TAKOLAKA
Ny ilany roa amin’ny tarehy, eo ambonin’ny valanorano sy eo ambanin’ny maso. Lehi no teny hebreo ary siagôn no teny grika nadika hoe “takolaka.” Ao amin’ny Baiboly, dia tsy hoe natao mba handratrana ny tehamaina eo amin’ny takolaka fa mba hanafaizana na hanalana baraka. Nahazo tehamaina, ohatra, i Mikaia, mpaminanin’i Jehovah, satria tsy naminany zava-tsoa momba an’i Ahaba mpanjakan’ny Israely ratsy fanahy. (1Mp 22:24; 2Ta 18:23) Nahazo tehamaina koa i Joba, tamin’izy nosedrain’i Satana. Te hanala baraka azy mantsy ireo olona nanevateva sy naneso azy.—Jb 16:10.
Naminany i Isaia sy Mika fa hamely tehamaina an’ilay Mesia sy hanongotra ny volombava teo amin’ny takolany ny fahavalony. Porofo izany fa tena hanala baraka azy tokoa izy ireo. (Is 50:6; Mi 5:1) Izany tokoa no nataon’ny Jiosy rehefa notsaraina teo anatrehan’ny Fitsarana Avo i Jesosy Kristy. Nanao izany taminy koa ny miaramila romanina taorian’izay, taloha kelin’ny namonoana azy teo amin’ny hazo fijaliana. (Mt 26:67, 68; Jn 18:22, 23; 19:3) Tsy namaly faty mihitsy anefa i Jesosy, ary tsy nanao teny henjana sy nasiaka.
Hoy i Jesosy tamin’ny mpianany: “Efa renareo fa voalaza hoe: ‘Maso ho solon’ny maso ary nify ho solon’ny nify.’ Izaho kosa anefa milaza aminareo hoe: Aza manohitra an’izay manisy ratsy anao, fa na iza na iza mamely tehamaina ny takolakao havanana, dia atodiho any aminy koa ny takolakao ilany.” (Mt 5:38, 39) Tsy te hilaza i Jesosy teo hoe ratsy daholo rehefa mety ho ady, satria manan-jo hiady amin’ny fahavalony Andriamanitra. Tsy te hilaza koa izy hoe tsy manan-jo hiaro tena izy raha misy mamely azy. Te hilaza kosa izy fa tsy tokony hamely an’izay mamely azy ny Kristianina ary tsy tokony hamaly faty. Nampianatra izao toro lalana izao izy tamin’izany: Misoroka ady ny olona raha tsy mamaly faty. Tsy natao handratrana ny tehamaina fa natao hanalana baraka sy hilana ady. Tsy nilaza i Jesosy hoe raha misy mamely ny Kristianina eo amin’ny takolany, dia tokony hanome ny takolany ilany izy mba hasiana tehamaina koa. Te hilaza kosa izy fa raha misy mila ady amin’ny Kristianina na te hifamaly aminy ka mamelaka ny takolany na manao teny manindrona azy, dia tsy tokony hamaly faty ny Kristianina. Nilaza zavatra mitovy amin’izany koa ny apostoly, ka nanamafy an’io toro lalana nomen’i Jesosy io.—Ro 12:17-21; 1Pe 3:9.