Velona Indray ny Zanak’ilay Vehivavy

Mbola tsy nisy orana mihitsy tamin’izay. Dia hoy i Jehovah tamin’i Elia: ‘Mandehana mankany Zarefata, fa misy vehivavy maty vady hanome sakafo anao any.’ Rehefa tonga teo am-bavahadin’ilay tanàna i Elia, dia nahita vehivavy mahantra naka kitay. Nangatahin’i Elia rano izy, dia avy eo nangatahiny mofo koa rehefa handeha hiditra haka an’ilay rano. Hoy anefa ilay vehivavy: ‘Tsy manana mofo homena anao aho. Lafarinina sy menaka kely hanaovako mofo ho an’ahy sy ny zanako lahy sisa no ao.’ Dia hoy i Elia: ‘Efa niteny i Jehovah hoe raha anamboaranao mofo aho, dia tsy ho lany ny lafarinina sy ny menaka ao aminareo, mandra-pilatsaky ny orana indray.’

Niditra tao an-tranony àry ilay vehivavy, ka nanamboatra mofo ho an’ilay mpaminany. Dia marina tokoa ilay tenin’i Jehovah! Nanana sakafo foana izy mianaka nandritra ny fotoana tsisy orana. Feno foana mantsy ny siny fitoerana lafarinina sy menaka tao amin-dry zareo.

Nisy loza nitranga avy eo. Narary mafy ny zanak’ilay vehivavy dia maty. Niangavy an’i Elia àry izy mba hanampy azy. Nalain’i Elia teny aminy ilay zanany lahikely, dia nentiny tao amin’ny efitra iray tany ambony. Natsotrany teo ambony fandriana ilay ankizy, dia nivavaka izy hoe: ‘Jehovah ô, mba ataovy velona indray re ity ankizy ity e!’ Tena miavaka be raha tanterahin’i Jehovah izany! Hainao ve hoe fa maninona? Satria mbola tsy nisy natsangana tamin’ny maty mihitsy talohan’izay, sady io vehivavy io sy ilay zanany aza tsy Israelita akory.

Io anefa fa nanomboka niaina ilay ankizilahikely. Velona indray izy! Dia hoy i Elia tamin’ilay vehivavy: ‘Io fa velona ny zanakao!’ Faly be izy, dia niteny tamin’i Elia hoe: ‘Fantatro izao hoe tena mpanompon’Andriamanitra tokoa ianao, satria izay asain’i Jehovah teneninao ihany no teneninao, dia tanteraka foana ilay izy.’