FANKASITRAHANA
Ratsôhn ny teny hebreo nadika hoe fankasitrahana, ary eodôkia kosa ny teny grika. Midika hoe izay mahafinaritra na ankasitrahana izy ireo sy ny teny iray tarika aminy, ary nadika hoe ‘finaritra’, ‘mahafinaritra’, ‘sitraka’, ‘ankasitrahana’, ‘tiana’, sy ny toy izany.
Fankasitrahan’Andriamanitra. Mampiasa an’ireo teny ireo ny Baiboly mba hilazana an’izay ankasitrahan’Andriamanitra, na mahafinaritra azy, na tiany. (Sl 51:18; 106:4; Ef 1:5, 9) Ampahafantarin’Andriamanitra mazava hoe inona no tsy maintsy atao raha te hampifaly azy, ary olona manao ahoana no ekeny ho namany sy ankasitrahany. Tsy mankasitraka an’izay mandà ny Teniny na mikomy aminy izy, fa tezitra amin’izy ireny kosa.—Sl 2:5; He 3:16-19.
Fankasitrahan’ny olona. Ilazana an’izay ankasitrahan’ny olona na sitrany koa ireo teny hebreo sy grika ireo. (2Ta 10:7; Es 1:8; Ro 15:25, 26) Izao, ohatra, no nolazain’ny apostoly Paoly momba ny Jiosy: “Ry rahalahy, ny sitraky ny foko sy ny italahoako amin’Andriamanitra ho azy ireo dia ny mba hahazoany famonjena.” (Ro 10:1) Hankasitrahan’Andriamanitra sy ny olona ireo manao soa amin’ny hafa, indrindra fa amin’ny solontenan’Andriamanitra sy ny Zanany.—Oh 8:35; 10:32; 11:27.
‘Olona ankasitrahana.’ Tsy ireo mpitondra fivavahana jiosy no nisehoan’ilay anjely nanambara ny nahaterahan’ny Mesia, fa mpiandry ondry nanetry tena kosa. Nisy anjely maro be, avy eo, nanambara hoe: “Voninahitra any amin’ny avo indrindra ho an’Andriamanitra, ary fiadanana etỳ ambonin’ny tany eo amin’ny olona ankasitrahany.” (Lk 2:14) Tsy nanambara fiadanana tamin’ny fahavalon’Andriamanitra ireo anjely ireo, satria tsy mihavana amin’Andriamanitra ny fahavalony. “‘Tsy misy fiadanana ho an’ny ratsy fanahy’, hoy ny Andriamanitro.” (Is 57:21) Toy izao no nandikan’ny Baiboly DIEM ny Lioka 2:14: “Voninahitra any amin’ny avo indrindra ho an’Andriamanitra; ary fiadanana etỳ an-tany ho an’ny olombelona fa nanehoany fitia!” Tsy te hilaza Andriamanitra eo hoe ankasitrahany daholo ny olombelona rehetra, na hoe omeny fiadanana koa ireo tsy tena tia azy fa te hanao izay danin’ny kibony fotsiny. Ny tiany holazaina kosa dia ireo olona ankasitrahany satria tena mino azy ary manara-dia ny Zanany.
Manamafy izany ny Baiboly maro hafa, ka mazava tsara ny tiana holazaina. Hoy ny Fandikan-teny Protestanta: “Fiadanana ho etỳ ambonin’ny tany amin’ny olona ankasitrahany.” Hoy koa ny Baibolin’i Louis Segond: “Fiadanana ho etỳ an-tany ho amin’ireo olona ankasitrahany!” Misy Baiboly maoderina hafa koa milaza toy izany.