FANAOVANA AN-KERINY
Fanerena sy fampitahorana olona mba hanomezany ny zavatra eny aminy na hakana izany, ka ampiasana hery izy, na rahonana, na anamparana fahefana. ‘Mpanao sinto-mahery’ no dikan’ny hoe harpaks (gr.) nadika hoe “mpanao an-keriny.” (1Ko 5:10) Imbetsaka ny Baiboly no mampitandrina an’ireo mitady tombony amin’ny tsy rariny, indrindra fa raha manana andraikitra sy toerana ambony ilay olona.—Ek 18:21; Oh 1:19; 15:27.
Nanao an-keriny anefa matetika ny Jiosy mpamory hetra, izay nampiasain’ny Romanina nanjanaka an’i Palestina. Nohararaotin’izy ireo ny vahoaka mba hanangonan-karena, toy ny nataon’ny mpampiasa azy ihany. Mety ho niresaka an-kolaka an’izany i Jesosy tao amin’ilay fanoharany momba ilay Fariseo nihevi-tena ho marina sy ilay mpamory hetra. Nidera tena tamin’Andriamanitra mantsy ilay Fariseo hoe tsy mba mpanao an-keriny. (Lk 18:11) Hoy i Jaona Mpanao Batisa tamin’ny mpamory hetra nanontany azy ny amin’izay tokony hatao: “Aza mitaky hetra mihoatra noho ny tokony ho izy.”—Lk 3:13.
Nibebaka sy niova i Zakaiosy, lehiben’ny mpamory hetra sady mpanankarena, ka hoy izy tamin’i Jesosy izay nasainy tao an-tranony: “Izay rehetra nalaiko tsy ara-drariny tamin’ny fanambakana dia honerako avo efatra heny.” (Lk 19:2, 8; jereo FIAMPANGANA.) Ny 120 isan-jaton’ny zavatra nalain’ny mpanambaka ihany anefa no tokony haveriny raha nibebaka izy, hoy ny Lalàna.—Le 6:2-5.
Resahin’ny Soratra Grika Kristianina fa ny fanaovana an-keriny dia ratsy toy ny fijangajangana, fanitsakitsaham-bady, fanompoan-tsampy, faniriana tsy mety afa-po, halatra, fimamoana, fanevatevana, ary ny firaisan’ny samy lehilahy na samy vehivavy. Tsy handova ny Fanjakan’Andriamanitra izay mpanao an’ireo. Efa nisy nanao an’ireo teo anivon’ny fiangonan’i Korinto, saingy efa voasasa madio izy ireny. Marina fa tsy azon’ny Kristianina nialana tanteraka ny olona nanao an’ireo teto amin’ity tontolo ity, saingy tsy tokony hifaneraseran’izy ireo intsony izay antsoina hoe “rahalahy” nefa mpanao an’ireo, ka tokony hesoriny tsy ho eo anivon’ny fiangonana.—1Ko 5:9-11; 6:9-11.
Tsy nety nanome na inona na inona an’i Feliksa governora romanina ny apostoly Paoly, satria fantany fa te hanery azy an-kolaka hanome vola i Feliksa, matoa namela azy higadra roa taona. Nodimbiasan’i Festosy Governora i Feliksa, tatỳ aoriana. Tsy manaiky terena hanao tsolotra koa ny Kristianina.—As 24:26, 27.