ANTIPATRIA

(Antipatrìa) [An’i Antipater].

Tanàna nasain’i Heroda Lehibe naorina indray tamin’ny taona 9 T.K., ka nampitondrainy ny anaran’i Antipater (II) rainy. Maro no milaza an’i Antipatria ho i Ras el-ʽAin (Tel Afek), eo amin’ny faritra azon-drano tsara sady mahavokatra eo amin’ny Lemak’i Sarôna. Voalaza fa tao Antipatria no nisy an’ilay Afeka fahiny resahin’ny 1 Samoela 4:1. Toa manamarina izany ny zavatra nofongarina tao tamin’ny 1946, 1961, ary 1974.​—Jereo AFEKA No. 4.

Tany Antipatria i Paoly no naterin’ny miaramila romanina. Nandeha 50 km teo ho eo izy ireo tamin’ny alina, nitsontsorika an’ireo tendrombohitr’i Jerosalema. (As 23:31) Teo amin’ny fihaonan’ireo lalana falehan’ny miaramila romanina no nisy an’i Antipatria, izany hoe, ny lalana avy tany Jerosalema sy ny lalana avy tany Lyda, izay samy nankany Kaisaria (renivohitra romanina). Mpitaingin-tsoavaly 70 no nitondra an’i Paoly avy tao Antipatria ary nanatitra azy tany Kaisaria, ka namita an’ilay ambin-dalana 40 km teo ho eo namakivaky tany lemaka.