ATADA

(Atàda) [Tsilo].

Toerana iray tao amin’ny faritr’i Jordana no nantsoina hoe “ny famoloana tao Atada.” Tsy fantatra hoe taiza marina no nisy azy io. Nijanona tao mba hisaona an’i Jakoba nandritra ny fito andro ireo mpandevina avy tany Ejipta, rehefa handevina an’i Jakoba tao amin’ilay lava-bato teo amin’ny saha tao Makpela, tany Kanana. Mety ho anaran’olona ny hoe Atada. Toa anaran-toerana anefa izy io eto. Nandeha nandevina koa ny mpanompon’i Farao sy ny anti-panahin’i Ejipta. Rehefa nahita an’ilay fombafomba fisaonana àry ny Kananita, dia nilaza hoe: “Fisaonana lehibe ho an’ny Ejipsianina izao!” Izany no nahatonga an’ilay toerana hantsoina hoe Abela-mizraima, izay midika hoe “Fisaonan’ny Ejipsianina.”​—Ge 50:7-13.

Any “an-dafin’i” Jordana (Prot., Kat.), na “any am-pitan’i” Jordana (DIEM) no teny ampiasain’ny Baiboly sasany ao amin’ny Genesisy 50:10, 11. Misy àry mihevitra fa tany atsinanan’ny Reniranon’i Jordana no nisy an’ilay famoloana tao Atada. Raha izany no izy, dia nanalavi-dalana ireo mpandevina ka nihodidina ny Ranomasina Maty, mba hanalavirana ny Filistinina angamba. Mety hanondro ny faritra atsinanan’i Jordana na ny faritra andrefany anefa ilay teny hebreo hoe beʽever izay nadika hoe any “an-dafin’i” Jordana, na “any am-pitan’i” Jordana. Tany Moaba i Mosesy no namita ny fanoratana ny Boky Dimy Voalohany ao amin’ny Baiboly. Taminy àry ny hoe any “an-dafin’i” Jordana dia mety hidika hoe tany andrefan’ilay renirano. Namaha izany olana rehetra izany ny Fandikan-tenin’ny Tontolo Vaovao. Nadikany marina tsara hoe “ao amin’ny faritr’i Jordana” ilay teny hebreo ao amin’ireo andininy ireo.