FANONTANIANA 7

Inona no Hataoko fa Tereny Hanao Firaisana Aminy Aho?

FA MANINONA IZANY NO MILA FANTARINA?

Ho potika ny hoavinao raha tsy misaina tsara ianao fa manaonao foana.

AHOANA NO HATAONAO?

Vao roa volana izay i Hasina sy Rado no niaraka, nefa hoatr’ireny efa niaraka firy taona ireny! Tsy tapitra akory aza ny tenin’ny anankiray, dia efa hain’ny iray ny tohiny. Mifandefa SMS foana ry zareo, ary mifampiantso ela be. Tsy resaka intsony anefa izao no tadiavin’i Rado fa zavatra hafa.

Nifampitantana sy nifanoroka kely fotsiny izy roa, talohan’izao. Tena tsy te hihoatra an’izay i Hasina, nefa matahotra koa izy sao hisarahan’i Rado. Izy irery mantsy no mba miteny aminy hoe manja kely izy sady tsy misy hoatr’azy. Mieritreritra àry izy hoe: ‘Koa inona moa ny olana e? Izahay tsinona mifankatia!’

Efa ampy taona angamba ianao, ka efa afaka mampiaraka. Inona no ho nataonao raha ianao no Hasina?

MIERITRERETA TSARA ALOHA!

Akanjo lasa natao famafana vovoka — Fanomezana avy amin’Andriamanitra ny firaisana, fa natao ho an’ny mpivady ihany. Tsy asianao vidiny ilay fanomezana, raha manao firaisana amin’olona mbola tsy vadinao ianao. Hoatran’ny hoe nomen’olona akanjo tsara tarehy ianao, nefa ataonao famafana vovoka ilay izy

Natao hisotro rano ny olombelona, ka mety ho faty raha tsy manaraka an’izany. Hoatr’izay koa fa asain’ny Baiboly ‘mifady ny fijangajangana’ isika. (1 Tesalonianina 4:3) Ratsy foana ny vokany raha tsy arahina izany, satria efa izay no lalàna nataon’Andriamanitra.

Inona ny vokany raha tsy mankatò an’io lalàna io ianao? Hoy ny Baiboly: ‘Manota amin’ny vatany ihany ny mpijangajanga.’ (1 Korintianina 6:18) Inona ny dikan’izany?

Hitan’ny mpikaroka fa maro amin’ny tanora efa nanao firaisana talohan’ny fanambadiana no...

MANENINA. Ny ankamaroany mihitsy no mahatsapa an’izany.
TSY MIFAMPATOKY. Samy miady saina izy roa hoe: ‘Sao dia mba efa nanao firaisana tamin’ny olon-kafa koa àry izy?’
DISO FANANTENANA BE. Maro ny ankizivavy diso fanantenana any anatiny any, satria ilay ankizilahy nantenainy hiaro azy indray no nanararaotra azy. Matetika koa no tsy tena tian’ny ankizilahy intsony izay ankizivavy nanaiky hanao firaisana taminy.
Tadidio àry izao: Tena sarobidy ny vatanao ka aza omemena olona fotsiny. Tsy asianao vidiny ilay izy, raha manaiky hanao firaisana alohan’ny fanambadiana ianao.—Romanina 1:24.

Asehoy fa vitanao ny mankatò an’ilay hoe ‘mifady ny fijangajangana.’ (1 Tesalonianina 4:3) Aza maika fa mbola ho afaka hanao firaisana foana ianao rehefa manambady. Tsy hanenina na hiady saina toa an’ireo tanora nanao firaisana alohan’ny fanambadiana ianao amin’izay, fa mba tena hankafy an’ilay izy.—Ohabolana 7:22, 23; 1 Korintianina 7:3.

AHOANA NY HEVITRAO?

Raha olona tena tia anao ve, dia handeha hanimba ny vatanao sy hanao izay hampalahelo anao?
Raha tena tia anao ve izy, dia hataony izay hampahatezitra an’Andriamanitra aminao?—Hebreo 13:4.