Iza i Joba?

Nisy lehilahy iray izay, nipetraka tany Oza. Joba no anarany, ary tena tia an’i Jehovah izy. Nanan-janaka be dia be izy sady mpanankarena be. Tsara fanahy koa izy. Nampiany ny mahantra sy ny vehivavy maty vady ary ny ankizy tsy nanana Dada sy Neny intsony. Nilamina be foana ve anefa ny fiainany satria fotsiny hoe nanao ny tsara izy?

Tsy fantatr’i Joba fa hay i Satana Devoly mijery azy foana. Dia hoy i Jehovah tamin’i Satana: ‘Jereo ange i Joba mpanompoko e! Tsisy olona hoatran’azy mihitsy, fa izy mihaino an’ahy sady manao ny tsara foana.’ Dia hoy i Satana: ‘Ka ianao tsinona miaro an’azy, dia omenao tany sy biby fiompy be dia be koa izy! Fa raha alainao daholo ireo, dia jereo tsara ange fa tsy ho tia anao intsony izy e!’ Dia hoy i Jehovah: ‘Mandehana àry ataovy izany, dia ho hitantsika eo. Tandremo fotsiny izy sao vonoinao an!’ Fa maninona no navelan’i Jehovah hampijaly an’i Joba i Satana? Satria natoky izy hoe tsy hivadika aminy mihitsy i Joba.

Nandefasan’i Satana loza be dia be àry i Joba. Nirahiny hangalatra ny ombiny sy ny ampondrany aloha ny Sabeanina. Nasiany afo avy any an-danitra avy eo dia may daholo ny ondrin’i Joba. Nangalarin’ny Kaldeanina koa ny ramevany. Tsy vitan’izay fa maty daholo ny mpiandry an’ireo biby ireo. Fa ity no tena mafy indrindra: Maty daholo ny zanany! Nianjeran’ny trano mantsy ry zareo tamin-dry zareo nanao fety. Nalahelo be mihitsy i Joba tamin’izay! Mbola tia an’i Jehovah foana anefa izy.

Tian’i Satana hijalijaly kokoa i Joba, dia nataony feno vay ny vatany. Nanaintaina be mihitsy izy. Tsy fantatr’i Joba hoe fa maninona izany rehetra izany no nanjo an’azy. Mbola tia an’i Jehovah foana anefa izy. Hitan’i Jehovah daholo izay nitranga, ary faly be tamin’i Joba izy.

Naniraka olona telo nankany amin’i Joba i Satana avy eo mba hanakivy azy. Hoy ry zareo: ‘Nanota mihitsy angamba ianao fa manafina. Dia sazin’Andriamanitra ianao izao!’ Dia hoy i Joba: ‘Tsy nanao ratsy izany aho!’ Lasa nieritreritra anefa izy avy eo hoe i Jehovah no nampijaly azy, ary tsy rariny ilay izy.

Nisy lehilahy tanora anankiray koa teo, nihaino an-dry zareo niresaka. Eliho no anarany. Hoy izy: ‘Diso daholo ny teninareo. Tsy hoatr’izany izany i Jehovah, fa izy tsy mba manao ratsy mihitsy. Hitany daholo izay ataon’ny olona, dia ampiany izay mijaly.’

Niteny tamin’i Joba i Jehovah avy eo hoe: ‘Taiza ianao tamin’izaho nanamboatra ny lanitra sy ny tany? Fa maninona no lazainao hoe tsy rariny ny ataoko? Tsy fantatrao akory izay lazainao.’ Niaiky i Joba avy eo hoe diso. Hoy izy: ‘Efa naheno momba anao ihany aho, fa izao aho vao tena mahafantatra anao. Tsisy tsy vitanao kay ny zava-drehetra! Mifona aho tamin’ireny zavatra noteneniko ireny.’

Tsy nivadika tamin’i Jehovah mihitsy i Joba, ka nositraniny ary nomeny zavatra betsaka lavitra noho ny teo aloha. Mbola velona ela be izy, ary tena sambatra. Notahin’i Jehovah izy satria nankatò azy foana na dia nijaly be aza. Ianao koa ve hanao hoatran’i Joba dia ho tia an’i Jehovah foana, na inona na inona mitranga?