ABEDNEGO

(Abednegô) [mety hidika hoe Mpanompon’i Nebo [andriamanitra babylonianina]].

Anarana nomena an’i Azaria, izay anisan’ireo Jiosy tanora tarana-mpanjaka na andriana nentin’i Nebokadnezara ho babo, tamin’ny 617 T.K.​—Da 1:3, 4, 7.

Misy manam-pahaizana mihevitra fa i Nebo, andriamanitra babylonianina, no tena tiana holazaina, fa mody natao hoe “Nego” mba tsy hanafintohina an’i Azaria. (Jereo NEBO No. 4.) Midika hoe “Nanampy i Jehovah” ny anarana hoe Azaria, ary toa nifampiantso tamin’ny tena anarany foana ireo Hebreo ireo. (Da 2:17) Tsy nivadika tamin’Andriamaniny mihitsy i Azaria sy Daniela sy Hanania ary Misaela, tany Babylona, tamin’ny resaka sakafo sy zava-pisotro. Taorian’ny fiofanana naharitra telo taona sy ny fanadinana nampanaovin’i Nebokadnezara, dia izy ireo no nahazo ny mari-pankasitrahana ambony indrindra. (Da 1:4, 5, 8-20) Tatỳ aoriana, dia notendren’ny mpanjaka hitantan-draharaha teo amin’ny faritanin’i Babylona i Azaria sy ireo namany roa lahy, noho ny fangatahan’i Daniela.​—Da 2:49.

Nisy Kaldeanina nitati-bolana tany amin’ny mpanjaka hoe rehefa naneno ny mozika famantarana, dia tsy nety niankohoka tamin’ilay sarivongana volamena natsangan’ny mpanjaka i Abednego (Azaria) sy ireo Hebreo roa lahy namany. (Da 3:5, 8, 12) Tezitra be ny mpanjaka ka nanontany azy ireo. Hentitra tsara anefa izy ireo namaly hoe tsy hanao zavatra mifanohitra amin’ny feon’ny fieritreretany sady nasehony fa nino an’i Jehovah izy ireo. Nandre izany ny mpanjaka ka nasainy natsipy tao anaty lafaoro faran’izay nahamay izy ireo. Nirahin’Andriamanitra hiaro azy ireo anefa ny anjeliny. Nihorohoro ilay mpanjaka, ka nasainy nivoaka izy ireo. Hitan’ireo tandapa koa fa tsy naninon-tsy naninona izy telo lahy. Naverina tamin’ny toerany tao an-dapa àry izy ireo.​—Da 3:15-30; jereo MESAKA; SADRAKA.