HAZO VOLONDAVENONA

Anaran-kazo (heb.: tid·har) miverina indroa ao amin’ny Soratra Hebreo. (Is 41:19; 60:13) Anisan’ny hazo hiara-mirobona amin’ny zenevrie sy siprey any amin’ny lemaka karakaina lasa paradisa izy io, araka ny Isaia 41:19. Resahin’ny Isaia 60:13 kosa fa anisan’ireo hazo “voninahitr’i Libanona” izy io. Tombantombanana fotsiny hoe inona ilay hazo, nefa misy porofo ihany hoe hazo volondavenona ilay izy.​—Jereo Theologische Literaturzeitung, Leipzig, 1926, p. 216.

Ahitana hazo volondavenona karazany roa (Fraxinus ornus sy Fraxinus oxycarpa) eny amoron’ny renirano any amin’ny faritry ny tendrombohitr’i Libanona sy ny farany avaratr’i Palestina, fa tsy eran’i Palestina. Anisan’ny “voninahitr’i Libanona” ilay hazo lehibe, satria mety hahatratra 15 m ny haavony. Maitso tanora ny raviny, ary volondavenona ny tendron’ny sampany. Anisan’ny fianakaviamben’ny oliva ny hazo volondavenona, saingy mihintsan-dravina isaky ny fararano.