BETI-DAGONA

(Bèti-dagôna) [Tranon’i Dagona].

1. Tanàna tao amin’ny anjara lovan’ny fokon’i Joda. (Js 15:21, 41) Voatanisa miaraka amin’ireo tanàna any Sefela na faritra iva izy io, nefa misy milaza hoe teo amin’ny Lemak’i Filistia no nisy azy, tao Kirbet Dajona, atsimoandrefana kelin’i Beit Dajan (Bet Dagan), ary tokotokony ho 10 km any atsimoatsinanan’i Tel Aviv-Yafo. Tsara homarihina fa mitanisa tanàna hafa teo amin’ny tany lemaky ny Filistinina ireo andininy manaraka. (Js 15:45-47) Tafiditra tao amin’ny tanin’ny fokon’i Dana àry i Beti-dagona, ary toa toy izany koa i Gadera.​—Js 15:36; jereo GADERA No. 2.

2. Tanàna tao amin’ny tanin’i Asera, tany amin’ny ilany atsinanana, tany akaikin’ny sisin-tany iraisan’ny fokon’i Asera sy ny fokon’i Zebolona. (Js 19:24, 27) Tsy fantatra izay tena nisy azy io.