Nanda An’i Jesosy i Petera

Hoy i Jesosy tamin’ny apostoly, tamin-dry zareo mbola tao amin’ilay efitra ambony rihana: ‘Hilaozanareo rehetra izao ’zaho androany alina.’ Dia hoy i Petera: ‘Izaho tsy hanao an’izany mihitsy. Na handositra daholo aza ireo, dia izaho hiaraka aminao foana.’ Hoy anefa i Jesosy: ‘Ianao aza izao intelo no hiteny hoe tsy mahafantatra an’ahy, raha mbola tsy maneno akory ny akoho.’

Nandositra tokoa ny ankamaroan’ny apostoly, rehefa nentin’ny miaramila tany amin’i Kaiafa i Jesosy. Nisy apostoly anankiroa anefa nanaraka an’ilay vahoaka teny. I Petera ny iray. Niditra tao an-tokotanin’i Kaiafa izy, dia nitanina afo teo. Rehefa notarafin’ny hazavana avy tamin’ilay afo ny tarehin’i Petera, dia nisy vehivavy mpiasa tao nilaza hoe: ‘Fantatro ianao! Naman’i Jesosy koa ianao!’

Hoy i Petera: ‘Fa inona izany resahinao izany e? Tsy marina izany!’ Dia lasa izy nankeny amin’ny vavahady. Nisy vehivavy mpiasa hafa nahita azy indray anefa afaka kelikely, dia niteny hoe: ‘Niaraka tamin’i Jesosy mihitsy io!’ Dia hoy i Petera: ‘Tsy haiko akory aza hoe iza izany!’ Dia nisy lehilahy niteny koa hoe: ‘Hita fa na ny fiteninao aza fantatra be hoe avy any Galilia, hoatran’ny fitenin’i Jesosy. Tena naman-dry zareo ianao!’ Hoy anefa i Petera: ‘Tena mba marina raha fantatro izany e!’

Nisy akoho naneno tamin’izay. Hitan’i Petera i Jesosy nitodika tany aminy, dia tadidiny ilay tenin’i Jesosy. Nivoaka tany ivelany àry izy, dia nitomany be.

Ny Fitsarana Avo Jiosy tamin’izay efa nivory tao an-tranon’i Kaiafa mba hitsara an’i Jesosy. Efa hoe hamono an’i Jesosy ry zareo, fa nitady antony hahafahana manao an’izany fotsiny sisa. Tsy nahita mihitsy anefa ry zareo. Farany dia hoy i Kaiafa tamin’i Jesosy: ‘Zanak’Andriamanitra ve ianao?’ Dia hoy i Jesosy: ‘Ie.’ Dia hoy i Kaiafa: ‘Inona intsony ny porofo tadiavintsika, fa izy aza izany miteny ratsy an’Andriamanitra?’ Namoaka didy àry ny fitsarana hoe hovonoina izy. Nofelahan-dry zareo izy dia nororany. Notampenan-dry zareo koa ny masony, dia nasiany totohondry izy sady noteneniny hoe: ‘Mpaminany moa ianao e? Iza àry no namely anao teo?’

Nentin-dry zareo tany amin’ny trano nisy ny Fitsarana Avo Jiosy i Jesosy rehefa maraina ny andro, dia nanontaniany indray hoe: ‘Zanak’Andriamanitra ve ianao?’ Dia hoy i Jesosy: ‘Ianareo aza izany miteny hoe Zanany aho.’ Nolazain-dry zareo fa niteny ratsy an’Andriamanitra izy, ka nentiny tany amin’ny lapan’i Pontio Pilato, governora romanina. Dia inona no nitranga?