KANELINA

[Heb.: kinnamôhn; gr.: kinnamômôn].

Anisan’ny fianakaviamben’ny hazo lorie ny hazo kanelina (Cinnamomum zeylanicum), toy ny kasia sy ravintsara ihany. Tany malemy sy be fasika ary mando no tena aniriany, ary betsaka azy any Sri Lanka sy Java. Mety ho fiteny hafa no niavian’ilay hoe kinnamôhn (heb.), ary toa nohafarana tany ivelan’ny Tany Nampanantenaina ny kanelina.

Mirefy 9 m eo ho eo ny hazo kanelina farany avo, malama ny hodiny mivolondavenona, ary misandrahaka ny sampany. Maitsoririnina izy io, ary miendrika lohan-defona ny raviny izay maitso ny atiny ary fotsy ny ivohony (20-23 sm eo ho eo ny lavany, ary 5 sm eo ho eo ny sakany). Fotsy na somary mavo ny voninkazony kely mitsitokotoko. Tsy dia misy fofona ny hodiny ivelany ka tsy ilaina, fa ny hodiny anatiny matroka kokoa kosa no ahazoana an’ilay kanelina amidy sy menaka manitra.

Anisan’ny “zava-manitra tsara indrindra” nanaovana ny menaka masina fanosorana ny kanelina. (Ek 30:23) Nafafy tamin’ny fandriana izy io (Oh 7:17), nanoharana ny hoditr’ilay tovovavy solemita (To 4:13, 14), ary anisan’ny entana amidin’ny mpivaro-mandeha amin’i “Babylona Lehibe” alohan’ny handringanana azy.​—Ap 18:2, 11-13.