Nirehitra Ilay Voarointsilo!

Efa 40 taona izao i Mosesy no nipetraka tany Midianina. Nanambady izy tany ary nanan-janaka. Nahita zavatra mahagaga izy, indray andro, rehefa niandry ondry teo akaikin’ny Tendrombohitra Sinay. Nisy voarointsilo nirehitra teo nefa tsy nety kilan’ny afo. Rehefa nankeo akaikin’ilay izy i Mosesy, dia nisy feo avy ao niteny hoe: ‘Mosesy, aza manatona intsony. Dia esory ny kapanao fa tany masina io ijoroanao io.’ I Jehovah, raha ny marina, no niresaka taminy fa nampiasa anjely izy.

Natahotra be i Mosesy dia nosaronany ny tarehiny. Hoy ihany ilay niteny taminy: ‘Hitako hoe ampijalin’ny Ejipsianina ny Israelita, fa andeha havotako dia hoentiko any amin’ny tany tsara be. Ianao no tiako hitondra ny vahoakako hiala any Ejipta.’ Mety hoe taitra be ve izao i Mosesy rehefa naheno an’izany?

Hoy i Mosesy: ‘Dia inona no holazaiko raha manontany ry zareo hoe iza no naniraka an’ahy?’ Hoy Andriamanitra: ‘Teneno hoe i Jehovah Andriamanitr’i Abrahama sy Isaka ary Jakoba no naniraka anao.’ Dia hoy indray i Mosesy: ‘Dia ahoana raha tsy mino an’ahy ry zareo?’ Nomen’i Jehovah porofo àry izy hoe hampiany. Nasainy natsipin’i Mosesy tamin’ny tany ny tehiny, dia lasa bibilava. Rehefa noraisin’i Mosesy tamin’ny rambony ilay izy, dia lasa tehina indray. Dia hoy i Jehovah: ‘Rehefa mahita an’izany famantarana izany ry zareo, dia hatoky hoe izaho no naniraka anao.’

Hoy i Mosesy: ‘Izaho ange tsy mahay miresaka e!’ Dia hoy i Jehovah: ‘Ao fa hatoroko anao izay tokony holazaina. Asaiko manampy anao koa i Arona zokinao.’ Izay vao nino i Mosesy hoe hanampy azy i Jehovah, dia nankany Ejipta amin’izay izy sy ny vadiny ary ny zanany lahy.