ELKANA

(Elkàna) [Andriamanitra dia Nahavita].

1. Levita zanakalahin’ilay Kora mpikomy. Tsy niara-maty tamin-drainy izy sy Asira ary Abiasafa rahalahiny. (Ek 6:24; No 26:11) Mety ho izy ihany ilay Elkana resahin’ny 1 Tantara 6:23.

2. Levita voatonona faharoa tamin’ireo Levita Kehatita efatra nantsoin’ny bokin’ny Tantara hoe Elkana. Voalaza fa izy no rain’i Amasay sy Ahimota. Toa zanak’i Joela izy.​—1Ta 6:25, 36.

3. Levita voatonona fahatelo tamin’ireo efa-dahy voaresaka etsy amin’ny No. 2. Toa zanakalahin’i Mahata izy.​—1Ta 6:26, 35.

4. Zanakalahin’i Jerohama, ary rain’i Samoela mpaminany. Nanan-janaka lahy sy vavy hafa koa izy. Nonina tao Rama tany amin’ny faritra be tendrombohitr’i Efraima izy, ka izany no niantsoana azy hoe Efraimita. Levita anefa izy raha ny razambeny no jerena. (1Sa 1:1; 1Ta 6:27, 33, 34) Fanaony ny nankany Silo isan-taona mba “hiankohoka sy hanao sorona ho an’i Jehovah.” Nanana vady roa izy: I Hana sy Penina. Tsy niteraka i Hana, kanefa tia azy i Elkana ary niezaka nampionona azy foana. Novalian’i Jehovah ny vavak’i Hana ka niteraka an’i Samoela izy mivady, ary mbola niteraka telo lahy sy roa vavy taorian’izay.​—1Sa 1:2, 3, 5, 8, 19; 2:21.

5. Levita razamben’ny lehilahy iray nantsoina hoe Berekia.​—1Ta 9:16.

6. Iray tamin’ireo Korahita, izay azo inoana hoe nonina tany amin’ny faritanin’i Benjamina, ary anisan’ireo “tonga tany amin’i Davida tany Ziklaga, fony izy mbola tsy afaka nivezivezy noho ny amin’i Saoly.”​—1Ta 12:1, 2, 6.

7. Iray tamin’ireo mpiandry vavahadin’ny toerana nisy ny Vata masina, tamin’i Davida naka azy io tao an-tranon’i Obeda-edoma ka namindra azy io tany Jerosalema. Mety ho izy ihany ilay Elkana No. 6.​—1Ta 15:23, 25.

8. Tandapa nitana toerana ambony nanarakaraka an’i Ahaza mpanjakan’ny Joda. Namono azy i Zikry, lehilahy natanjaka avy tany Efraima, rehefa nanafika ny tanin’i Joda i Peka mpanjakan’ny Israely.​—2Ta 28:6, 7.