Ny Fahitana Azon’i Jaona

Nigadra tany amin’ny nosy Patmo ny apostoly Jaona, ary tamin’izay i Jesosy no nampiseho azy fahitana 16 momba ny hoavy. Hitany tao, ohatra, hoe hohamasinina ny anaran’i Jehovah, ho tonga ny Fanjakany, ary hatao eto an-tany hoatran’ny any an-danitra ny sitrapony.

Nahita an’i Jehovah teo amin’ny seza fiandrianany i Jaona tao amin’ny fahitana iray. Nisy anti-panahy 24 nanodidina azy, ary nanao akanjo fotsy sy satroboninahitra volamena ry zareo. Nisy tselatra sy feona kotroka avy teo amin’ilay seza fiandrianana. Niankohoka teo anatrehan’i Jehovah ireo anti-panahy 24, ary nivavaka taminy. Nahita olona be dia be avy amin’ny firenena sy foko ary fiteny samihafa i Jaona, tao amin’ny fahitana hafa. Nivavaka tamin’i Jehovah koa ireo olona ireo. Ny Zanak’ondry, izany hoe i Jesosy, no mpiandry an-dry zareo sady nitondra azy teny amin’ny ranon’aina. Hitan’i Jaona tao amin’ny fahitana hafa indray, tatỳ aoriana, hoe nanomboka nanjaka tany an-danitra i Jesosy sy ireo anti-panahy 24. Hitan’i Jaona avy eo i Jesosy niady tamin’ilay dragona sy ny demoniany. I Satana io dragona io. Noroahiny avy any an-danitra ry zareo, dia natsipiny tetỳ an-tany.

Hitan’i Jaona indray avy eo ny Zanak’ondry sy ny 144 000 nijoro teo amin’ny Tendrombohitra Ziona. Dia hitany koa ny anjely anankiray nanodidina ny tany, niteny tamin’ny olona hoe: ‘Matahora an’Andriamanitra ary omeo voninahitra izy.’

Hitany tao amin’ny fahitana manaraka hoe nipoaka ny ady Aramagedona. Resin’i Jesosy sy ny tafiny nandritra an’io ady io ny mpanao ratsy rehetra naman’i Satana. Farany, dia hitan’i Jaona hoe milamina be amin’izay ny any an-danitra sy ny eto an-tany. Ringana tanteraka mantsy i Satana sy ny taranany. Manamasina ny anaran’i Jehovah daholo na ny any an-danitra na ny eto an-tany, ary mivavaka aminy irery ihany.