SARIBAO, VAINAFO
Karbonina mainty loadoaka sy mora miparasaka, izay sisa tavela amin’ny hazo nodorana ny saribao. Antontan-kazo nototofana tany (nasiana rivotra kely mba hiparitahan’ny gazy) ary nodorana andro maromaro no nanaovana saribao fahiny, ka nahazoana karbonina tena tsara. Nandany fotoana ilay izy ary nila narahi-maso akaiky. Tian’olona anefa ny saribao satria nanome hafanana tsy niovaova sady tsy nanetroka. Tsy misy porofo hoe nitrandraka arintany voajanahary ny Israelita fahiny.
Afon-tsaribao tao anaty fatana no namindroana rehefa ririnina. (Is 47:14; Je 36:22; Jn 18:18) Tena tsara hahandroan-tsakafo koa ny afon-tsaribao, satria nanome hafanana tsy niovaova nefa tsy namoaka lelafo sy setroka. (Jn 21:9) Nilain’ny mpanefy koa ny afon-tsaribao satria afo nahamay be vao nampiempo metaly sy nanala ny loto. (Is 44:12; 54:16; jereo MANADIO SY MANDRENDRIKA METALY.) Natao teo anelanelan’ny afon-tsaribao ny metaly narendrika, toy ny fanao ankehitriny ao anaty lafaoro fandrendrehana. Toa izany no niavian’ilay ohabolana hoe toy ny mampivangongo vainafo eo ambony lohan’ny fahavalo ny olona iray tsara fanahy aminy, satria hitony ny hatezeran’ilay fahavalo ary hiseho ny toetra tsarany. (Oh 25:22; Ro 12:20) Vainafo no nilazan’ilay “vehivavy hendry” tany Tekoa ny taranaka sisa tavela.—2Sa 14:1-7.
Tsy nadika foana hoe “saribao” anefa ny teny hebreo hoe gahelet sy hoe peham, satria ilazana vainafo fotsiny matetika. Afon-kitay no nampiasaina teo amin’ny alitaran’ny tranolay masina. (Le 1:7, 8; 3:5) Rakotry ny setroky ny emboka manitra teo ambony ‘vainafo avy teo amin’ny alitara’ ny Vata misy ny fifanekena, tamin’ny Andro Fandrakofam-pahotana. (Le 16:12, 13) Hazo iray ihany, hoy i Isaia, no nataon’ny olona iray andriamanitra sy kitay, ary teo ambony vainafo izy no nahandro mofo.—Is 44:14, 15, 19.
Miresaka “vainafo” an’ohatra indraindray ny Baiboly, mba hilazana zavatra mamirapiratra, mahamay, na mirehitra. (2Sa 22:9; Jb 41:21; Sl 18:8, 12, 13; 140:10; Is 6:6; Ezk 1:13; 10:2; 24:11) Ny sazy hampiharina amin’izay manana “lela mamitaka” ilay hoe “vainafon’anjavidy” mahamay.—Sl 120:2-4.