ADRIA

(Adrìa).

Ranomasina resahin’ny Asan’ny Apostoly 27:27. Voalaza ao fa teny amin’io ranomasina nisamboaravoara be io nandritra ny 14 andro ny sambo nitondra an’i Paoly, ary avy eo rendrika teo amin’ny nosy Malta. Nolazain’i Strabon fa ny niavian’ny anaran’io ranomasina io dia avy amin’ny anaran’ny tanànan’i Atria, eo amoron’ny vinanin’ny Reniranon’i Pô, eo amin’ny misy ny Hoalan’i Venise ankehitriny. (Jeografia, 5, I, 8) Misy tanàna italianina atao hoe Adria ankehitriny, ary lavidavitra ny morontsiraka no misy azy io. Toa nanjary niantsoana ny rano rehetra teny amin’ny manodidina àry ny hoe Adria, nefa nitatra izany ka lasa anisany koa ireo ranomasina antsoina ankehitriny hoe Ranomasina Adriatika, Ranomasina Ionianina, ary ny Ranomasina Mediterane any atsinanan’i Sisila (sy Malta) ary any andrefan’i Kreta. Azo nolazaina àry fa voahodidin’ny “ranomasin’i Adria” ny nosy Malta, tamin’ny andron’i Paoly. Ankehitriny anefa dia misy amin’ireo ranomasina ireo tsy tafiditra ho anisan’ny Ranomasina Adriatika.