amin’ny Tendrombohitra Sinay, ireo didy ireo. Nataony an-tsoratra izy ireo tatỳ aoriana, ka nomeny an’i Mosesy. (Eks. 20:1-17; 31:18; Deot. 5:22) Nasain’i Jehovah naverin’i Mosesy nolazaina tamin’ilay firenena indray ireo didy ireo, talohan’ny nidirany tao amin’ny Tany Nampanantenaina. Ary notarihin’ny fanahy masina i Mosesy hanoratra izany tao amin’ny Deoteronomia 5:6-21. Anisan’ny didy nomena ny Isiraely ilay baiko tokony hitiavan’izy ireo sy hanompoan’izy ireo an’i Jehovah amin’ny fony sy ny fanahiny ary ny heriny rehetra. Naverimberina imbetsaka koa izy io. (Deot. 6:5; 10:12; 11:13; 30:6) Nahoana? Satria io no “didy lehibe sady voalohany”, hoy i Jesosy. (Matio 22:34-38) Maherin’ny in-20 i Jehovah no nampahatsiahy ny mponin’i Joda, tamin’ny alalan’i Jeremia mpaminany, fa zava-dehibe ny hankatoavana izay rehetra nandidiany azy. (Jer. 7:23; 11:4; 12:17; 19:15) Ary maherin’ny in-60 Andriamanitra no nilaza tamin’ny alalan’i Ezekiela, fa ‘ho fantatr’ireo firenena fa Izy no Jehovah.’—Ezek. 6:10; 38:23.

Mahita famerimberenana mandaitra koa isika ao amin’ny fitantarana momba ny fanompoan’i Jesosy. Eo, ohatra, ireo Filazantsara efatra izay samy mitantara zava-nitranga lehibe avy. Misy zava-nitranga voatantara ao amin’ny Filazantsara iray miverina koa ao amin’ny hafa, saingy araka ny fomba fijery hafa fotsiny. Rehefa nampianatra i Jesosy, dia nisy zava-dehibe nohazavainy imbetsaka, nefa tamin’ny fomba hafa foana. (Marka 9:34-37; 10:35-45; Jaona 13:2-17) Ary fony teny An-tendrombohitra Oliva izy, andro vitsivitsy talohan’ny hahafatesany, dia namerimberina izao torohevitra tena lehibe izao: “Miambena hianareo; fa tsy fantatrareo izay andro hihavian’ny Tomponareo.”—Matio 24:42; 25:13.

Eny amin’ny fanompoana. Rehefa mitory ianao, dia antenainao fa ho tadidin’ny olona izay lazainao. Hanampy anao amin’izany ny fahaizana mamerimberina hevitra.

Matetika no mampiraikitra hevitra ao an-tsain’ny olona ny famerimberenana azy io mandritra ny resaka. Mba hanamafisana andinin-teny vao avy novakinao, ohatra, dia tondroy ny tapany lehibe iray ao aminy, ary manontania hoe: “Voamarikao ve ny teny ampiasaina eto?”

Azo amerenana hevitra koa ireo teny farany amarananao ny resaka. Ohatra, azonao atao ny milaza hoe: “Izao no hevi-dehibe tiako hotadidinao tamin’iny resatsika iny:...” Avy eo dia avereno lazaina fotsiny ilay izy. Mety hitovitovy amin’izao izany: “Fikasan’Andriamanitra ny hiovan’ny tany ho paradisa. Azo antoka fa ho tanteraka izany fikasana izany.” Na, mety ho toy izao: “Asehon’ny Baiboly mazava tsara fa miaina amin’ny andro faran’ity tontolo ity isika. Raha tsy te ho ringana miaraka aminy isika, dia mila mianatra izay takin’Andriamanitra amintsika.” Na toy izao koa: “Araka ny hitantsika teo, dia manome torohevitra mandaitra mba handaminana ireo zava-manahirana ny fianakaviana, ny Baiboly.” Azonao averina fotsiny indraindray ny andinin-teny iray tianao hotadidina. Mazava ho azy fa ilaina hoeritreretina mialoha izany, mba handaitra tsara.

Afaka mampiasa fanontaniana famerenana ianao rehefa miverina mitsidika olona sy mampianatra ny Baiboly.

Mety hisy torohevitra avy ao amin’ny Baiboly ilaina haverina resahina imbetsaka rehefa tsy azon’ny olona, na sarotra aminy ny mampihatra azy. Azonao ovaovana ny fomba itondranao ilay fanazavana. Tsy voatery ho lava be ny fanazavanao, fa tokony hampirisika an’ilay mpianatra hieritreritra momba ilay izy kosa. Tadidio fa nampiasa io fomba famerimberenana io i Jesosy mba hanampiana ny mpianany handresy ilay faniriana ny ho voalohany.—Matio 18:1-6; 20:20-28; Lioka 22:24-27.

Rehefa manao lahateny. Tsy ny hilaza zavatra fotsiny no antony anaovanao lahateny. Tianao hahazo tsara sy hitadidy ary hampihatra azy io ny mpihaino. Mahaiza àry mamerimberina hevitra.

Mety tsy hifantoka intsony anefa ny mpihaino, raha averimberinao matetika loatra ireo hevi-dehibe. Fidio tsara ireo hevitra mendrika hasongadina manokana. Hevi-dehibe iorenan’ny lahateninao izy ireny mazàna, nefa mety hisy koa hevitra hafa ilain’ny mpihaino manokana.

Mba hamerimberenana hevitra amin’ny fomba mandaitra, dia lazao ao amin’ny teny fampidirana aloha ireo hevi-dehibenao. Mampiasà fehezanteny fohy mamintina ilay lahateny, na fanontaniana, na koa ohatra ny amin’ny zava-manahirana mila vahaolana. Lazao hoe firy ny hevi-dehibe hovelabelarinao, ary tanisao izy ireo. Velabelaro tsirairay ao amin’ny lahateninao izy ireo avy eo. Azo hamafisina ny hevi-dehibe tsirairay mandritra ny famelabelarana ilay lahateninao: Lazao indray ilay hevitra, alohan’ny hifindrana ho amin’ny hevitra manaraka, na makà ohatra azo ampiharana ilay hevi-dehibe. Mbola azo hamafisina kokoa ireo hevi-dehibe ao amin’ny teny famaranana: Avereno lazaina indray izy ireo, na asongadino amin’ny alalan’ny fampitahana zavatra mifanohitra, na omeo ny valin’ireo fanontaniana napetrakao, na lazao vetivety ny vahaolan’ireo zava-manahirana notononinao.

Ankoatra izany rehetra izany, dia mandinika tsara ny mpihaino tsirairay ny mpandahateny za-draharaha. Hitany rehefa misy tsy mahazo tsara ny hevitra sasany. Raha hevi-dehibe ilay izy, dia averiny hazavaina, fa ataony amin’ny teny hafa. Tsy famerenana teny mitovy fotsiny akory no atao hoe mampianatra. Tsy maintsy mahay manovaova zavatra arakaraka ny zava-miseho ny mpandahateny. Mila manampy fanazavana eo no ho eo angamba izy amin’izany. Raha mianatra manampy ny mpihaino toy izany ianao, dia tena hanatsara ny fahaizanao mampianatra.