Tempoly ho An’i Jehovah

Rehefa lasa mpanjakan’ny Israely i Solomona, dia hoy i Jehovah taminy: ‘Inona no tianao homeko anao?’ Dia hoy i Solomona: ‘Mba omeo fahendrena aho fa mbola kely dia tsy mahay mitondra an’ireo vahoakanao ireo.’ Hoy i Jehovah: ‘Raha izany no angatahinao, dia ianao no hataoko hendry indrindra amin’ny olona rehetra. Hataoko manankarena be koa ianao. Ary ho ela velona ianao raha mankatò an’ahy foana.’

Nanomboka nanamboatra an’ilay tempoly amin’izay i Solomona. Volamena sy volafotsy sy hazo ary vato tsara indrindra no nampiasainy. Lehilahy sy vehivavy be dia be sady nahay no nanorina an’ilay izy. Vita ilay izy rehefa afaka fito taona, dia notokanana ho an’i Jehovah. Nisy alitara tao, dia nasiana fanatitra teo ambonin’ilay izy. Nandohalika teo anoloan’ilay izy i Solomona, dia nivavaka hoe: ‘Jehovah ô, kely sady tsy dia tsara ity tempoly ity raha ho anao. Ato anefa izahay no hanompo anao sy hivavaka aminao, dia mba ekeo sy henoy izany.’ Ahoana kosa no fahitan’i Jehovah an’ilay tempoly sy ny vavak’i Solomona? Vao vita ilay vavaka, dia nisy afo avy any an-danitra nandevona an’ilay fanatitra. Tian’i Jehovah izany ilay tempoly. Faly be ny Israelita rehefa nahita an’izany!

Fantatry ny olona rehetra tany Israely sy hatrany lavitra be hoe tena hendry i Solomona. Nankany aminy àry izay olona nanana olana. Tonga tany hatramin’ny mpanjakavavin’i Sheba, dia nanontany azy zavatra sarotra be. Hoy izy rehefa avy naheno ny valin-tenin’i Solomona: ‘Tsy nino an’izay notenenin’ny olona momba anao aho, nefa ianao aza kay mbola hendry lavitra noho ny notenenin-dry zareo. Tena manampy anao i Jehovah Andriamanitrao.’ Nahafinaritra erỳ ny fiainan’ny Israelita tamin’izany, ary sambatra be ry zareo. Hiova anefa izany.