HABAKOKA

(Habakôka) [Famihinana Mafy].

Mpaminany hebreo tany Joda, ary nanoratra an’ilay boky mitondra ny anarany. (Ha 1:1; 3:1) Misy milaza fa ny teny famaranana nataon’i Habakoka (“Ho an’ny mpitarika. Ampiarahina amin’ny lokangako”), sy ilay hira fisaonana ao amin’ny toko faha-​3, dia porofo fa Levita mpitendry zavamaneno tao amin’ny tempoly izy. Tsy ampy hanaporofoana izany anefa io teny ao aorian’ny Habakoka 3:19 io, satria nisy olona tsy Levita koa nanao hira fisaonana. (2Sa 1:17, 18) Maro ny zavatra lazain’ny lovantsofina momba an’i Habakoka, nefa tsy tena azo antoka ireny. Ny Soratra Masina rahateo koa tsy miresaka momba ny ray aman-dreniny, na ny foko niaviany, na ny momba ny fiainany na ny nahafatesany. Asehon’ny porofo ao amin’ny bokin’i Habakoka fa naminany tany am-piandohan’ny fotoana nitondran’i Joiakima izy, angamba talohan’ny nandresen’i Nebokadnezara ny tafika ejipsianina tao Karkemisy tamin’ny 625 T.K.