LESONA 45
Nizara Roa Ilay Fanjakana
Niadana be ny Israelita tamin’i Solomona mbola nanompo an’i Jehovah. Nanambady vehivavy be dia be hafa firenena anefa i Solomona, ary mpanompo sampy ireny vadiny ireny. Niova tsikelikely àry izy dia tsy nivavaka tamin’i Jehovah intsony, fa nanompo sampy koa. Tezitra be i Jehovah, dia hoy izy tamin’i Solomona: ‘Hesorina aminao sy ny zanakao ny fanjakan’ny Israely, ka hozaraiko roa. Homeko ho an’ny iray amin’ny mpanomponao ny ampahany lehibe amin’ilay izy, fa kely ihany no ho an’ny zanakao.’
Nataon’i Jehovah mazava tsara ny tiany hotenenina tamin’izany. Nifanena tamin’i Ahia mpaminany teny an-dalana, indray andro, ny mpanompon’i Solomona atao hoe Jeroboama. Nozarazarain’i Ahia 12 ny akanjony, dia hoy izy tamin’i Jeroboama: ‘Hesorin’i Jehovah amin’i Solomona sy ny zanany ny fanjakan’ny Israely, ary hozarainy roa. Makà folo amin’ireto satria ianao no hanjaka amin’ny foko folo.’ Rehefa henon’i Solomona izany, dia notadiaviny hovonoina i Jeroboama. Nandositra tany Ejipta àry izy. Maty i Solomona tatỳ aoriana, dia i Rehoboama zanany no lasa mpanjaka. Sahy niverina tany Israely amin’izay i Jeroboama.
Hoy ny zokiolona teo amin’ny Israely tamin’i Rehoboama: ‘Raha tsara fanahy amin’ny vahoaka ianao, dia tsy hivadika aminao ry zareo.’ Ny tovolahy naman’i Rehoboama indray anefa niteny hoe: ‘Ataovy mahamay any ireo vahoaka ireo, dia vao mainka tereo hiasa mafy!’ Ny tenin’ny namany no narahin’i Rehoboama. Nikomy àry ny vahoaka, dia nizara roa ny fanjakana sy ny foko 12. I Jeroboama no natao mpanjakan’ny foko folo, na ilay hoe fanjakan’ny Israely. Ny foko roa ambiny kosa lasa nantsoina hoe fanjakan’ny Joda. Tsy nivadika tamin’i Rehoboama ry zareo ka mbola izy ihany no mpanjaka tany.
Tsy tian’i Jeroboama hankany Jerosalema ny vahoakany rehefa hivavaka. Fa maninona? Satria faritra nanjakan’i Rehoboama tany, dia natahotra i Jeroboama hoe sao ho lasa tia azy indray ny vahoakany raha mankany. Nanamboatra zanak’omby volamena roa àry izy, dia niteny tamin-dry zareo hoe: ‘Lavitra be any Jerosalema fa aleo eto ihany ianareo no mivavaka.’ Lasa nivavaka tamin’ireo zanak’omby volamena ireo àry ry zareo, dia nanadino an’i Jehovah.
‘Aza manaiky hiray zioga amin’ny tsy mpino. Fa inona no ifandraisan’ny fahamarinana sy ny fandikan-dalàna? Inona no zavatra iombonan’ny mino amin’ny tsy mpino?’—2 Korintianina 6:14, 15