AHITOFELA

(Ahitôfèla).

Teratany avy any Gilo any amin’ireo havoanan’i Joda (2Sa 15:12), rain’i Eliama anisan’ny lehilahy maherin’i Davida, ary toa raiben’i Batseba. (2Sa 11:3; 23:34) Mpanolo-tsain’i Davida i Ahitofela. Tena nahay izy, ka toy ny hoe torohevitra mivantana avy amin’i Jehovah ny toroheviny. (2Sa 16:23) Namadika an’i Davida anefa io namany io ary nanohana ny fanonganam-panjakana nataon’i Absaloma zanak’i Davida. Izy no mpitarika an’ilay fikomiana, ka nanoro hevitra an’i Absaloma mba hanao firaisana tamin’ireo vadikelin’i Davida. Nangataka alalana koa izy mba hanangona miaramila 12 000, ary hanenjika an’i Davida avy hatrany ka hamono azy raha mbola iny misahotaka sy reraka iny izy. (2Sa 15:31; 16:15, 21; 17:1-4) Nataon’i Jehovah nandamòka anefa ny tetika feno fahasahiana naroson’i Ahitofela, ka ny torohevitr’i Hosay indray no narahin’i Absaloma. Toa tsinjon’i Ahitofela fa tsy hahomby ny fikomian’i Absaloma (2Sa 15:32-34; 17:5-14), ka namono tena izy ary nalevina tany amin’ny fasan-drazany. (2Sa 17:23) Raha tsy resahina ireo fotoana nisian’ny ady, dia io andininy io ihany no miresaka momba ny olona namono tena, ao amin’ny Soratra Hebreo. Toa ny namadihan’i Ahitofela an’i Davida no resahin’ny Salamo 55:12-14.