Andevo Nankatò An’Andriamanitra

Anisan’ny zanakalahin’i Jakoba faramparany i Josefa. Hitan’ireo zokiny hoe izy no tian’ny dadany indrindra. Araka ny hevitrao, inona izao no tsapan-dry zareo tamin’izany? Nialona sy nankahala an’i Josefa ry zareo. Nanofy zavatra hafakely izy indray andro, dia notantarainy tamin’ny rahalahiny ilay izy. Inona no noeritreretin-dry zareo rehefa naheno an’ilay izy? Hoe hiankohoka eo anatrehan’i Josefa izany ry zareo, indray andro any. Vao mainka àry lasa tsy tia maizina an’i Josefa ry zareo.

Niandry ondry tany akaikin’ny tanànan’i Sekema ny rahalahin’i Josefa, indray andro, dia nirahin’i Jakoba hijery an-dry zareo tany i Josefa. Mbola lavitra be izy dia efa tazan-dry zareo, dia nifampiresaka ry zareo hoe: ‘Iny tamy iny ilay mpanonofy! Andao rangahy hovonointsika izy a!’ Nosamborin-dry zareo izy dia natsipiny tao anaty lavaka lalina be. Hoy anefa ny zokiny anankiray atao hoe Joda: ‘Maninona raha tsy vonoina izy e! Aleo izy hamidy ho andevo!’ Nisy mpivarotra midianita ho any Ejipta sendra nandalo tamin’izay, dia namidin-dry zareo volafotsy 20 sekely tamin’ireo i Josefa.

Nataon-dry zareo tao anaty ran’osy ny akanjon’i Josefa avy eo, dia nisy olona nirahiny hanatitra an’ilay izy tany amin’ny dadany sady hiteny hoe: ‘Tsy akanjon’ny zanakao ve ity?’ Noheverin’i Jakoba fa lanin’ny bibidia àry i Josefa, ka nalahelo be izy. Tsy nisy nahavita nampionona azy mihitsy tamin’izay.

Namidy tamin’ny lehilahy manam-pahefana be izay i Josefa tany Ejipta, dia lasa andevo. Potifara no anarany. Nampian’i Jehovah foana anefa i Josefa. Hitan’i Potifara hoe vitan’i Josefa tsara daholo izay nampanaovina azy, sady azo atokisana izy. Nasainy niandraikitra ny fananany rehetra àry i Josefa.

Voamariky ny vadin’i Potifara hoe tsara tarehy i Josefa sady matanjaka, dia noteneniny foana izy isan’andro hoe: ‘Andao mba hiaraka hatory.’ Dia inona no nataon’i Josefa? Tsy nety izy sady niteny hoe: ‘Ratsy be izany. I Potifara ange matoky be an’ahy e! Dia ianao koa vadiny! Manota amin’Andriamanitra aho raha manao an’izany.’

Noteren’ny vadin’i Potifara hiaraka hatory aminy i Josefa, indray andro. Nosintoniny ny akanjon’i Josefa, nefa lasa nitsoaka i Josefa. Dia inona no nataon’ilay vehivavy rehefa tonga tao an-trano i Potifara? Tsy nilaza ny marina izy. Hoy izy hoe nitady hanisy ratsy an’azy, hono, i Josefa. Tezitra be mihitsy àry i Potifara, dia nogadrainy i Josefa. Tsy hadinon’i Jehovah mihitsy anefa i Josefa.