Nivavaka i Hana mba Hahazo Zanakalahy

Nisy lehilahy israelita atao hoe Elkana, nanana vady roa. Hana no anaran’ny iray, ary Penina no anaran’ny iray. I Hana anefa no tena tiany. Tsy nanan-janaka i Hana, fa i Penina nanana be dia be. Nanambanimbany an’i Hana foana àry i Penina. Fanaon’i Elkana ny nitondra ny vady aman-janany tany Silo isan-taona, mba hivavaka amin’i Jehovah ao amin’ny tranolay masina. Tamin-dry zareo tany indray mandeha izay, dia hitany hoe nalahelo be i Hana. Dia hoy izy: ‘Hana a, aza mitomany moa e! Ianao ange manana an’ahy e! Sady ianao tiako be!’

Nandeha nitokana kely i Hana avy eo mba hivavaka. Nitomany be mihitsy izy sady niangavy an’i Jehovah hanampy azy. Dia nivoady izy hoe: ‘Jehovah ô, raha omenao zanakalahy aho dia homeko anao izy, sady hanompo anao mandritra ny androm-piainany.’

I Ely no mpisoronabe tamin’izay. Hitany nifokofoko nitomany i Hana, dia noheveriny fa mamo. Hoy anefa i Hana: ‘Tsy mamo izany aho, tompoko! Manana olana be aho, dia miresaka an’ilay izy amin’i Jehovah.’ Dia hoy i Ely: ‘Hay ve e! Enga anie àry mba homen’i Jehovah anao izay tadiavinao!’ Tsy nalahelo be intsony i Hana avy eo, dia lasa nandeha. Nanan-janakalahy tokoa izy, herintaona latsaka taorian’izay. Nataony hoe Samoela ny anarany. Mba eritrereto ange ny hafalian’i Hana tamin’izay e!

Tsy hadinon’i Hana ilay teniny tamin’i Jehovah. Vao nisara-nono àry i Samoela dia nentiny tany amin’ny tranolay masina. Hoy izy tamin’i Ely: ‘Ity zaza ity ilay nangatahiko tamin’izaho nivavaka iny. Fa izao izy homeko hanompo an’i Jehovah mandritra ny androm-piainany.’ Namangy an’i Samoela foana i Elkana sy Hana isan-taona, ary nitondra akanjo vaovao tsy misy tanany ho azy. Mbola nomen’i Jehovah zanakalahy telo sy zanakavavy roa koa i Hana.