Tsy Nankatò An’Andriamanitra i Adama sy Eva

Irery i Eva indray andro, fa tsy teo i Adama. Nisy bibilava niteny taminy tamin’izay hoe: ‘Izany, hono, ianareo dia tsy mahazo mihinana amin’ireo voankazo rehetra ireo?’ Hoy i Eva: ‘Tsy izany ka! Azonay hanina daholo ireo, afa-tsy ny voan’ny hazo anankiray ihany. Raha mihinana an’ilay izy izahay dia ho faty.’ Dia hoy ilay bibilava: ‘Tsy ho faty izany ianareo, fa vao mainka aza ianareo hitovy amin’Andriamanitra!’ Tena marina ve anefa izany? An an an! Nandainga izy. Nino ny teniny anefa i Eva. Nojerijereny foana ilay voankazo, dia vao mainka izy lasa te haka an’ilay izy. Nohaniny ilay izy, dia nomeny koa i Adama. Efa fantatr’i Adama hoe ho faty ry zareo raha tsy mankatò, nefa mbola nohaniny ihany ilay izy.

Nanontanian’i Jehovah i Adama sy Eva ny harivan’iny hoe maninona ry zareo no tsy nankatò an’azy. Nanome tsiny an’ilay bibilava i Eva, dia i Adama nanome tsiny an’i Eva. Noroahin’i Jehovah niala tao amin’ilay zaridaina àry ry zareo. Dia nasiany anjely sy sabatra mirehitra teo amin’ny fidirana mankao, amin’izay ry zareo tsy afaka miverina any.

Nilaza i Jehovah fa hosaziny koa ilay nandainga tamin’i Eva. Tsy tena ilay bibilava anefa ilay izy, satria i Jehovah tsy nanamboatra bibilava afaka miteny. Anjely ratsy saina atao hoe Satana Devoly no nampiteny an’ilay bibilava mba hamitahana an’i Eva. Haringan’i Jehovah izy any aoriana any, amin’izay tsy ho afaka hamitaka ny olona intsony ka hitaona an-dry zareo hanao ratsy.