AMNONA

(Amnôna) [Mendri-pitokisana; Tsy Mivadika; Maharitra Ela].

1. Lahimatoan’i Davida tamin’i Ahinoama Jezirelita. Tany Hebrona izy no teraka.​—2Sa 3:2; 1Ta 3:1.

Notsiriritiny mafy i Tamara tsara tarehy (anabavin’i Absaloma), ka nandraiki-narary mihitsy izy. Nanaraka ny torohevitr’i Jonadaba, zanaky ny rahalahin-drainy, i Amnona: Mody narary izy ary niangavy an’i Davida Mpanjaka mba haniraka an’i Tamara ho any amin’ny efitranony ka hikarakara “mofo fampiononana” eo anatrehany. Nohararaotiny izany ka notereny hanao firaisana taminy ilay anabaviny hafa reny, na dia efa mba niangavingavy sy nampisaintsaina azy aza. Hita amin’io tantara io fa tia tena ny olona rehefa te hanao firaisana fotsiny fa tsy tena tia. Rehefa azon’i Amnona mantsy izay nilainy, dia noroahiny tany ivelan’ny trano i Tamara, ka naharikoriko azy satria toy ny hoe naloto izy raha mbola teo i Tamara.​—2Sa 13:1-19.

Nitana lolompo tamin’i Amnona i Absaloma, anadahin’i Tamara iray tam-po aminy, ka nankahala azy. Roa taona tatỳ aoriana, rehefa nanao fety tamin’ny fotoana fanetezana ondry i Absaloma, dia nasainy novonoin’ny mpanompony i Amnona raha mbola “falifaly noho ny divay.” (2Sa 13:20-29) Toa i Amnona no nanan-jo handova ny seza fiandrianana satria izy no lahimatoan’i Davida. Mety ho mora tamin’i Absaloma àry ny handova ny fanjakana rehefa maty i Amnona. Tamin’iny zava-nitranga iny no nanomboka tanteraka ny faminanian’i Natana momba an’i Davida, taorian’ny nijangajangany tamin’ny vadin’i Oria.​—2Sa 12:10; jereo ABSALOMA.

2. Iray tamin’ireo efa-dahy zanak’i Simona avy amin’ny fokon’i Joda, ka ny anarany no voatonona voalohany.​—1Ta 4:1, 20.