Nitory Hatraiza Hatraiza ny Kristianina

Narahin’ny apostoly ny tenin’i Jesosy hoe mila torina eran-tany ny vaovao tsara. Naniraka an’i Paoly sy Barnabasy hanao dia lavitra ny rahalahy tao Antiokia tamin’ny taona 47, mba hitory any amin’ny toerana maromaro. Nandeha nanerana an’i Azia Minora ireo mpitory mazoto ireo, ohatra hoe tany Derbe sy Lystra ary Ikonioma.

Nitorian’i Paoly sy Barnabasy daholo na mahantra na manankarena, na antitra na tanora. Be dia be àry no lasa nino an’i Kristy. Nitory tamin’i Sergio Paolo, governora tany Sipra, ohatra, ry zareo. Nisy mpilalao ody nitady hisakana azy roa lahy anefa. Dia hoy i Paoly tamin’ilay mpilalao ody: ‘Hamely anao izao i Jehovah.’ Tonga dia lasa jamba ilay lehilahy. Lasa nino an’i Jesosy i Paolo Governora rehefa nahita an’izany.

Nitory hatraiza hatraiza i Paoly sy Barnabasy, na isan-trano, na teny an-tsena, na teny an-dalana, na tany amin’ny synagoga. Nanasitrana lehilahy malemy ry zareo tany Lystra. Nieritreritra àry ny olona nahita an’izany hoe andriamanitra izy roa lahy, ka saika hivavaka tamin’izy ireo ry zareo. Hoy anefa izy roa lahy: ‘Andriamanitra ihany no tokony hivavahana ka! Izahay ange olona ihany e!’ Nisy Jiosy tonga avy eo, dia nampirisika ny vahoaka hanohitra an’i Paoly. Nitora-bato azy ry zareo, dia notaritaritin-dry zareo tany ivelan’ny tanàna izy, ary navelany ho faty tany. Tsy maty anefa i Paoly! Tonga dia novonjen’ny mpiara-manompo izy dia nentin-dry zareo tao an-tanàna indray. Niverina tany Antiokia i Paoly taorian’izay.

Nandeha nitory tany amin’ny faritra be dia be indray i Paoly tamin’ny taona 49. Niverina nitsidika an’ireo rahalahy tany Azia Minora aloha izy, dia avy eo nitory ny vaovao tsara hatrany Eoropa. Nankany Atena izy, dia nankany Efesosy, Filipy, Tesalonika, ary tany an-toeran-kafa koa. Niaraka taminy i Silasy sy Lioka ary ilay tanora atao hoe Timoty. Niara-niasa ry zareo mba hisy fiangonana vaovao tany amin’izay nitoriany, dia avy eo ry zareo nanampy an’ireny fiangonana ireny hatanjaka tsara. Nijanona herintaona sy tapany tany Korinto i Paoly, mba hampahery ny Kristianina tany. Nitory izy, nampianatra, ary nanoratra taratasy ho an’ny fiangonana be dia be. Niasa koa izy. Mpanao tranolay ny asany. Niverina tany Antiokia izy tatỳ aoriana.

Niainga tany Azia Minora indray i Paoly tamin’ny taona 52. Io no dia fanintelony nataony mba hitoriana tany amin’ny faritra be dia be. Nandeha lavitra be hatrany Filipy tany avaratra izy, dia avy eo nankany Korinto. Nijanona taona maromaro tany Efesosy i Paoly taorian’izay. Nampianatra sy nanasitrana ary nanampy ny fiangonana izy tany. Nanao lahateny tao amin’izay trano fianarana izay koa izy isan’andro. Be dia be ny olona nihaino azy dia niova. Nankany Jerosalema i Paoly tamin’ny farany.