BETI-PEORA

(Beti-peòra) [Tranon’i Peora].

Mety ho tanàna teo amin’ny tehezan’ny Tendrombohitra Peora. Nitoby “tany an-dohasaha tandrifin’i Beti-peora” ny firenen’Israely, tamin’ilay taona farany naha tany an-tany efitra azy ireo. (De 3:29) Nety ho toerana nivavahana tamin’i “Balan’i Peora” ny Tendrombohitra Peora sy ny tanànan’i Beti-peora. Lazain’ny Nomery 25:1-9 fa voataona haloto fitondran-tena ny Israelita, satria izany no fanao tao amin’io fivavahana io.​—Jereo BALAN’I PEORA.

Namerina nilaza ny Lalàna tamin’ny Israely i Mosesy teo amin’ny Lemak’i Moaba, tao amin’ny faritr’i Jordana. Maty izy taorian’izay, ary nalevina “tao an-dohasahan’ny tany Moaba, tandrifin’i Beti-peora.” Toa tao amin’ny “tany Moaba” na tanin’ny Moabita àry i Beti-peora, saingy tao amin’ny faritra vao azon’i Sihona mpanjakan’ny Amorita, izany hoe faritra teo ambany fahefany talohan’ny nandresen’ny firenen’Israely azy. (De 4:46; 34:6) Nomena ny fokon’i Robena i Beti-peora sy “ny tehezan’i Pisga sy Beti-jesimota”, tatỳ aoriana.​—Js 13:15, 20.

Toerana tany avaratratsinanan’ny Ranomasina Maty sady nifanatrika tamin’ny Lemak’i Moaba i Beti-peora, raha ireo andininy rehetra ireo no jerena. Tsy fantatra anefa hoe taiza marina no nisy azy io. Nilaza kosa i Eusèbe fa tany amin’ny 9 km eo ho eo tany atsinanan’i Livias (Tell er-Rame ankehitriny) izy io. (Onomasticon, 48, 3-5) Misy àry mihevitra fa i Kirbet esh-Sheikh-Jayil i Beti-peora. Any amin’ny 5 km eo ho eo any andrefana avaratrandrefan’ilay toerana voalazan’ny lovantsofina hoe nisy ny Tendrombohitra Nebo no misy an’i Kirbet esh-Sheikh-Jayil, eo amin’ny tehezan’ny tendrombohitra iray heverina ho i “Peora”, izany hoe ilay toerana farany nitondrana an’i Balama mba hanozonany ny Israelita. Raha marina izany, dia ny Lohasaha Falehan-driaka Hosbana ilay ‘lohasaha tandrifin’i Beti-peora.’​—No 23:28; De 4:46; jereo PEORA.