Paoly sy Timoty

Rahalahy tanora tao amin’ny fiangonan’i Lystra i Timoty. Grika ny dadany, ary Jiosy ny mamany. Eonika no anaran’ny mamany, ary Loisa no anaran’ny bebeny. Nampianarin’izy mianaka momba an’i Jehovah i Timoty, hatramin’ny mbola kely.

Rehefa nitsidika an’i Lystra i Paoly, dia hitany hoe tena tia an’ireo mpiara-manompo i Timoty sady nazoto nanampy an-dry zareo. Nasain’i Paoly niaraka taminy àry izy. Nampiofanin’i Paoly tsikelikely teny izy mba hahay hitory sy hampianatra ny vaovao tsara.

Nitarika an’i Paoly sy Timoty ny fanahy masina tany amin’izay rehetra nalehan-dry zareo. Niteny tamin’i Paoly tao amin’ny fahitana, ohatra, ny lehilahy iray indray alina hoe: ‘Tongava atỳ Makedonia dia mba ampio izahay.’ Nankany àry i Paoly, Timoty, Silasy, ary Lioka mba hitory sy hamorona fiangonana.

Nisy tanàna atao hoe Tesalonika tany Makedonia. Be dia be ny lehilahy sy vehivavy lasa Kristianina tao. Nialona an’i Paoly sy ny namany anefa ny Jiosy sasany. Namory vahoaka àry ry zareo, dia notaritaritiny nankany amin’ny lehiben’ny tanàna ry Paoly sady niantsoantso ry zareo hoe: ‘Manohitra ny fanjakana romanina ireto lehilahy ireto!’ Saika maty i Paoly sy Timoty tamin’izay, ka nitsoaka tany Beria ny alin’iny.

Tena tia ny vaovao tsara ny olona tany Beria, ary lasa nino an’i Jesosy na Jiosy na Grika. Nisy Jiosy avy any Tesalonika anefa tonga nanakorontana tany, ka lasa nankany Atena i Paoly. I Timoty sy Silasy kosa nijanona tao Beria mba hampahery ny mpiara-manompo. Nasain’i Paoly niverina tany Tesalonika i Timoty tatỳ aoriana, mba hanampy ny mpiara-manompo hahavita hiaritra. Nenjehina mafy mantsy ry zareo. Nirahin’i Paoly hitsidika sy hampahery fiangonana hafa i Timoty taorian’izay.

Hoy i Paoly taminy: ‘Izay te hanompo an’i Jehovah, dia tsy maintsy hisy hanenjika.’ Nenjehina tokoa i Timoty ary nogadraina. Faly anefa izy satria afaka nampiseho hoe tsy nivadika tamin’i Jehovah.

Hoy i Paoly tamin’ny Filipianina: ‘Alefako any aminareo i Timoty. Dia izy no hampianatra anareo hoe hoatran’ny ahoana izany manompo an’i Jehovah izany. Hampiofana anareo hitory koa izy.’ Fantatr’i Paoly hoe azony atokisana i Timoty, satria mpinamana be ry zareo sady efa ela be no niara-niasa.