EBEDA-MELEKA

(Ebèda-melèka) [Mpanompon’ny Mpanjaka].

Etiopianina, tandapa tao an-tranon’i Zedekia Mpanjaka. Nasehony tamin’ny nataony fa tena nanohana an’i Jeremia mpaminanin’i Jehovah izy. Nendrikendrehin’ny andrianan’i Joda i Jeremia hoe mampirisika ny olona hikomy. Natolotr’i Zedekia teo an-tanan’izy ireo àry ilay mpaminany. Nalain’ireo andriana i Jeremia ka nataony tao amin’ny lavaka fanangonan-dranon’i Malkia, tao amin’ny Tokotanin’ny Mpiambina. Natsipin’izy ireo tao amin’io lavaka feno fotaka io izy mba ho faty mosary tao. (Je 38:4-6) Tena nankahala an’i Jeremia sy ny hafatra nentiny ny olona. Nisikina herim-po anefa i Ebeda-meleka ka tsy niafinafina nangataka ny hanafahana an’i Jeremia, tany amin’ny mpanjaka, izay nipetraka teo amin’ny Vavahadin’i Benjamina. Neken’i Zedekia ny fangatahany. Nankatò ny baikon’ny mpanjaka i Ebeda-meleka, ka niaraka tamin’ny 30 lahy nankany amin’ilay lavaka, ary nandatsaka tady nisy voro-damba sy tapa-damba tonta hataon’i Jeremia ao ambany helika, mba hahafahana hisintona azy avy tao. (Je 38:7-13) Tsy hoe nilana lehilahy maro ny fampiakarana an’i Jeremia avy tao matoa i Ebeda-meleka nasain’ny mpanjaka niaraka tamin’ny 30 lahy, fa mba hahavitany tsara ilay fanafahana, raha sanatria ka mitady hanakantsakana izany ny andriana na ny mpisorona. Nanao soa tamin’ny mpaminanin’Andriamanitra i Ebeda-meleka ka naniraka an’i Jeremia i Jehovah mba hanome toky azy hoe hanafaka azy i Jehovah, ka tsy ho faty izy rehefa hanao fahirano ny Babylonianina.​—Je 39:15-18; jereo LEHILAHY NOVOSIRINA.